Botšepehi ba Hao bo Thabisa Pelo ea Jehova
Botšepehi ba Hao bo Thabisa Pelo ea Jehova
“Mora oa ka, hlalefa ’me u thabise pelo ea ka, e le hore nka araba ea ’nyelisang.”—LIPROV. 27:11.
1, 2. (a) Buka ea Jobo e hlalosa qoso efe eo Satane a e entseng? (b) Ke eng e bontšang hore Satane o ile a tsoela pele ho nyelisa Jehova le ka mor’a nako eo Jobo a phetseng ka eona?
JEHOVA o ile a lumella Satane hore a leke botšepehi ba mohlanka oa Molimo ea tšepahalang Jobo. Ka lebaka leo, Jobo o ile a lahleheloa ke liphoofolo tsa hae, a shoeloa ke bana a ba a kula. Empa ha Satane a ne a belaella botšepehi ba Jobo, o ne a sa nahana ka Jobo feela. Satane o ile a re: “Letlalo bakeng sa letlalo, ’me motho o tla nehelana ka ntho e ’ngoe le e ’ngoe eo a nang le eona bakeng sa moea oa hae.” Pelaelo eo e ile ea hlahisa tseko e ileng ea akarelletsa le batho ba bang ’me e tsoetse pele ka nako e telele le ka mor’a lefu la Jobo.—Jobo 2:4.
2 Lilemo tse ka bang 600 ka mor’a hore Jobo a lekoe, Solomone o ile a bululeloa hore a ngole a re: “Mora oa ka, hlalefa ’me u thabise pelo ea ka, e le hore nka araba ea ’nyelisang.” (Liprov. 27:11) Ho hlakile hore ka nako eo Satane o ne a ntse a qholotsa Jehova. Ho feta moo, ponong eo moapostola Johanne a ileng a e bona, Satane o ile a bonoa a qosa bahlanka ba Molimo ka mor’a hore a ntšoe leholimong nakoana ka mor’a hore ho thehoe ’Muso oa Molimo ka 1914. Ka sebele esita le kajeno, ha matsatsi ana a ho qetela a tsamaiso ena e khopo a le haufi le ho fela, Satane o sa ntse a belaella botšepehi ba bahlanka ba Molimo!—Tšen. 12:10.
3. Ke lithuto life tsa bohlokoa tseo re ka ithutang tsona bukeng ea Jobo?
3 Kahoo, hlahloba lithuto tse tharo tsa bohlokoa tseo re ithutang tsona bukeng ea Jobo. Ea pele, liteko tsa Jobo li etsa hore re bone hore na ha e le hantle sera sa batho ke mang le hore na ke mang ea etsang hore batho ba Molimo ba hanyetsoe. Sera seo ke Satane Diabolose. Ea bobeli, ho sa tsotellehe hore na re tobana le liteko life, ha re e-na le kamano e haufi-ufi le Molimo re tla khona ho lula re tšepahala. Ea boraro, ha liteko li hlaha le ha re lekoa ka litsela tse itseng, Molimo o re thusa hore re li mamelle joalokaha a ile a thusa Jobo. Kajeno, Jehova o re thusa ka Lentsoe la hae, ka mokhatlo oa hae le ka moea oa hae o halalelang.
Lula U Hopola Sera sa Sebele
4. Ke mang ea lokelang ho behoa molato ka maemo a teng lefatšeng kajeno?
4 Batho ba bangata ha ba lumele hore Satane o teng. Kahoo, le hoja e ka ’na eaba ba tšosoa ke maemo a lefatše, ha ba lemohe hore a hlile a bakoa ke Satane Diabolose. ’Nete ke hore batho ke bona ba ikarabellang ka mahlomola a mangata a ba hlahelang. Batsoali ba rōna ba pele, e leng Adama le Eva, ba ile ba khetha hore ba se ke ba laoloa ke ’Mōpi oa bona. Kahoo, ho tloha ka nako eo, meloko e ileng ea latela e entse lintho ka booatla bo boholo. Leha ho le joalo, ke Diabolose ea ileng a qhekella Eva hore a fetohele Molimo. Ke eena ea thehileng tsamaiso ea lefatše eo a e laolang har’a moloko oa batho o sa phethahalang le o shoang. Kaha Satane ke “molimo oa tsamaiso ena ea lintho,” batho ba etsa lintho tse tšoanang le tseo a li etsang, e leng ho ikhohomosa, ho rata likhang, ho ba mona, meharo, ho qhekella le ho ba marabele. (2 Bakor. 4:4; 1 Tim. 2:14; 3:6; bala Jakobo 3:14, 15.) Lintho tsena li entse hore ho be le likhohlano tsa lipolotiki le tsa bolumeli, lehloeo, bobolu le ho rata likhang, e leng lintho tse ekelletsang batho mahlomola.
5. Re batla ho etsa’ng ka tsebo ea bohlokoa eo re nang le eona?
5 Rōna bahlanka ba Jehova, re na le tsebo ea bohlokoa hakaakang! Ka sebele, rea tseba hore na ke mang ea lokelang ho behoa molato ka maemo a lefatše a ntseng a mpefala. Ka lebaka leo, na ha re utloe re tlameha ho kopanela tšebeletsong ea tšimo e le hore re tsebise batho hore na sera sa sebele ke mang? Kahoo, na ha re thabele ho emela Molimo oa ’nete, Jehova, ’me re bolelle batho ba bang kamoo a tla felisa Satane le bomalimabe ba batho kateng?
6, 7. (a) Ke mang ea ikarabellang ka ho hlorisoa ha barapeli ba ’nete? (b) Re ka etsisa mohlala oa Elihu oa boholo-holo joang?
6 Satane o ikarabella ka mahlomola a mangata a teng lefatšeng le ka khanyetso eo batho ba Molimo ba thulanang le eona. O ikemiselitse ho re leka. Jesu Kreste o ile a re ho moapostola Petrose: “Simone, Simone, bona! Satane o le batlile hore a le sefe joaloka koro.” (Luka 22:31) Ka tsela e tšoanang, e mong le e mong oa rōna ea latelang mehatong ea Jesu, o tla thulana le liteko ka tsela e itseng. Petrose o ile a tšoantša Diabolose le “tau e purumang, e batlang ho harola e mong.” Athe Pauluse eena o ile a re: “Bohle ba lakatsang ho phela ka boinehelo ba bomolimo kamanong le Kreste Jesu le bona ba tla hlorisoa.”—1 Pet. 5:8; 2 Tim. 3:12.
7 Ha molumeli-’moho le rōna a hlaheloa ke koluoa, re ka bontša joang hore re lula re hopola hore na sera sa sebele ke mang? Ho e-na le ho koekoetla mor’abo rōna ea hlahetsoeng ke bothata, re etsisa Elihu oa boholo-holo, ea ileng a bua le Jobo joaloka motsoalle oa ’nete. Re thusa mor’abo rōna ho loantša sera sa rōna kaofela, e leng Satane. (Liprov. 3:27; 1 Bathes. 5:25) Sepheo sa rōna ke ho thusa mohlanka-’moho le rōna hore a lule a tšepahala, ho sa tsotellehe hore na o hlaheloa ke eng, e le hore a thabise pelo ea Jehova.
8. Ke hobane’ng ha Satane a sa ka a atleha ho thibela Jobo ho tlotlisa Jehova?
8 Letlotlo la pele leo Satane a ileng a etsa hore Jobo a lahleheloe ke lona, ke liphoofolo tsa hae. Liphoofolo tseo e ne e le tsa bohlokoa haholo, mohlomong o ne a iphelisa ka tsona. Empa Jobo o ne a boetse a li sebelisa borapeling. Ka mor’a hore Jobo a halaletse bana ba hae, o ne “a tsoha hoseng haholo ’me a nyehela mahlabelo a secheso ho ea ka palo ea bona kaofela; etsoe, Jobo o ne a re, ‘mohlomong bara ba ka ba entse sebe ’me ba rohakile Molimo ka lipelong tsa bona.’ Ke tsela eo Jobo a neng a etsa ka eona kamehla.” (Jobo 1:4, 5) Kahoo, Jobo o ne a etsetsa Jehova mahlabelo a liphoofolo nako le nako. Empa eitse hoba liteko li qale, o ne a se a sitoa ho etsa seo. Jobo o ne a se a se na “lintho tsa . . . bohlokoa” tseo a neng a ka tlotlisa Jehova ka tsona. (Liprov. 3:9) Empa o ne a ka tlotlisa Jehova ka molomo oa hae ’me o ile a fela a mo tlotlisa!
Etsa Hore U be le Kamano e Haufi le Jehova
9. Re na le letlotlo lefe leo e leng la bohlokoa ka ho fetisisa?
9 Ebang re barui kapa mafutsana, re bacha kapa re batho ba hōlileng, re phela hantle kapa rea kula, re ka etsa hore re be le kamano e haufi le Jehova. Ho sa tsotellehe liteko tseo re thulanang le tsona, ha re e-na le kamano e haufi le Molimo, sena se tla re thusa hore re lule re tšepahala ’me re thabise pelo ea Jehova. Esita le batho ba neng ba e-na le tsebo e fokolang ea ’nete, ba ile ba ema ba tiile ka sebete ’me ba lula ba tšepahala.
10, 11. (a) E mong oa baralib’abo rōna o ile a etsa joang ha botšepehi ba hae bo ne bo lekoa? (b) Morali eo oabo rōna o ile a fa Satane karabo efe e matla?
10 Nahana ka mohlala oa Morali oabo rōna Valentina Garnovskaya, e mong oa Lipaki tse ngata tsa Russia eo joaloka Jobo ea tšepahalang, a ileng a lula a tšepahala ho sa tsotellehe liteko tse matla tseo a ileng a thulana le tsona. O ile a pakeloa ke mora e mong oabo rōna ka 1945 ha a ne a le lilemo tse ka bang 20. Mora eo oabo rōna o ile a khutla ka makhetlo a mabeli ho tla buisana le eena ka Bibele empa ka mor’a moo Valentina ha aa ka a hlola a mo bona. Ho ntse ho le joalo, Valentina o ile a qala ho pakela baahelani ba hae. Ka lebaka leo, o ile a tšoaroa ’me a ahloleloa ho hlola kampong ka lilemo tse robeli. Ka 1953 o ile a lokolloa ’me hang-hang a qalella mosebetsi oa boboleli. O ile a tšoaroa hape a ba a kenngoa chankaneng ’me lekhetlong lena o ile a ahloleloa lilemo tse leshome. Ka mor’a hore a qete lilemo tse ’maloa kampong e ’ngoe, o ile a isoa ho e ’ngoe. Kampong eo, ho ne ho e-na le baralib’abo rōna ba neng ba e-na le Bibele. Ka letsatsi le leng morali e mong oabo rōna o ile a bontša Valentina Bibele. O ile a thaba hakaakang! Ak’u nahane, Bibele feela eo Valentina a neng a kile a e bona, ke e neng e tšoeroe ke mor’abo rōna ea neng a ile a mo pakela ka 1945!
11 Ka 1967, Valentina o ile a lokolloa ’me o ile a qetella a bontšitse boinehelo ba hae ho Jehova ka ho kolobetsoa metsing. O ile a chesehela ho sebelisa bolokolohi ba hae tšebeletsong ho fihlela ka 1969. Leha ho le joalo, selemong sona seo o ile a boela a tšoaroa ’me lekhetlong lena o ile a ahloleloa ho hlola chankaneng lilemo tse tharo. Ho ntse ho le joalo, Valentina o ile a tsoela pele a ntse a bolela litaba tse molemo. Pele a e-shoa ka 2001, o ne a se a thusitse batho ba 44 hore ba ithute ’nete. O ne a qetile lilemo tse 21 lichankaneng le likampong. O ne a ’nile a ithaopela ho tela ntho e ’ngoe le e ’ngoe, ho akarelletsa le bolokolohi ba hae, e le hore a lule a tšepahala. Nakoana pele a e-shoa, Valentina o ile a re: “Ha ho mohla ke ileng ka ba le lehae la ka. Lintho tsohle tsa ka tsa bohlokoa li ne li fella ka har’a sutuk’heise e le ’ngoe, empa ke ne ke sebeletsa Jehova ke thabile ebile ke khotsofetse.” Valentina o ile a fana ka karabo e matla hakaakang ho Satane, ea ileng a bolela hore batho ha ba na ho lula ba tšepahala ho Molimo haeba ba thulana le liteko! (Jobo 1:9-11) Re ka kholiseha hore o ile a thabisa pelo ea Jehova le hore Jehova o lebeletse ka thabo nako eo ka eona a tla tsosa Valentina le ba bang bohle ba ileng ba shoa ba tšepahala.—Jobo 14:15.
12. Lerato le phetha karolo efe kamanong ea rōna le Jehova?
12 Re na le setsoalle le Jehova hobane rea mo rata. Re rata makhabane a Molimo ebile re etsa sohle seo re ka se khonang e le hore re phele tumellanong le merero ea hae. Ho fapana le se boleloang ke Diabolose, ha re qobelloe ho rata Jehova ebile re mo rata ho sa tsotellehe hore na maemo ke afe. Lerato lena le tsoang botebong ba pelo lea re matlafatsa e le hore re lule re tšepahala le har’a liteko. Athe Jehova eena o tla “lebela tsela ea ba tšepahalang ba hae.”—Liprov. 2:8; Pes. 97:10.
13. Jehova o nka seo re mo etsetsang sona joang?
13 Lerato le re susumelletsa hore re tlotlise lebitso la Jehova, ho sa tsotellehe hore na re ikutloa eka re fokola hakae. O bona boikemisetso ba rōna bo botle ’me ha a re nyatse haeba re sitoa ho etsa sohle seo re neng re ka rata ho se etsa. Seo e leng sa bohlokoa hase feela hore na re etsa’ng empa e boetse ke hore na re se etsa ka lebaka lefe. Le hoja Jobo a ne a imetsoe ke mesarelo ’me a ile a mamella mathata a mangata, o ile a bolella baqosi ba hae ka tsela eo a ratang litsela tsa Jehova ka eona. (Bala Jobo 10:12; 28:28.) Khaolong ea ho qetela ea buka ea Jobo, Molimo o ile a bolela hore o halefetse Elifaze, Bildade le Tsofare hobane ba ne ba sa bua ’nete. Ka nako tšoanang, Jehova o ile a bontša hore o ananela Jobo ka ho mo bitsa, “mohlanka oa ka” ka makhetlo a mane a ba a mo laela hore a rapelle batšelisi bao ba bohata. (Jobo 42:7-9) E se eka re ka etsa lintho ka tsela eo ka eona le rōna Jehova a tlang ho re hauhela.
Jehova o Tšehetsa Bahlanka ba Hae ba Tšepahalang
14. Jehova o ile a thusa Jobo joang hore a lokise monahano oa hae?
14 Jobo o ile a lula a tšepahala le hoja a ne a sa phethahala. Ka linako tse ling ha a ne a le tlas’a khatello e khōlō, o ile a ba le maikutlo a fosahetseng. Ka mohlala, o ile a re ho Jehova: “Ke hoeletsa ho uena ho kōpa thuso, empa ha u nkarabe . . . U nkoetlela lehloeo ka matla a feletseng a letsoho la hao.” Ho feta moo, Jobo o ne a amehile haholo ka ho itokafatsa ha a ne a re: “Ha kea fosa,” le ha a ne a re ‘ha ho na pefo liatleng tsa ka, thapelo ea ka e hloekile.’ (Jobo 10:7; 16:17; 30:20, 21) Leha ho le joalo, ka mosa Jehova o ile a thusa Jobo ka hore a mo botse letoto la lipotso tse ileng tsa etsa hore Jobo a khaotse ho inahana boeena. Li ile tsa boela tsa thusa Jobo hore ka ho hlakileng a bone bophahamo ba Molimo le hore motho hase letho ha a bapisoa le Molimo. Jobo o ile a amohela tataiso eo eaba oa ikhalemela.—Bala Jobo 40:8; 42:2, 6.
15, 16. Jehova o thusa bahlanka ba hae ka litsela life kajeno?
15 Kajeno Jehova o boetse o fa bahlanka ba hae tataiso e mosa le e tiileng. Ho feta moo, re thabela melemo e meholo. Ka mohlala, Jesu Kreste o ile a fana ka sehlabelo sa thekollo ’me kahoo o ile a rala motheo oa hore re tle re tšoareloe libe. Ka lebaka la sehlabelo seo, re ka ba le kamano e haufi le Molimo le hoja re sa phethahala. (Jak. 4:8; 1 Joh. 2:1) Ha re thulana le liteko, re boetse re rapella hore moea o halalelang oa Molimo o re thuse o be o re fe matla. Ho phaella moo, re na le Bibele e feletseng ’me haeba re e bala ebile re thuisa seo e se buang, re itokisetsa liteko tsa tumelo ea rōna. Ho ithuta ho re thusa hore re utloisise tseko ea bokahohleng le ea ho tšepahala ha motho ka mong.
16 Ho feta moo, re rua molemo o moholo ka ho ba karolo ea mokhatlo oa lefatše lohle oa bara ba motho, oo Jehova a o fang lijo tsa moea a sebelisa “lekhoba le tšepahalang le le masene.” (Mat. 24:45-47) Liphuthehong tse ka bang 100- 000 tsa Lipaki Tsa Jehova, ho tšoaroa liboka tse re rutang le tse re matlafalletsang hore re tobane le liteko tsa tumelo. Sena se ka bontšoa ka se ileng sa etsahalla Sheila, mocha oa Paki ea lulang Jeremane.
17. Bontša bohlale ba ho mamela ka hloko tataiso eo mokhatlo oa Jehova o fanang ka eona kajeno.
17 Ka letsatsi le leng ha Sheila a ne a le sekolong, sehlopheng sa hae ho ne ho se na motho ea ba behileng leihlo. Bana ba sehlopheng se le seng le eena ba ile ba leka ho sebelisa boto ea Ouija e sebelisoang bakeng sa ho sebelisana le meea. Kapele-pele Sheila o ile a tsoa ka phaposing ea ho rutela, ’me seo a ileng a se utloa hamorao se ile sa etsa hore a thabe hore ebe o ile a tsoa. Ha li ntse li sebelisa boto eo ea Ouija, liithuti tse ling li ile tsa utloa hore bademona ba teng ’me tsa baleha li tšohile. Leha ho le joalo, ke eng e ileng ea thusa Sheila hore a etse qeto ea ho tsoa ka phaposing kapele hakaalo? Sheila o ile a re: “Pejana ho ketsahalo eo, re ne re ile ra tšohla taba ea likotsi tsa boto ena ea Ouija ha re le libokeng Holong ea ’Muso. Kahoo, ke ne ke tseba seo ke lokelang ho se etsa. Ke ne ke batla ho thabisa Jehova joalokaha Bibele e bolela ho Liproverbia 27:11.” Ke hantle hakaakang hore ebe Sheila o ne a le teng libokeng a bile a mametse lenaneo ka hloko!
18. U ikemiselitse ho etsa eng?
18 E se eka e mong le e mong oa rōna a ka ikemisetsa ho latela ka botlalo litaelo tseo mokhatlo oa Molimo o re fang tsona. Haeba kamehla re e-ea libokeng, re bala Bibele, re ithuta lingoliloeng tse thehiloeng Bibeleng, re rapela re bile re e-ba hammoho le Bakreste ba hōlileng moeeng, re fumana tataiso le thuso eo re e hlokang. Jehova o batla hore re hlōle, ’me o kholisehile hore re tla tsoela pele re tšepahala. Re na le tokelo e kaakang ea ho tlotlisa lebitso la Jehova, ho lula re tšepahala le ho thabisa pelo ea Jehova!
Na U sa Hopola?
• Satane o ikarabella ka liteko le maemo afe?
• Ke letlotlo lefe la bohlokoa ka ho fetisisa leo re nang le lona?
• Ke sefe se etsang hore re be le setsoalle le Jehova?
• Tse ling tsa litsela tseo Jehova a re thusang ka tsona ke life?
[Lipotso Tsa Sehlooho se Ithutoang]
[Setšoantšo se leqepheng la 8]
Na u utloa u tlameha ho tsebisa ba bang lintho tsa bohlokoa tseo u li tsebang?
[Setšoantšo se leqepheng la 9]
Re ka thusa barapeli-’moho le rōna hore ba lule ba tšepahala
[Setšoantšo se leqepheng la 10]
Valentina o ne a ikemiselitse ho tela ntho e ’ngoe le e ’ngoe e le hore a lule a tšepahala