Na U Mokreste ea “Hōlileng ka ho Feletseng”?

MOAPOSTOLA PAULUSE o ile a ngola: “Ha ke ne ke le ngoana e monyenyane, ke ne ke bua joaloka ngoana e monyenyane, ke nahana joaloka ngoana e monyenyane, ke beha mabaka joaloka ngoana e monyenyane.” Ha e le hantle, bohle re kile ra ba bana ba banyenyane ba sitoang ho iketsetsa letho. Leha ho le joalo, ha rea ka ra lula re le joalo ka ho sa feleng. Pauluse o ile a re: “Kaha joale ke fetohile monna, ke lahlile litšobotsi tsa ngoana e monyenyane.”—1 Bakorinthe 13:11.

Ka tsela e tšoanang, Bakreste bohle ba qala e le bana ba banyenyane ba moea. Empa ka mor’a nako, bohle ba ka ‘fihlela bonngoe tumelong le tsebong e nepahetseng ea Mora oa Molimo, ho isa ho monna ea hōlileng ka ho feletseng, ho isa tekanyong ea boholo boo e leng ba botlalo ba Kreste.’ (Baefese 4:13) Ho 1 Bakorinthe 14:20, rea khothatsoa: “Barab’eso, le se ke la ba bana ba banyenyane matleng a kutloisiso . . . Le be ba hōlileng ka ho feletseng matleng a kutloisiso.”

Boteng ba Bakreste ba hōlileng ka ho feletseng tsebong ke tlhohonolofatso ho batho ba Molimo kajeno, haholo kaha ho na le batho ba bangata haholo ba bacha. Bakreste ba hōlileng ka ho feletseng ba tlatsetsa botsitsong ba phutheho. Ba ba le tšusumetso e ntle tšekamelong, kapa boikutlong bo laolang phutheho leha e le efe eo ba leng ho eona.

Ha khōlo ea ’mele e batla e le ntho e itlisang, khōlo ea moea e tla feela ka mor’a nako le ka boiteko. Ha ho makatse hore ebe khale koana mehleng ea Pauluse, Bakreste ba bang ba ile ba hlōleha  ho ‘hatela pele ka matla khōlong,’ ho sa tsotellehe hore ba ne ba sebelelitse Molimo ka lilemo tse ngata. (Baheberu 5:12; 6:1) Ho thoe’ng ka uena? Ebang u sebelelitse Molimo ka lilemo tse ngata kapa ka nako e khutšoanyane ha ho bapisoa, e ka ba ho loketseng hore u inonye ka botšepehi. (2 Bakorinthe 13:5) Na u har’a ba ka bitsoang hore ke Bakreste ba hōlileng ka ho feletseng tsebong? Haeba ha ho joalo, u ka ba joalo joang?

‘Ho Hōla ka ho Feletseng Matleng a Kutloisiso’

Ngoana e monyenyane oa moea o ‘akhotsoa joalokaha eka o akhotsoa ke maqhubu ’me o isoa koana le koana ke moea o mong le o mong oa thuto ka ho qhekella ha batho, ka mano a ho qapa phoso.’ Kahoo, Pauluse o ile a khothatsa: “A re hōleng linthong tsohle ho ea ho eo e leng hlooho, Kreste.” (Baefese 4:14, 15) Motho o etsa seo joang? Baheberu 5:14 e re: “Lijo tse tiileng ke tsa batho ba hōlileng ka ho feletseng, tsa bao ka tšebeliso matla a bona a ho lemoha a koetliselitsoeng ho khetholla ka bobeli se nepahetseng le se fosahetseng.”

Hlokomela hore batho ba hōlileng tsebong ba koetlisitse matla a bona a temoho ka ho a sebelisa, kapa ka phihlelo ha ba ntse ba sebelisa melao-motheo ea Bibele. Joale, ho hlakile hore motho ha a hōle tsebong ka bosiu bo le bong feela; ho hōla moeeng ho nka nako. Leha ho le joalo, u ka etsa ho hongata ho potlakisa khōlo ea hao ea moea ka ho ithuta—haholo lintho tse tebileng haholoanyane tsa Lentsoe la Molimo. Linakong tsa morao tjena Molula-Qhooa o buile ka litaba tse ngata tse tebileng. Ba hōlileng tsebong ha ba qobe lihlooho tse joalo hobane li e-na le “lintho tse ling tse thata ho utloisiseha.” (2 Petrose 3:16) Ho e-na le hoo, ka cheseho ba ja lijo tse thata joalo!

Mesuoe le Baboleli ba Chesehang

Jesu o ile a laela barutuoa ba hae, a re: “Ka hona e-eang ’me le etse batho ba lichaba tsohle barutuoa, le ba kolobetsa ka lebitso la Ntate le la Mora le la moea o halalelang, le ba ruta ho boloka lintho tsohle tseo ke le laetseng tsona.” (Matheu 28:19, 20) Ho kopanela ka cheseho mosebetsing oa boboleli le hona ho ka potlakisa khōlo ea hao ea moea. Ke hobane’ng ha u sa loanele ho kopanela ho oona ka hohle kamoo maemo a hao a u lumellang kateng?—Matheu 13:23.

Ka linako tse ling, likhatello tsa bophelo li ka etsa hore ho fumana nako ea ho bolela e be phephetso. Empa, ka ho ‘ikitlaetsa ka matla’ u le ’moleli, u bontša hore u nka “litaba tse molemo” e le tsa bohlokoa. (Luka 13:24; Baroma 1:16) Ka tsela eo u ka talingoa u le ‘mohlala ho ba tšepahalang.’—1 Timothea 4:12.

Ba Bolokileng Botšepehi

Ho hōla tsebong ho boetse ho ama ho etsa boiteko ba ho ipoloka u tšepahala. Joalokaha ho tlalehiloe ho Pesaleme ea 26:1 (NW), Davida o ile a phatlalatsa: “Nkahlole, Jehova, kaha ke tsamaile botšepehing ba ka.” Botšepehi ke ho ba le boitšoaro bo botle, ho ba ea feletseng. Leha ho le joalo, ha bo bolele phetheho. Davida ka boeena o ile a etsa libe tse ’maloa tse khōlō. Empa kaha o ile a amohela khalemelo ’me a otlolla litsela tsa hae, o ile a bontša hore pelo ea hae e ntse e e-na le lerato la ’nete ho Jehova Molimo. (Pesaleme ea 26:2, 3, 6, 8, 11) Botšepehi bo akarelletsa boinehelo ba pelo eohle kapa e feletseng. Davida o ile a bolella mora oa hae Solomone sena: “Tseba Molimo oa ntat’ao ’me u mo sebeletse ka pelo e feletseng.”—1 Likronike 28:9, NW.

Ho boloka botšepehi ho bolela ho se be “karolo ea lefatše,” ho tsoa lipolotiking tsa lichaba le lintoeng tsa tsona. (Johanne 17:16) Hape u lokela ho khaotsa mekhoa e litšila, e kang bohlola, bofebe le tšebeliso e mpe ea lithethefatsi. (Bagalata 5:19-21) Leha ho le joalo, ho boloka botšepehi ho bolela ho fetang ho qoba lintho tseo.  Solomone o ile a lemosa: “Lintsintsi tse shoeleng li nkhisa le ho bolisa ole ea motlotsi; ho joalo le bothoto bo bonyenyane, bo senya botumo ba ea tumileng ka bohlale le khanya.” (Moeklesia 10:1) E, “bothoto bo bonyenyane,” bo kang ho soasoa ho sa lokang kapa lebonyo, li ka senya botumo ba “ea tumileng ka bohlale.” (Jobo 31:1) Kahoo, bontša ho hōla tsebong ka ho batla ho ba mohlala boitšoarong bohle ba hao, u qobe le “ho bonahalang e le bokhopo.”—1 Bathesalonika 5:22, King James Version.

Ba Nang le Botšepehi bo sa Sekisetseng

Mokreste ea hōlileng ka ho feletseng o boetse o na le botšepehi bo sa sekisetseng. Joalokaha re bala ho Baefese 4:24, moapostola Pauluse o eletsa Bakreste tjena: “Le apare botho bo bocha bo ileng ba bōptjoa ho ea ka thato ea Molimo ho lokeng ha ’nete le botšepehing bo sa sekisetseng.” Ka Mangolong a Segerike lentsoe la puo ea mathomo bakeng sa ‘botšepehi bo sa sekisetseng’ le na le moelelo oa khalalelo, ho loka, tlhompho ea borapeli. Motho ea nang le botšepehi bo sa sekisetseng o inehetse, o tletse borapeli; o etsa ka hloko mesebetsi eohle eo a tšoanetseng ho e etsetsa Molimo.

Litsela tse ling tseo ka tsona u ka hlaolelang botšepehi bo sa sekisetseng joalo ke life? E ’ngoe e ka ba ka ho sebelisana le baholo ba phutheho ea heno. (Baheberu 13:17) Ha Bakreste ba hōlileng tsebong ba hlokomela hore Kreste o khethetsoe ho ba Hlooho ea phutheho ea Bokreste, botšepehi ba bona e ba bo sa sekisetseng ho ba khethetsoeng ho “lisa phutheho ea Molimo.” (Liketso 20:28) E ne e tla ba ho sa lokelang hakaakang ho belaela kapa ho tsoa tlaase bolaoli ba baholo ba khethiloeng! Hape u lokela ho ikutloa hore hoa hlokahala ho tšepahala ho “lekhoba le tšepahalang le le masene” le mecha e sebelisetsoang ho aba ‘lijo tsa moea ka nako e tšoanetseng.’ (Matheu 24:45) Potlakela ho bala le ho sebelisa boitsebiso bo fumanoang ho Molula-Qhooa le lingoliloeng tsa habo oona.

Ho Bontša Lerato ka Liketso Tsa Hao

Pauluse o ile a ngolla Bakreste ba Thesalonika, a re: “Lerato la e mong le e mong le la lōna kaofela lea eketseha e mong ho e mong.” (2 Bathesalonika 1:3) Ho hōla leratong ke tšobotsi ea bohlokoa ka ho khethehileng ea khōlo ea moea. Joalokaha ho tlalehiloe ho Johanne 13:35, Jesu o itse: “Ka sena bohle ba tla tseba hore le barutuoa ba ka, haeba le e-na le lerato har’a lōna.” Lerato le joalo la bara ba motho ha le khetholloe feela ka ho nkeha maikutlo kapa ka boikutlo. Vine’s Expository Dictionary of Old and New Testament Words e re: “Lerato le ka tsejoa feela ka liketso tseo le li susumetsang.” E, u hatela pele khōlong ntlheng ena ka ho etsa liketso tsa lerato!

Ka mohlala, ho Baroma 15:7, rea bala: “Amohelanang.” Tsela e ’ngoe ea ho bontša lerato ke ka hore libokeng tsa phutheho u lumelise balumeli-’moho le uena le batho ba qalang ho tla—ka mofuthu le ka cheseho! Ba tsebe. ‘Thahasella’ ba bang. (Bafilippi 2:4) Mohlomong u ka ba ua bontša moea oa ho amohela baeti ka mofuthu ka ho memela ba fapa-fapaneng lapeng ha hao. (Liketso 16:14, 15) Ho se phethahale ha ba bang ka linako tse ling ho ka leka botebo ba lerato la hao, empa ha u ntse u ithuta ho ‘ba mamella ka lerato,’ u bontša hore u ntse u hōla ka ho feletseng.—Baefese 4:2.

Ho Ntšetsa Pele Borapeli bo Hloekileng ka Matlotlo a Rōna

Mehleng ea boholo-holo, hase batho ba Molimo kaofela ba neng ba phethahatsa boikarabelo ba bona ba ho tšehetsa tempele ea Jehova. Kahoo, Molimo o ile a romela baprofeta, ba kang Haggai le Malakia, ho susumetsa batho ba Hae ntlheng ena. (Haggai 1:2-6; Malakia 3:10) Kajeno, Bakreste ba hōlileng tsebong ka thabo ba tšehetsa borapeli ba Jehova ka matlotlo a bona. Etsisa  ba joalo ka ho latela molao-motheo o ho 1 Bakorinthe 16:1, 2, kamehla u “behelle ka thōko ho hong” hoo u tla nehelana ka hona phuthehong le mosebetsing oa lefatše ka bophara oa Lipaki tsa Jehova. Lentsoe la Molimo lea tšepisa: “Ea jalang ka bongata o tla boela a kotule ka bongata.”—2 Bakorinthe 9:6.

U se ke ua hlokomoloha matlotlo a mang ao u nang le ’ona, a kang nako ea hao le matla. Leka ho ‘reka nako’ mesebetsing eo e seng ea bohlokoa haholo. (Baefese 5:15, 16; Bafilippi 1:10) Ithute ho ba ea atlehang haholo tšebelisong ea nako. Ho etsa joalo ho ka u nolofalletsa ho kenya letsoho mererong ea ho hlokomela Holo ea ’Muso le mesebetsing e meng e ntšetsang pele borapeli ba Jehova. Ho sebelisa matlotlo a hao ka tsela ena ho tla fana ka bopaki bo eketsehileng ba hore u fetoha Mokreste ea hōlileng ka ho feletseng.

Hatela Pele ka Matla Khōlong!

Banna le basali ba khothalletseng ho ithuta le ba nang le tsebo, bao e leng baboleli ba chesehang, bao botšepehi ba bona bo se nang sekoli, ba tšepahalang le ba lerato, le ba utloisisang ho kenya letsoho ka bobona le ka matlotlo mosebetsing oa ’Muso, ruri ke tlhohonolofatso e khōlō. Kahoo, hase feela moapostola Pauluse a ileng a eletsa tjena: “Kaha joale re tlohetse thuto ea mathomo mabapi le Kreste, a re hateleng pele ka matla khōlong”!—Baheberu 6:1.

Na u Mokreste ea hōlileng ka ho feletseng tsebong? Kapa, ka litsela tse ling tse itseng, u sa ntsane u tšoana le ngoana e monyenyane oa moea? (Baheberu 5:13) Ho sa tsotellehe hore na boemo ke bofe, ikemisetse ho ikitlaelletsa ho ithuta, ho bolela, le ho bontša lerato ho barab’eno. Amohela keletso efe kapa efe le taeo tseo u li fuoang ke ba hōlileng tsebong. (Liproverbia 8:33) Jara boikarabelo ba hao bo feletseng ba Bokreste. Ha nako e ntse e feta le ka boiteko, le uena u ka ‘fihlela bonngoe tumelong le tsebong e nepahetseng ea Mora oa Molimo, ho isa ho monna ea hōlileng ka ho feletseng, ho isa tekanyong ea boholo boo e leng ba botlalo ba Kreste.’—Baefese 4:13.

[Ntlha e Qolotsoeng e leqepheng la 27]

Bakreste ba hōlileng ka ho feletseng ba tlatsetsa botsitsong ba phutheho. Ba ba le tšusumetso e ntle tšekamelong ea eona, kapa boikutlong bo e laolang

[Litšoantšo tse leqepheng la 29]

Ba hōlileng tsebong ba tlatsetsa moeeng oa phutheho ka ho thahasella ba bang