“Le Amohetse Ntle ho Tefo, le Fane Ntle ho Tefo”

“LE AMOHETSE ntle ho tefo, le fane ntle ho tefo.” (Matheu 10:8) Jesu o ile a fa baapostola ba hae taelo eo ha a ne a ba roma ho ea bolela litaba tse molemo. Na baapostola ba ile ba mamela taelo eo? Ba ile ba e mamela ’me ba tsoela pele ho e mamela esita le ha Jesu a se a tlohile lefatšeng.

Ka mohlala, ha Simone eo e neng e kile ea e-ba moloi a bona matla ao moapostola Petrose le moapostola Johanne ba nang le ’ona a ho etsa mehlolo, o ile a batla ho ba lefa e le hore ba mo fe matla ao. Empa Petrose a khalemela Simone, a re: “E se eka silevera ea hao e ka timela le uena, hobane u nahanne ho rua mpho e sa lefelloeng ea Molimo ka chelete.”—Liketso 8:18-20.

Moapostola Pauluse o ile a bonahatsa boikutlo bo kang ba Petrose. Pauluse o ne a ka ’na a itumella ho ba moroalo oa lichelete ho barab’abo ba Bakreste ba Korinthe. Leha ho le joalo, o ile a iphelisa ka ho itšebeletsa ka matsoho. (Liketso 18:1-3) Kahoo, o ne a ka re ka kholiseho o boleletse Bakorinthe litaba tse molemo “ntle ho tefo.”—1 Bakorinthe 4:12; 9:18.

Ka masoabi, ba bangata ba ipolelang hore ke balateli ba Kreste ha ho bonahale eka bona ba ikemiselitse ho ‘fana ntle ho tefo.’ Ha e le hantle, baeta-pele ba bangata ba bolumeli Bokreste-’mōtoaneng “ba rupela feela bakeng sa tefo.” (Mikea 3:11) Baeta-pele ba bang ba bolumeli ba bile ba ruisitsoe ke chelete eo ba e bokeletseng mehlapeng ea bona. Ka 1989, moevangeli e mong oa United States o ile a ahloleloa ho hlola chankaneng lilemo tse 45. Lebaka e le eng? O ne a “etse batšehetsi ba hae ka liphalana ka lidolara tse limilione ’me a sebelisitse chelete e ’ngoe ho reka matlo, likoloi, ho ea libakeng tsa phomolo, esita le ho reka ntloana ea ntja e nang le sefehla-moea.”—People’s Daily Graphic, October 7, 1989.

Ho ea ka Ghanaian Times ea la 31 March, 1990, moprista e mong oa Roma e K’hatholike, Ghana, o ile a tjekeletsa phutheho ka chelete e bokeletsoeng nakong ea tšebeletso ea kereke. Koranta eo e re “lebaka la seo ke hobane ho ne ho lebeletsoe hore kaha ke batho ba baholo, ba ntše chelete e tomanyana.” Hase ho makatsang hore ebe likereke tse ngata li bile li leka ho khothalletsa litho tsa tsona ho ba meharo, li buella papali ea chelete le maqheka a mang bakeng sa ho bokella chelete.

Ka lehlakoreng le leng, Lipaki Tsa Jehova li ikitlaelletsa ho etsisa Jesu le barutuoa ba hae ba lekholong la pele la lilemo. Ha li na baruti ba lefuoang. Paki e ’ngoe le e ’ngoe ke mosebeletsi ea nang le boikarabelo ba ho bolella ba bang “litaba tsena tse molemo tsa ’muso.” (Matheu 24:14) Kahoo, tse fetang limilione tse tšeletseng lefatšeng ka bophara li kentse letsoho ho tlisetseng batho “metsi a bophelo” li sa ba lefise. (Tšenolo 22:17) Ka tsela ena, le ba “se nang chelete” ba ka rua molemo molaetseng oa Bibele. (Esaia 55:1) Le hoja mosebetsi oa tsona o etsoang lefatšeng ka bophara o tšehetsoa ka menehelo ea boithatelo, ha ho mohla li qelang lichelete. Kaha ke basebeletsi ba ’nete ba Molimo, ha ba “rekise lentsoe la Molimo,” empa ba bua “ka botšepehi, e, joaloka ba romiloeng ba tsoa ho Molimo.”—2 Bakorinthe 2:17.

 Empa ke hobane’ng ha Lipaki Tsa Jehova li ithaopela ho thusa ba bang, li etsa joalo ka litšenyehelo tsa tsona? Li susumetsoa ke eng? Na ho fana ntle ho tefo ho bolela ho fana motho a sa fumane moputso oa letho bakeng sa boiteko ba hae?

Karabo Qosong ea Satane

Ntho e ka sehloohong e susumetsang Bakreste ba ’nete kajeno ke takatso ea ho khahlisa Jehova—eseng ea ho ithuisa. Ka hona ba khona ho fana ka karabo qosong eo Satane Diabolose a e hlahisitseng lilemong tse makholo tse fetileng. Satane o ile a qosa Jehova ka monna e mong ea lokileng ea bitsoang Jobo, a botsa hore: “Na ke ha lefeela ha Jobo a tšaba Molimo?” Satane o ile a belaela ka hore Jobo o sebeletsa Molimo hobane feela A mo etselitse lekhoakhoa ho mo sireletsa. Satane o ile a pheha khang ea hore haeba Jobo a ne a ka amohuoa lintho tsa hae tse bonahalang, o ne a tla rohaka Molimo sefahla-mahlo!—Jobo 1:7-11.

E le hore Molimo a arabe qoso eo, o ile a lumella Satane hore a leke Jobo, a re: “Ntho e ’ngoe le e ’ngoe eo a nang le eona e letsohong la hao.” (Jobo 1:12) Ka phello efe? Jobo o ile a paka Satane e le ea leshano. Ho sa tsotellehe mahlomola a ileng a mo tlela, Jobo o ile a lula a tšepahala. O ile a re: “Nke ke ka tlosa botšepehi ba ka ho ’na ho fihlela ke shoa!”—Jobo 27:5, 6.

Barapeli ba ’nete kajeno ba bontša boikutlo bo kang ba Jobo. Ha ba sebeletse Molimo hobane ba amehile ka lintho tse bonahalang.

Mpho ea Molimo e sa Lefelloeng ea Mosa o sa Tšoanelang

Lebaka le leng leo ka lona Bakreste ba ’nete ba ithaopelang ho ‘fana ntle ho tefo’ ke hobane bona ka bobona ba “amohetse ntle ho tefo” ho Molimo. Moloko oa batho o botlamuoeng ba sebe le lefu ka lebaka la sebe sa moholo-holo oa rōna Adama. (Baroma 5:12) Ka lerato, Jehova o ile a lokisetsa hore Mora oa hae a shoe lefu la sehlabelo—leo e bileng tahlehelo e khōlō ho Molimo. Ka sebele moloko oa batho ha o tšoaneloe ke sena. Ho e-na le hoo, ke mpho e tsoang ho Molimo.—Baroma 4:4; 5:8; 6:23.

Ke kahoo, joalokaha ho tlalehiloe ho Baroma 3:23, 24, Pauluse a ileng a re ho Bakreste ba tlotsitsoeng: “Bohle ba entse sebe ’me ba haelloa ke khanya ea Molimo, ’me ho joaloka mpho e sa lefelloeng hore ebe ka mosa oa hae o sa tšoanelang ho ntse ho boleloa hore ba lokile ka tokollo e tlisitsoeng ke thekollo e lefiloeng ke Kreste Jesu.” Ba nang le tšepo ea ho phela lefatšeng ka ho sa feleng le bona ba amohela “mpho e sa lefelloeng.” Mpho ena e akarelletsa tokelo ea ho boleloa ba lokile e le metsoalle ea Jehova.—Jakobo 2:23; Tšenolo 7:14.

Sehlabelo sa Kreste sa thekollo se boetse se nolofalletsa Bakreste bohle hore e be basebeletsi ba Molimo. Moapostola Pauluse o ile a ngola, a re: “Ke bile mosebeletsi oa [sephiri sena se halalelang] ho ea ka mpho e sa lefelloeng ea mosa o sa tšoanelang oa Molimo.” (Baefese 3:4-7) Kaha ba bitselitsoe tšebeletsong ena ka neo e neng e sa ba tšoanele kapa eo ba neng ba ke ke ba e fumana, basebeletsi ba ’nete ba Molimo ha baa lebella moputso oa lintho tse bonahalang ha ba bolella ba bang ka tokisetso ena.

 Bophelo bo sa Feleng—Na bo Khothalletsa Boithati?

Na see se bolela hore Molimo o lebeletse hore Bakreste ba mo sebeletse ba se na tšepo ea moputso? Che, etsoe moapostola Pauluse o ile a re ho balumeli-’moho le eena: “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae.” (Baheberu 6:10) Hape Jehova ha a leeme. (Deuteronoma 32:4) Ho e-na le hoo, Jehova ke “moputsi oa ba mo batlang ka tieo.” (Baheberu 11:6) Empa na tšepiso ea bophelo bo sa feleng Paradeiseng ha e khothalletse boithati?—Luka 23:43.

Le hanyenyane. Taba ke hore takatso ea ho phela ka ho sa feleng lefatšeng la Paradeise e simoloha ho Molimo. Ke eena ea fileng banyalani ba pele ba batho monyetla ona. (Genese 1:28; 2:15-17) Ha Adama le Eva ba lahla monyetla ona bakeng sa bana ba bona, Molimo o ile a etsa hore ho khonehe ho o tsosolosa. Ke kahoo Molimo ka Lentsoeng la hae a tšepisang hore “pōpo le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.” (Baroma 8:21) Ka hona kajeno ho loketse hore Bakreste ba etsise Moshe oa boholo-holo, ba talime “ka hloko tefong ea moputso.” (Baheberu 11:26) Molimo ha a fane ka moputso ona e le tjotjo. O fana ka oona hobane a e-na le lerato la sebele ho ba mo sebeletsang. (2 Bathesalonika 2:16, 17) Ka hona, “rea rata, hobane o ile a re rata pele.”—1 Johanne 4:19.

Lebaka le Loketseng la ho Sebeletsa Molimo

Leha ho le joalo, Bakreste kajeno ba lokela ho lula ba hlahloba mabaka ao ba sebeletsang Molimo ka ’ona. Ho Johanne 6:10-13, re bala hore Jesu o ile a fepa ka mohlolo letšoele la batho ba fetang likete tse hlano. Ka mor’a moo, ba bang ba ile ba qala ho latela Jesu e le feela ka sepheo sa boithati. Jesu o ile a re ho bona: “Le mpatla kahobane le jele mahobe ’me la khora.” (Johanne 6:26) Lilemo tse mashome hamorao Bakreste ba bang ba inehetseng le bona ba ile ba sebeletsa Molimo empa “eseng ka boikutlo bo hloekileng.” (Bafilipi 1:17) Ba bang ba neng ba sa ‘lumellane le mantsoe a phelisang hantle a Jesu Kreste’ ba ne ba bile ba batla mekhoa ea ho rua ka ho kopanela le Bakreste.—1 Timothea 6:3-5.

Kajeno, Mokreste ea tšebeletsong hobane feela a batla ho phela ka ho sa feleng Paradeiseng e ka ’na eaba le eena o sebeletsa ka sepheo sa boithati. Qetellong, sena se ka ’na sa fella ka ho oa moeeng. Kahobane ho bonahala eka tsamaiso ea Satane ea lintho e tšoarelletse ho feta kamoo a neng a lebeletse kateng, a ka ’na a ‘khathala,’ a nahana hore bofelo boa lieha. (Bagalata 6:9) A ka ba a ’na a hlonama ka lebaka la lintho tse bonahalang tseo a li tetseng. Jesu o re hopotsa sena: “U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.” (Matheu 22:37) E, motho eo sepheo sa hae se ka sehloohong sa ho sebeletsa Molimo e leng lerato ha a behele tšebeletso ea hae nako e itseng. O ikemisetsa ho sebeletsa Jehova ka ho sa feleng! (Mikea 4:5) Ha a ikoahlaee ka letho leo a le tetseng e le hore a sebeletse Molimo. (Baheberu 13:15, 16) Ho rata Molimo ho mo susumelletsa ho etelletsa lithahasello tsa Molimo pele bophelong ba hae.—Matheu 6:33.

Kajeno, barapeli ba ’nete ba fetang limilione tse tšeletseng ba “itlhahisa ka ho rata” tšebeletsong ea Jehova. (Pesaleme ea 110:3) Na u e mong oa bona? Haeba ha u e mong oa bona, ak’u nahanisise ka seo Molimo a fanang ka sona: tsebo e nepahetseng ea ’nete; (Johanne 17:3) ho lokoloha botlamuoeng ba lithuto tsa bolumeli ba bohata; (Johanne 8:32) tšepo ea bophelo bo sa feleng. (Tšenolo 21:3, 4) Lipaki Tsa Jehova li ka u thusa hore u ithute kamoo u ka amohelang tsena tsohle ho Molimo kateng—ntle ho tefo.

[Ntlha e Qolotsoeng e leqepheng la 22]

Ntho e ka sehloohong e susumetsang Bakreste ba ’nete kajeno ke takatso ea ho khahlisa Jehova—eseng ea ho ithuisa

[Setšoantšo se leqepheng la 21]

Mpho ea Molimo e sa lefelloeng ea thekollo e susumelletsa Bakreste ho bolella ba bang litaba tse molemo ntle ho tefo