‘Le Batle ea Tšoanelehang’

DAMASEKA e ne e le motse o ruileng lekholong la pele la Mehla ea rōna e Tloaelehileng. Damaseka e neng e pota-potiloe ke lirapa tsa lifate, e ne e tšoana le makhulo a matala ho lihlopha tsa batsamai ba tsoang linaheng tse ka bochabela. Nakoana ka mor’a lefu la Jesu Kreste, ho ile ha e-ba le phutheho ea Bokreste Damaseka. Litho tse ling tsa eona e ne e le Bajuda bao mohlomong e bileng balateli ba Jesu ho tloha ka Mokete oa Pentekonta o neng o tšoaretsoe Jerusalema ka 33 C.E. (Liketso 2:5, 41) E ka ’na eaba barutuoa ba bang ba neng ba hlaha Judea ba ile ba ea Damaseka ha ho hlaha mahloriso ka mor’a hore Setefane a tlepetsoe ka majoe.—Liketso 8:1.

Mohlomong ka 34 C.E., Mokreste ea tsoang Damaseka ea bitsoang Ananiase o ile a fuoa kabelo e sa tloaelehang. Morena o ile a re ho eena: “Ema, u ee seterateng se bitsoang Se Otlolohileng, ’me ntlong ea Judase u batle monna ea bitsoang Saule, ea tsoang Tarsase. Etsoe, bona! oa rapela.”—Liketso 9:11.

Seterata se bitsoang Se Otlolohileng se ne se le bolelele ba k’hilomithara le halofo ’me se ne se parola Damaseka ka lehare. Ha re sheba setšoantšo sena se betliloeng sa lekholong la bo19 la lilemo, rea hlokomela hore na seterata seo se ne se shebahala joang mehleng ea khale. Ka lebaka la sebōpeho sa sona, e ka ’na eaba Ananiase o ile a tlameha ho batla ntlo ea Judase ka nakoana e itseng ho fihlela a e fumana. Leha ho le joalo, Ananiase o ile a e fumana, eaba leeto la hae le fella ka hore Saule ebe moapostola Pauluse, ’moleli ea chesehang oa litaba tse molemo.—Liketso 9:12-19.

Jesu o ne a romme barutuoa ba hae a bile a ba boleletse hore ba ‘batle ba neng ba tšoaneleha’ bakeng sa litaba tse molemo. (Matheu 10:11) Ho bonahala eka Ananiase o ile a hla a batla Saule. Joaloka Ananiase, Lipaki Tsa Jehova li thabela ho batla ba tšoanelehang, ’me lia thaba ha batho ba amohela litaba tse molemo tsa ’Muso. Ho ba fumana ho etsa hore boiteko bohle bo entsoeng ebe ba bohlokoa.—1 Bakorinthe 15:58.

[Setšoantšo se leqepheng la 32]

‘Seterata sa kajeno se bitsoang Se Otlolohileng’

[Tlhaloso ea Moo Setšoantšo se Nkiloeng Teng e leqepheng la 32]

From the book La Tierra Santa, Volume II, 1830