Lipotso Tse Tsoang ho Babali

Esaia khaolo ea 53 (NW) e na le boprofeta bo tsebahalang bo buang ka Mesia. Temana ea 10 e re: “Jehova o ile a khahloa ke ho mo sithabetsa; o ile a mo kulisa.” See se bolela’ng?

Ho bonolo ho bona hore na ke hobane’ng ha potso e ka hlaha ka Esaia 53:10. Bakreste ba ’nete ha ba nahane hore Molimo oa rōna ea qenehelang le ea bonolo a ka khahloa ke ho sithabetsa kapa ho kulisa leha e le mang. Bibele e re fa motheo oa ho kholiseha hore Molimo ha a thabele ho hlokofatsa ba se nang molato. (Deuteronoma 32:4; Jeremia 7:30, 31) Ho theosa le makholo a lilemo e ka ’na eaba liketsahalong tse ling Jehova o ile a lumella bohloko ka mabaka a lumellanang le bohlale ba hae le lerato. Empa ka sebele ha aa ka a etsa hore Mora oa hae ea ratoang, Jesu, a utloe bohloko. Ebe joale temana ee e hlile e re’ng?

Ha e le hantle, re ka thuseha ho utloisisa moko-taba haeba re hlahloba temana ena kaofela ha eona, re hlokomela makhetlo a mabeli ao lentsoe ‘khahla’ le hlahang ka ’ona. Esaia 53:10 (NW) e baleha tjena: “Jehova o ile a khahloa ke ho mo sithabetsa; o ile a mo kulisa. Haeba u tla beha moea oa hae e le nyehelo ea molato, o tla bona bana ba hae, o tla lelefatsa matsatsi a hae, ’me se khahlang Jehova se tla atleha letsohong la hae.”

Molaetsa oa Bibele ka kakaretso o bontša hore “se khahlang Jehova,” se boletsoeng qetellong ea temana ena, se likoloha tabeng ea hore a phethahatse morero oa hae ka ’Muso. Ha Jehova a etsa sena o tla tlosa qoso bobusing ba hae ’me o tla fana ka monyetla oa hore sebe se futsitsoeng se tlosoe bathong ba mamelang—libe tsa rōna. (1 Likronike 29:11; Pesaleme ea 83:18; Liketso 4:24; Baheberu 2:14, 15; 1 Johanne 3:8) Sena sohle se itšetlehile ka hore Mora oa Molimo o ile a tlameha hore e be motho le hore a lokisetse sehlabelo sa thekollo. Joalokaha re tseba, khabareng Jesu o ile a utloa bohloko. Bibele e re bolella hore o ile “a ithuta ho mamela linthong tseo a ileng a utloisoa bohloko ke tsona.” Kahoo, Jesu o fetse a rua molemo ka ho utloa bohloko hoo.—Baheberu 5:7-9.

Jesu o ile a tseba esale pele hore tsela e khabane eo a neng a tla e nka e ne e tla akarelletsa bohloko. Sena se totobatsoa ke mantsoe a hae a tlalehiloeng ho Johanne 12:23, 24, moo re balang sena: “Hora e tlile ea hore Mora oa motho a tlotlisoe. Kannete-nete ke re ho lōna, Ntle le hore thollo ea koro e oele mobung ’me e shoe, e sala e le thollo e le ’ngoe feela; empa haeba e shoa, joale e beha litholoana tse ngata.” E, Jesu o ne a tseba hore o tla tlameha ho tšepahala esita le ho fihlela a utloisoa bohloko ke lefu. Tlaleho e tsoela pele, e re: “‘Joale soule ea ka e khathatsehile, ’me ke tla re’ng? Ntate, mpholose horeng ena. Leha ho le joalo, ke ka lebaka lena ke fihlileng horeng ena. Ntate, tlotlisa lebitso la hao.’ Ka hona lentsoe la tsoa leholimong: ‘Ke le tlotlisitse ’me ka sebele ke tla le tlotlisa hape.’”—Johanne 12:27, 28; Matheu 26:38, 39.

Re ka utloisisa Esaia 53:10 ka moelelo ona. Jehova o tsebile hantle hore phihlelo ea Mora oa hae e ne e tla akarelletsa ho sithabetsoa ka tsela e reriloeng. Empa kaha Jehova o ne a nahanne ka molemo o tlotlehang le o moholo o neng o tla hlaha, o ile a khahloa ke seo Jesu a neng a tla lokela ho feta ho sona. Ka kutloisiso eo, Jehova o ile a ‘khahloa ke ho sithabetsa,’ kapa ke ho sithabetsoa ha Mesia. Jesu le eena o ile a khahloa ke seo a neng a ka se etsa le seo a ileng a fela a se etsa. Ka sebele, joalokaha Esaia 53:10 (NW) e phetha, ‘se khahlang Jehova se ile sa fela sa atleha letsohong la hae.’