Baboleli ba ’Muso Baa Tlaleha

Liphello Tse Thabisang Tsa ho se Fele Pelo le ho Qophella

JESU KRESTE o ile a bolela esale pele hore matsatsing a ho qetela “lerato la ba bangata [le ne] le tla fola.” Ke ka lebaka leo likarolong tse ngata tsa lefatše kajeno, ka kakaretso batho ba sa thahaselleng litaba tse molemo tsa ’Muso. Ba bang ba bile ba khesa bolumeli.—Matheu 24:12, 14.

Leha ho le joalo, ka tumelo le ho se fele pelo, bahoeletsi ba ’Muso ba hlōla bothata bona joalokaha phihlelo e latelang e tsoang Czech Republic e bontša.

Lipaki tse peli li ile tsa buisana le mofumahali e mong ea neng a bua le tsona a ntse a le ka tlung, a sa bula lemati. Ka mor’a nako e itseng, o ile a bula lemati hanyenyane, a hlahisa letsoho ’me a nanabela limakasine tsa Molula-Qhooa le Tsoha! tseo Lipaki li neng li mo fa tsona. O ile a re “kea leboha,” eaba o koala lemati. Lipaki tseo li ile tsa ipotsa, “Ebe re ka khutla?” Eaba e ’ngoe, eo e neng e le pula-maliboho, kapa mosebeletsi oa nako e tletseng, e etsa qeto ea ho khutla, empa ho ile ha etsahala ntho e tšoanang, ’me sena se ile sa etsahala ka nako e etsang selemo.

Ka mor’a hore pula-maliboho enoa a etse qeto ea hore o lokela ho bua le eena ka tsela e fapaneng, o ile a rapella thuso ea Jehova. Lekhetlong le hlahlamang ha a buella limakasine ho mosali enoa, o ile a mo botsa lipotso tse bontšang botsoalle, a re: “U phela joang? Na u thabetse ho bala limakasine?” Qalong, ho ne ho se nko ho tsoa lemina, empa ka mor’a ho mo etela ka makhetlo a ’maloa, mosali enoa o ile a qala ho ba le botsoalle haholoanyane. Ka lekhetlo le leng o ile a bula lemati haholo, le hoja ba sa ka ba buisana ka nako e telele.

Kahobane mosali enoa o ne a le leqe ho buisana le eena monyako, pula-maliboho o ile a etsa qeto ea ho mo ngolla lengolo ho hlalosa lebaka leo a neng a mo etela ka lona ’me a ithaopela ho mo khannela thuto ea lehae ea Bibele. Qetellong, ka mor’a hore a lule a ntse a leka a sa fele pelo ka nako e etsang selemo le likhoeli tse tšeletseng, pula-maliboho o ile a atleha ho qala thuto ea Bibele le mosali enoa. O ile a makala a ba a khothala hamorao ha mosali enoa a re ho eena: “Ke qalile ho lumela ho Molimo ho tloha ha u qala ho ntlisetsa limakasine.”

Ka sebele, ho se fele pelo le ho qophella li ka tlisa liphello tse thabisang mosebetsing oa ho bolela ka ’Muso le ho etsa barutuoa.—Matheu 28:19, 20.