Sebaka sa ho Ipatela Moea

HOLIMO lithabeng tsa Europe, ke moo u tla fumana teng ho hōla lihlahla tse tseparelang ka thata tse bitsoang rosa ea thaba. Hangata lihlahla tsena lia teteana e le hore li ka itšireletsa moeeng o batang oa libaka tsena tse phahameng. Moea o sa khaotseng o sokela boteng ba limela tsa thaba ka ho li hatsetsa, ka ho monya mongobo moeeng le mobung le ka ho li fothola.

Hangata lirosa tsena tsa thaba li phonyoha meea ena e senyang ka hore li mele mapetsong a majoe. Le hoja ho se na mobu o mongata libakeng tsena, mapetso ana a majoe ke sebaka sa ho ipatela moea ’me a nolofalletsa limela tsena ho boloka metsi. Le hoja li sa bonahale hoo e ka bang karolong e khōlō ea selemo, lehlabula lirosa tsena tsa thaba li khabisa lithaba tseo li ipatang ho tsona ka lipalesa tse bofubelu bo khanyang.

Moprofeta Esaia o ile a bolela hore Molimo o ne a tla khetha “likhosana,” ’me e ’ngoe le e ’ngoe e ne e tla ba joaloka “sebaka sa ho ipatela moea.” (Esaia 32:1, 2) Ka tlas’a tataiso ea Morena, Kreste Jesu, likhosana tsena tsa moea, kapa balebeli, ba ne ba tla tšoana le majoe a sa sisinyeheng a lulang a tiile linakong tsa khatello kapa tsa tlhokofatso. Ba ne ba tla fana ka tšireletso e tšepahalang nakong ea mahlomola le ho thusa ba hlokang hore ba sireletse polokelo ea bona ea metsi a moea a tsoang Lentsoeng la Molimo.

Haeba Mokreste a sa sireletseha, lifefo tsa mahloriso, tsa ho tepella kapa tsa bokuli li ka mo pepetla, tsa mo etsa hore a ome tumelong. Baholo ba Bakreste ba ka fana ka thuso ka hore ba mamelisise bothata ba hae ka hloko, ba fana ka keletso e thehiloeng Bibeleng, ba khothatsa le ho fana ka thuso e sebetsang. Joaloka Morena oa bona ea khethiloeng, Kreste Jesu, ba batla ho thusa “ba qhalakaneng.” (Matheu 9:36) ’Me ba rata ho thusa ba bang ba lemalitsoeng ke lifefo tsa borapeli ba bohata. (Baefese 4:14) Thuso e joalo ka nako e loketseng e ka ba bohlokoa haholo.

Miriam o re: “Ke ile ka ferekana haholo bophelong ha metsoalle ea ka e tlohela phutheho, ’me ka nako e tšoanang, Ntate a tšoaroa ke lefu la mali a tšolohelang bokong. Ke ile ka leka ho hlōla ho tepella ka ho ratana le mohlankana oa lefatše. Kapele ka mor’a moo, ha ke se ke ikutloa ke sa tšoanelehe, ke ile ka tsebisa baholo ba phutheho hore ke entse qeto ea ho tlohela ’nete, hobane ke ne ke kholisehile hore Jehova ha a sa nthata.

“Nakong ena e sithabetsang, moholo e mong ea qenehelang o ile a nkhopotsa lilemo tseo ke ileng ka sebeletsa ke le pula-maliboho oa kamehla ka tsona. O ile a mpolella hore kamehla o ne a khahloa ke botšepehi ba ka, ’me ka mosa a nkōpa hore ke lumelle baholo ho nthusa, ho nkholisa hore Jehova oa nthata. Ho ’na, thahasello ea bona e lerato nakong eo e thata ka ho fetisisa e ne e le joaloka ‘sebaka sa ho ipata’ nakong ea sefefo seo se neng se mpota-potile. Pele ho feta khoeli, ke ile ka khaotsa botsoalle ba ka le mohlankana oa ka, ’me ke ’nile ka tsamaea tseleng ea ’nete ho tloha ka nako eo ho ea pele.”

Ka lebaka la tšireletso eo ba fanang ka eona ka nako e tšoanetseng, baholo baa hlasimoloha ha ba bona Bakreste-’moho le bona ba atleha moeeng. ’Me ‘libaka tsena tsa ho ipata’ li etsa hore re latsoe esale pele thuso e ngata ea moea eo re tla e thabela ka nako ea Puso ea Kreste ea Lilemo tse Sekete.