Baboleli ba ’Muso Baa Tlaleha

Lentsoe la Molimo le Fana ka Matla’

SEHLEKEHLEKENG se futhumetseng sa Caribbean sa Jamaica, batho ba bangata ba tseba Bibele. Ha e le hantle, King James Version e fumaneha hoo e batlang e le malapeng ’ohle, ’me batho ba bang ba hlokometse hore “lentsoe la Molimo lea phela ’me le fana ka matla.” (Baheberu 4:12) Matla ana a ka fetola bophelo ba batho, ’me mohlala oa sena ke phihlelo e latelang.

Monna ea bitsoang Cleveland o ne a sa tsoa fihla lapeng a tsoa mosebetsing ha a eteloa ke e mong oa Lipaki tsa Jehova. Ha Paki e qeta ho mo bolella tse ling tsa lintlha tse tsoang Mangolong, e ile ea mo siela buka e thusang ho ithuta Bibele e bitsoang Tsebo e Isang Bophelong bo sa Feleng. Cleveland o ne a sa tsebe hore Lentsoe la Molimo le ne le tla fana ka matla bophelong ba hae.

Cleveland o ne a tloaetse ho rapela hararo ka letsatsi, a kōpa Molimo hore a mo thuse hore a fumane tsela e nepahetseng ea ho Mo rapela. Cleveland o ne a kholisehile hore batsoali ba hae ba ne ba sa rapele ka tsela e nepahetseng, empa ka mor’a ho hlahloba malumeli a mang, o ile a nyahama. Le hoja a ne a utloetse ka Lipaki tsa Jehova, o ne a belaela hore e hlile li na le ’nete. Ho sa tsotellehe lipelaelo tseo a nang le tsona, Cleveland o ile a lumela ho ithuta Bibele le Paki e neng e mo etetse. Hobane’ng? Hobane o ne a batla ho bontša Lipaki hore li fositse!

Kapele Cleveland o ile a ithuta hore boitšoaro bo bobe boo a neng a bo etsa le basali ba babeli bo ne bo sa thabise Molimo. (1 Bakorinthe 6:9, 10) Ka mor’a ho ithuta makhetlo a mabeli feela, o ile a iteta sebete ho khaotsa setsoalle sa hae le basali bao. Hape o ile a qala ho ba teng libokeng tsa Bokreste Holong ea ’Muso. Empa sena se ile sa hlahisa teko e ’ngoe hape.Cleveland o ne a ikakhetse ka setōtsoana sehlopheng sa bolo ea maoto motseng oa habo, ’me lipapali tsa sona li ne li sitisana le ho ba teng ha hae libokeng. O ne a tla etsa joang? Ho sa tsotellehe khatello e matla ea bao a leng sehlopheng sa bolo ea maoto le bona, mokoetlisi le metsoalle, Cleveland o ile a etsa qeto ea ho tlohela sehlopha seo sa bolo ea maoto. E, Lentsoe la Molimo le ne le qala ho fana ka matla, le mo susumetsa ka tsela e mo tsoelang molemo!Matla a Lentsoe la Molimo a ile a boela a bonahala ha Cleveland a qala ho abela ba bang tsebo eo a nang le eona ea Bibele. (Liketso 1:8) Ka lebaka la sena, ba babeli bao pele a neng a le sehlopheng sa bolo ea maoto le bona ba ile ba qala ho kopanela libokeng tsa Lipaki tsa Jehova. Ka mor’a hore Cleveland a tšoanelehele ho ba mohoeletsi oa litaba tse molemo, o ile a fumana thabo e khōlō tšebeletsong, a sebelisa Lentsoe la Molimo ho thusa ba bang.

Cleveland o ile a tsoela pele ho susumetsoa ke matla a Lentsoe la Molimo, ’me qetellong o ile a tšoantšetsa boinehelo ba hae ho Jehova ka kolobetso ea metsing ’me o fumane tokelo ea ho sebeletsa e le mosebeletsi oa nako e tletseng le mohlanka ea sebeletsang ka phuthehong.

Jamaica le lefatšeng ka bophara, batho ba likete ba ithutile hore ka sebele Lentsoe la Molimo “lea phela ’me le fana ka matla.”

[’Mapa/Setšoantšo se leqepheng la 8]

JAMAICA

[Tlhaloso ea Moo Setšoantšo se Nkiloeng Teng]

Map and globe: Mountain High Maps® Copyright © 1997 Digital Wisdom, Inc.