“Ha Baa ka ba Sekisetsa”

JESU KRESTE o ile a re ho barutuoa ba hae: “Ho thaba lōna ha batho ba le nyelisa ’me ba le hlorisa ’me ka leshano ba bua ntho ea mofuta o mong le o mong e khopo ka lōna ka lebaka la ka.” (Matheu 5:11) Kajeno Lipaki Tsa Jehova li thabile hobane, tumellanong le thuto ea Kreste le mohlala oa hae, li lula e “se karolo ea lefatše” ebile ha li jele paate ho hang lipolotiking ’me li tšepahala ho Molimo maemong a mefuta eohle.—Johanne 17:14; Matheu 4:8-10.

Mabapi le ho se sekisetse ha Lipaki Tsa Jehova tsa Soviet Union ea mehleng, ho akarelletsa le tsa Estonia, Toomas Paul, e leng setsebi sa thuto ea bolumeli sa Molutere ebile e le mofetoleli oa Bibele o ile a ngola tjena bukeng ea hae e bitsoang Kirik keset küla (Kereke e Bohareng ba Motse): “Ke batho ba ’maloa haholo ba ileng ba utloa ka se ileng sa etsahala hoseng ha la 1 April, 1951. Ho ne ho reriloe letšolo la ho felisa Lipaki Tsa Jehova le batšehetsi bohle ba tsona—batho ba 279 ba ile ba tšoaroa ’me ba isoa Siberia . . . Ba ile ba fuoa monyetla oa ho saena foromo e tšoanang e bontšang hore ba latola tumelo ea bona e le hore ba qobe ho isoa sebakeng se hōle kapa ho kenngoa chankaneng. . . . Ha ho baloa le ba neng ba tšoeroe pejana, ho ne ho tšoeroe batho ba 353, ba akarelletsang bonyane batho ba 171 ba neng ba e-ea liphuthehong tsa tsona feela. Ha baa ka ba sekisetsa—esita leha ba le Siberia. . . . Hase litho tse ngata tsa Kereke ea [Lutere ea Estonia] tse neng li e-na le tumelo e tšoanang le ea Lipaki Tsa Jehova.”

Lipaki Tsa Jehova lefatšeng ka bophara li tšepa Molimo hore a li thuse ho tšepahala ebile li mo mamela ho sa tsotellehe mahloriso. Li thabela ho tseba hore moputso oa ho tšepahala ha tsona o moholo.—Matheu 5:12.