Bofutsana—Ho Fumana Tharollo e sa Feleng

HO SA tsotellehe litlaleho tse nyahamisang tse tsoang lefatšeng ka bophara tsa bofutsana, ho na le ba ntseng ba e-na le tšepo ea hore ho na le ntho e bonahalang e ka etsoang. Ka mohlala, ho latela sehlooho sa litaba koranteng ea Manila Bulletin, Banka ea Ntlafatso ea Asia e ile ea tlaleha hore “ho ka nka lilemo tse 25 hore Asia e felise bofutsana.” Banka ena e ile ea buella ho hōlisoa ha moruo e le tsela ea ho ntša batho bofutsaneng bo tebileng.

Mekhatlo e meng hammoho le mebuso e fane ka lethathamo le lelelele la litlhahiso le maano a ho leka ho rarolla bothata bona. A mang a ’ona ke: mananeo a inshorense ea sechaba, ho ntlafatsoa ha thuto, ho hlakoloa ha likoloto tseo linaha tse tsoelang pele moruong li nang le tsona linaheng tse tsoetseng pele moruong, ho tlosoa ha lithibelo thepeng e kenang e le hore linaha tse nang le batho ba bangata ba futsanehileng li ka rekisa lihlahisoa tsa tsona habonolo, le ho hahela mafutsana matlo a batho ba fumanang meputso e tlaase.

Ka selemo sa 2000, Seboka se Akaretsang sa Machaba a Kopaneng se ile sa beha lipakane tse lokelang ho finyelloa ka selemo sa 2015. Tse ling tsa tsona e ne e le ho felisa bofutsana bo feteletseng le tlala esita le ho se lekane ho hoholo ha chelete e fumanoang ke batho naheng ka ’ngoe.  Ho sa tsotellehe hore na lipakane tsena li babatseha hakae, ba bangata ha ba lumele hore li ka finyelloa lefatšeng lena le hlokang bonngoe.

Mehato e Sebetsang ea ho Loantša Bofutsana

Kaha ha ho bonahale ho e-na le tšepo ea hore ho ka ba le khatelo-pele ea sebele lefatšeng lohle, motho a ka batla thuso hokae? Joalokaha ho boletsoe pele, ho na le mohloli oa bohlale bo sebetsang o ka thusang batho hona joale. Ke ofe? Ke Lentsoe la Molimo, Bibele.

Ke eng se etsang hore Bibele e fapane le mehloli e meng eohle ea boitsebiso? E tsoa ho molaoli ea phahameng ka ho fetisisa, e leng ’Mōpi oa rōna. Ka har’a eona o kentse boitsebiso ba bohlokoa ka ho fetisisa bo fanang ka bohlale—melao-motheo e sebetsang e ka sebelisoang ke batho bohle, libakeng tsohle esita le ka linako tsohle. Haeba melao-motheo ena e sebelisoa, e ka thusa mafutsana hore a phele bophelo bo khotsofatsang haholoanyane esita le hona joale. A re shebeng mehlala e seng mekae.

Talima chelete ka tsela e loketseng. Bibele e re: “Bohlale ke tšireletso joalokaha chelete e le tšireletso; empa molemo oa tsebo ke hore bohlale bo boloka ba nang le bona ba phela.” (Moeklesia 7:12) See se bolela’ng? Se bolela hore chelete hase makhona-tsohle. Ke ’nete hore e fana ka tšireletso e itseng. E re nolofalletsa hore re reke lintho tse itseng tseo re li hlokang, empa e na le meeli. Ho na le lintho tsa bohlokoa haholoanyane tse ke keng tsa rekoa ka chelete. Ho ela ntlha ena hloko ho tla re thusa hore re talime lintho tse bonahalang ka tsela e loketseng, ’me re qobe ho ferekana ha batho bao bophelo ba bona bo itšetlehileng ka ho bokella chelete. Chelete e ke ke ea reka bophelo, empa ho etsa lintho ka bohlale ho ka sireletsa bophelo hona joale esita le ho fana ka monyetla oa bophelo bo sa feleng.

Phela ka seo u nang le sona. Hase kamehla lintho tseo re li batlang e leng lintho tseo re li hlokang. Re lokela ho ameha pele ka lintho tseo re li hlokang. Re ka ikholisa habonolo hore re hloka se itseng, empa e le hore ha e le hantle ke seo re se batlang eseng se hlokahalang. Motho ea bohlale o tla qala ka ho sebelisa chelete eo a e fumaneng bakeng sa lintho tse hlokahalang ka eona nako eo—e leng lijo, liaparo, bolulo le lintho tse ling. Joale, pele a reka lintho leha e le life tse eketsehileng, o tla sheba hore na chelete e setseng e tla lekana. Ho e ’ngoe ea lipapiso tsa hae, Jesu o ile a khothalletsa hore motho a ‘lule fatše pele ’me a bale litšenyehelo, ho bona haeba a e-na le ho lekaneng.’—Luka 14:28.

Philippines, Eufrosina, eo e leng motsoali ea se nang molekane, ea nang le bana ba bararo, o ile a tobana le bothata ba ho phelisa lelapa le ho itlama mala masesaane ka lebaka la hore o ne a e-na le chelete e fokolang ka mor’a hore monna oa hae a mo lahle lilemong tse ’maloa tse fetileng. Ka nako e tšoanang, o koetlisitse bana ba hae hore ba hlokomele hore na ke lintho life tse lokelang ho rekoa pele. Ka mohlala, ho ka etsahala hore bana ba bone ntho eo ba e ratang. Ho e-na le ho hana ho ba rekela eona, o behelana mabaka le bona ka ho re: “Ho lokile, nka u rekela ntho ena ha u e batla, empa u tlameha ho khetha. Re na le chelete e lekaneng ho reka ntho e le ’ngoe feela. Re ka reka ntho ena eo u e ratang, kapa ra reka namanyana kapa meroho tseo re tla jelella raese ka tsona bekeng ena. Kahoo, u khetha hofe? Ho itsoela ho uena.” Bana ba atisa ho lemoha ka potlako seo a lekang ho ba bontša sona ebe baa lumela hore ba ka mpa ba khetha lijo ho e-na le ntho e ’ngoe.

Khotsofala. Molao-motheo o mong oa Bibele o re: “Ha re e-na le lintho tsa ho iphelisa le liaparo le tšireletso, re tla li khotsofalla.” (1 Timothea 6:8) Chelete ka boeona ha e tlise thabo. Barui ba  bangata ha baa thaba, empa mafutsana a mangata a thabile haholo. Mafutsana ana a ithutile ho khotsofalla lintho tsa motheo feela tse hlokahalang bophelong. Jesu o ile a bua ka ho ba le ‘leihlo le talimileng nģa e le ’ngoe’ le tsepameng linthong tsa bohlokoa haholoanyane. (Matheu 6:22) Sena se thusa motho hore a khotsofale. Mafutsana a mangata a ikutloa a khotsofetse haholo kahobane a hlaoletse ho ba le kamano e ntle le Molimo ’me a na le malapa a thabileng—e leng lintho tse ke keng tsa rekoa ka chelete.

Ena ke mehlala e seng mekae feela ea likeletso tsa Bibele tse sebetsang tse ka thusang ba futsanehileng hore ba tobane ka katleho le boemo boo ba leng ho bona. Ho na le e meng e mengata. Ka mohlala, qoba mekhoa e mebe e kang ho tsuba le ho becha, e senyang chelete; lemoha lintho tsa bohlokoa haholoanyane bophelong, haholo-holo lipakane tsa moea; moo ho leng thata ho fumana mosebetsi, leka ho etsa lintho kapa mosebetsi oo ba bang ba o hlokang. (Liproverbia 22:29; 23:21; Bafilipi 1:9-11) Bibele e khothalletsa hore ho sebelisoe “bohlale [bo joalo] bo sebetsang le matla a ho nahana” hobane “e tla ba bophelo moeeng oa hao le mokhabiso molaleng oa hao.”—Liproverbia 3:21, 22.

Le hoja likeletso tsa Bibele li ka imolla ba loanang le bofutsana, ho ntse ho sala lipotso tse itseng ka bokamoso. Na mafutsana a tla lula e le mafutsana ka ho sa feleng? Na ho se lekane pakeng tsa batho ba ruileng ka ho fetisisa le ba futsanehileng ka ho fetisisa ho tla ke ho lokisoe? A re ke re hlahlobeng tharollo eo ba bangata ba sa e lemoheng.

Bibele e Fana ka Lebaka la ho ba le Tšepo

Ba bangata baa lumela hore Bibele ke buka e molemo. Leha ho le joalo, hangata ha ba hlokomele hore e fana ka boitsebiso bo tobileng bo buang ka liphetoho tse khōlō tse tla etsahala haufinyane.

Molimo o rerile ho nka khato ho rarolla mathata a batho, ho akarelletsa bofutsana. Kaha ho totobetse hore mebuso ea batho e hlōlehile ho a rarolla kapa ha ea ikemisetsa ho etsa joalo, Molimo o rerile ho e nkela sebaka. Joang? Ho Daniele 2:44 Bibele e bolela e sa qeaqee, e re: “Molimo oa leholimo o tla emisa ’muso o ke keng oa senngoa le ka mohla. ’Muso oo o ke ke oa fetisetsoa ho batho leha e le bafe ba bang. O tla silakanya o felise mebuso ena kaofela, ’me o tla ema ho isa linakong tse sa lekanyetsoang.”

Ha ’Musi enoa ea khethiloeng ke Molimo a se a tlositse “mebuso” ena, o tla nka khato. ’Musi eo hase motho oa nama empa ke motho ea matla oa leholimo ea joaloka Molimo ka boeena, ea ka khonang ho etsa liphetoho tse khōlō tse hlokahalang bakeng sa ho felisa ho se lekane ho leng teng kajeno. Molimo o khethile Mora oa hae hore a etse sena. (Liketso 17:31) Pesaleme ea 72:12-14 e hlalosa seo ’Musi enoa a tla se etsa, ha e re: “O tla lopolla ea futsanehileng ea hoeletsang ho kōpa thuso, le ea hlorileng le mang kapa mang ea se nang mothusi. O tla utloela ea tlaase bohloko le ea futsanehileng, o tla pholosa meea ea ba futsanehileng. O tla lopolla meea ea bona khatellong le pefong, mali a bona e tla ba a bohlokoa mahlong a hae.” Ke tebello e babatsehang hakaakang! Qetellong batho ba tla imoloha! ’Musi ea khethiloeng ke Molimo  o tla thusa mafutsana le ba tlaase.

Mathata a mangata haholo a bakoang ke bofutsana a tla rarolloa ka nako eo. Temana ea 16 ho Pesaleme ea 72 e re: “Ho tla ba le lijo-thollo tse ngata lefatšeng; ho tla ba le nala holim’a litlhōrō tsa lithaba.” Ho ke ke ha hlola ho e-ba le khaello ea lijo e bakoang ke tlala ea sekoboto, ho hloka chelete, kapa botsamaisi bo sa lokang.

Mathata a mang le ’ona a tla rarolloa. Ka mohlala, kajeno karolo e khōlō ea baahi ba lefatše ha e na mahae. Leha ho le joalo, Molimo oa tšepisa, o re: “Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je. Etsoe matsatsi a sechaba sa ka a tla ba joaloka matsatsi a sefate; ’me bakhethoa ba ka ba tla sebelisa mosebetsi oa matsoho a bona ka botlalo.” (Esaia 65:21, 22) E mong le e mong o tla ba le lehae ’me a thabele mosebetsi oo a o etsang. Kahoo, Molimo o tšepisa hore o tla rarolla mathata a bofutsana ka ho feletseng le ka ho sa feleng. Ho ke ke ha hlola ho e-ba le lekhalo le leholo pakeng tsa barui le mafutsana, ho ke ke ha hlola ho e-ba le batho ba kollang ntsi hanong.

Ha motho a qala ho utloa litšepiso tsena tsa Bibele, a ka ’na a nka hore li ke ke tsa etsahala. Leha ho le joalo, ho hlahloba Bibele ka hloko haholoanyane ho bontša hore litšepiso tsohle tsa Molimo tsa nakong e fetileng li phethahetse. (Esaia 55:11) Kahoo, taba hase hore na ebe li tla phethahala. Ho e-na le hoo, potso ea sebele ke hore, U lokela ho etsa eng e le hore u tle u rue molemo ha li phethahala?

Na U Tla ba Teng?

Kaha ’muso ona ke oa Molimo, re lokela ho ba batho ba mofuta oo Molimo a tlang ho ba amohela hore e be bafo ba ’muso oo. Ha aa re tlohela re sa tsebe hore na re ka etsa eng hore re tšoanelehe. Lintho tseo ho hlokahalang hore re li etse li boletsoe ka Bibeleng.

’Musi eo ea khethiloeng, e leng Mora oa Molimo, o lokile. (Esaia 11:3-5) Kahoo, ba lumelloang ho phela tlas’a ’muso ona le bona ho tla lebelloa hore e be ba lokileng. Liproverbia 2:21, 22 e re: “Ba lokileng ke bona ba tla lula lefatšeng, ’me ba sa tšoauoeng phoso ke bona ba tla sala ho lona. Ha e le ba khopo, ba tla felisoa lefatšeng; ha e le ba bolotsana, ba tla tlosoa ho lona.”

Na ho na le tsela ea ho ithuta hore na re ka finyella joang lintho tsee tseo ho hlokahalang hore re li etse? E, e teng. Ka ho ithuta Bibele le ka ho sebelisa tataiso ea eona, u tla khona ho fumana bokamoso bona bo babatsehang. (Johanne 17:3) Lipaki Tsa Jehova li tla thabela ho u thusa hore u ithute eona. Re u mema hore u sebelise monyetla ona oa hore u be har’a batho bao ho seng mohla ba tla futsaneha le ho tšoaroa ka leeme.

[Setšoantšo se leqepheng la 5]

Eufrosina: “Ho itlama mala masesaane ka lebaka la ho ba le chelete e fokolang ho thusa lelapa la ka hore le be le seo le se hlokang”

[Litšoantšo tse leqepheng la 6]

Kamano e ntle le Molimo le bophelo bo thabileng ba lelapa li ke ke tsa rekoa ka chelete