Joang Kapa Joang Puso ea Satane e Tla Hlōleha
Joang Kapa Joang Puso ea Satane e Tla Hlōleha
“Ho hang lintho li ke ke tsa tsamaea hantle ho ea khopo.”—MOEK. 8:13.
1. Ke hobane’ng ha taba ea hore ba khopo ba tla ahloloa e le litaba tse khothatsang?
QETELLONG ba khopo ba tla tlameha ho ahloloa. Ba tla tlameha ho arabella lintho tseo ba li entseng. (Liprov. 5:22; Moek. 8:12, 13) Tseo ke litaba tse khothatsang, haholo-holo ho batho ba ratang ho loka, ba ’nileng ba tšoaroa hampe le ka ho hloka toka ke batho ba khopo. Satane Diabolose, e leng eena sesosa sa bokhopo, ke eena ea ka sehloohong ho ba khopo ba tla ahloloa.—Joh. 8:44.
2. Ke hobane’ng ha ho ne ho hlokahala nako e le hore ho rarolloe taba e ileng ea hlahisoa Edene?
2 Koana serapeng sa Edene, kaha Satane o ne a inka e le oa bohlokoa haholo, o ile a etsa hore batho ba hane puso ea Jehova. Ka lebaka leo, batsoali ba rōna ba pele ba ile ba ikopanya le Satane ha a ne a qholotsa tokelo ea Jehova ea ho busa, ’me mahlong a Hae e ile ea e-ba baetsalibe. (Bar. 5:12-14) Ke ’nete hore Jehova o ne a tseba hore na qetello ea ho hloka tlhompho ha bona le bofetoheli ba bona e ne e tla ba efe. Leha ho le joalo, qetello eo e neng e ke ke ea qojoa e ne e lokela ho totobala ho batho bohle. Kahoo, ho ne ho hlokahala nako e le hore taba ena e rarolloe le ho bontša hore marabele ao a ne a fositse e le kannete.
3. Re nka mebuso ea batho joang?
3 Kaha batho ba ile ba hana ho laoloa ke Jehova, ba ile ba tlameha ho theha mebuso ea mefuta e sa tšoaneng. Ha moapostola Pauluse a ne a ngolla balumeli-’moho le eena ba Roma, o ile a re mebuso eo ea batho ke “balaoli ba phahameng.” Mehleng ea Pauluse, balaoli ba phahameng e ne e le ’muso oa Roma ka ho khetheha, o neng o eteletsoe pele ke Moemphera Nero, ea ileng a busa ho tloha ka 54-68 C.E. Pauluse o ile a bolela hore balaoli bao ba phahameng “ba behiloe ke Molimo maemong a bona a lekanyelitsoeng.” (Bala Baroma 13:1, 2.) Na see se bolela hore Pauluse o ne a buella hore puso ea batho e phahametse ea Molimo? Ha ho joalo. Ho e-na le hoo, o ne a mpa a bolela hore hafeela Jehova a sa ntse a lumeletse babusi ba batho hore ba be teng, Bakreste ba lokela ho hlompha “tokisetso ea Molimo” ’me ba amohele babusi bao.
Tsela e Fellang ka Tlokotsi
4. Hlalosa hore na ke hobane’ng ha puso ea motho e tlameha ho hlōleha.
4 Ho sa tsotellehe seo, joang kapa joang puso ea batho e susumetsoang ke Satane e tla hlōleha. Hobane’ng? Hobane ha ea itšetleha ka bohlale ba Molimo. Ke Jehova feela ea nang le bohlale bo phethahetseng. Kahoo, ke eena feela ea ka fanang ka tataiso e ka tšeptjoang ea hore na puso e atlehang ke ea mofuta ofe. (Jer. 8:9; Bar. 16:27) Ho fapana le batho bao hangata ba phopholetsang lefifing, kamehla Jehova oa tseba hore na tsela e molemo ka ho fetisisa ea ho etsa lintho ke efe. Joang kapa joang, puso e sa lateleng tataiso ea hae e ke ke ea atleha. Ka lebaka leo, le ka lebaka la morero oa Satane o mobe, tsela e fapaneng eo a busang ka eona a sebelisa puso ea batho e ne e tla hlōleha ho tloha sethathong.
5, 6. Ho bonahala eka ke eng e entseng hore Satane a hanyetse Jehova?
5 Hangata motho ea nang le kelello ha a qale ntho eo a tsebang hore e ke ke ea atleha. Haeba ka manganga a tsoela pele ka seo a batlang ho se etsa, o tla tlameha ho bona phoso ea hae. Histori e bontšitse ka makhetlo a mangata hore ha ho na thuso ho hanyetsa ’Mōpi ea matla ’ohle. (Bala Liproverbia 21:30.) Leha ho le joalo, Satane o ile a furalla Jehova hobane o ne a foufalitsoe ke boikakaso le boikhohomoso. Kahoo, Diabolose o ile a ngangabala eaba o khetha tsela e neng e tla fella feela ka tlokotsi.
6 Hamorao boikhohomoso ba Satane bo ile ba bontšoa ke ’musi oa Babylona eo ho tlalehiloeng hore o ile a ikotla sefuba a re: “Ke tla nyolohela maholimong. Ke tla phahamisetsa terone ea ka holim’a linaleli tsa Molimo, ’me ke tla lula thabeng ea pokano, likarolong tse hōle ka ho fetisisa tsa leboea. Ke tla nyolohela libakeng tse phahameng tsa maru; ke tla iketsa hore ke tšoane le Ea Phahameng ka ho Fetisisa.” (Esa. 14:13-15) Morero o se nang kelello oa ’musi eo, o ile oa hlōleha, ’me lesika la marena a Babylona le ile la fela ka tsela e hlabisang lihlong. Ka tsela e tšoanang, haufinyane Satane hammoho le lefatše la hae ba tla hlōleha habohloko.
Ke Hobane’ng ha Molimo a Ile a Lumella See?
7, 8. Ke melemo efe e bileng teng ka lebaka la hore ebe Jehova o ile a lumella bokhopo ka nakoana?
7 Batho ba bang ba ka ’na ba ipotsa hore na ke hobane’ng ha Jehova a sa ka a thibela batho hore ba be ka lehlakoreng la Satane le hore ba latele puso eo ho neng ho totobetse hore e tla hlōleha. Kaha ke Molimo ea Matla ’Ohle, ha ho pelaelo hore a ka be a entse joalo. (Ex. 6:3) Leha ho le joalo, ha aa ka a etsa joalo. Kaha o bohlale o ile a lemoha hore ho se kena-kenane ka nakoana le bofetoheli ba motho, qetellong ho ne ho tla hlahisa litholoana tse molemo ka ho fetisisa. Qetellong, ho ne ho tla pakoa hore Jehova ke eena ’Musi ea lokileng le ea lerato, ’me qeto ea Molimo e ne e tla tsoela batho ba tšepahalang molemo.
8 Batho ba ka be ba ile ba qoba masisa-pelo a mangata hakaakang hoja ba hana ha Satane a ba hokahoka eaba ba hana ho itokolla pusong ea Molimo! Leha ho le joalo, qeto ea Jehova ea hore a lumelle batho hore ba ipuse ka nakoana e bile le melemo. E entse hore batho ba lipelo li ntle ba bone hore na ho bohlale hakae ho mamela Molimo le ho mo tšepa. Ha makholo a lilemo a ntse a feta, batho ba ’nile ba leka lipuso tsa mefuta-futa empa ha ho le e ’ngoe e atlehileng. Taba ena e entse hore barapeli ba Molimo ba kholisehe le ho feta hore ka sebele puso ea Jehova e molemo ho feta tsohle. Ke ’nete hore kaha Jehova o ile a lumella puso e khopo ea Satane, seo se baketse batho mathata a mangata, esita le ba rapelang Molimo ka botšepehi. Ho ntse ho le joalo, taba ea hore ho ’nile ha lumelloa bokhopo ka nakoana e boetse e tsoetse barapeli bana ba tšepahalang molemo.
Bofetoheli bo Entseng Hore Jehova a Tlotlisoe
9, 10. Hlalosa hore na puso ea Satane e entse hore Jehova a tlotlisoe joang.
9 Ho lumella batho hore ba susumetsoe ke Satane le hore ba ipuse, ho hang ha hoa thunthetsa puso ea Jehova. Ho e-na le hoo, lintho tse etsahetseng historing li bontša hore mantsoe ao Jeremia a ileng a bululeloa hore a a ngole mabapi le hore batho ba ke ke ba tseba ho ipusa, ke ’nete. (Bala Jeremia 10:23.) Ho phaella moo, bofetoheli ba Satane bo file Jehova monyetla oa ho bontša litšobotsi tsa Hae tse ntle ka tsela e totobetseng le ho feta. Ka tsela efe?
10 Ka lebaka la litholoana tse mpe tsa puso ea Satane, litšobotsi tsa Jehova tse phethahetseng li totobetse le ho feta. Ka tsela ena, o ’nile a tlotlisoa mahlong a batho ba mo ratang. Le hoja taba ena e ka utloahala e makatsa, ha e le hantle, tsela eo Satane a busang ka eona e entse hore Molimo a tlotlisoe. E totobalitse tsela e tsoileng matsoho eo ka eona Jehova a sebelitseng taba ena e amang ho qholotsoa ha bobusi ba hae. Ho bontša bonnete ba taba eo, a re ke re tšohleng tse ling tsa litšobotsi tsa Jehova ka bokhutšoanyane ’me re bone hore na puso e khopo ea Satane e susumelitse Jehova joang hore a bontše litšobotsi tsena ka litsela tse ling hape.
11. Lerato la Jehova le bonahetse joang?
11 Lerato. Mangolo a re bolella hore “Molimo ke lerato.” (1 Joh. 4:8) Ha e le hantle, ha Molimo a ne a bōpa batho, seo se ne se bontša lerato. Ho feta moo, tsela e tšosang le e hlollang eo re bōpiloeng ka eona e bontša lerato la Molimo. Hape, ka lerato Jehova o file batho lehae le letle le nang le ntho e ’ngoe le e ’ngoe e hlokahalang hore ba thabe. (Gen. 1:29-31; 2:8, 9; Pes. 139:14-16) Empa hang ka mor’a hore batho ba etse sebe, Jehova o ile a bontša lerato la hae ka litsela tse ncha. Joang? Moapostola Johanne o qotsa mantsoe a Jesu a reng: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Joh. 3:16) Na ho na le tsela e babatsehang eo Molimo a ka beng a bontšitse hore o rata batho ka eona ho feta ea hore ebe o ile a romela Mora oa hae ea tsoetsoeng a ’notši hore a tle lefatšeng ho tla shoela baetsalibe? (Joh. 15:13) Tsela ena e khōlō eo a bontšitseng lerato ka eona e behetse batho mohlala, ea ba fa monyetla oa hore letsatsi le letsatsi ba bonahatse lerato la Molimo le nang le boitelo, joalokaha Jesu le eena a ile a le bontša.—Joh. 17:25, 26.
12. Matla a Jehova a bonahala ka tsela efe?
12 Matla. “Molimo, ea Matla ’Ohle,” ke eena feela ea nang le matla a ho bōpa bophelo. (Tšen. 11:17; Pes. 36:9) Ha motho a tsoaloa, ho ka boleloa hore o qala a tšoana le pampiri eo ho sa ngoloang letho ho eona. Ha a e-shoa, pampiring eo e neng e sa ngoloa letho o tlatsitse liqeto, liketso le liphihlelo tsa bophelo bohle tse entseng hore e be motho ea ikhethang. Boitsebiso boo bo ka bolokoa khopolong ea Jehova. Ka nako e loketseng, Jehova a ka tsosa motho eo, ka botho ba hae bo ikhethang boo a neng a e-na le bona pele. (Joh. 5:28, 29) Kahoo, le hoja qalong lefu e ne e se karolo ea morero oa Molimo, le file Jehova monyetla oa ho bontša hore o na le matla a ho tsosa bafu. Ka sebele, Jehova ke “Molimo, ea Matla ’Ohle.”
13. Sehlabelo sa Jesu se ile sa bonahatsa toka e phethahetseng ea Jehova joang?
13 Toka. Jehova ha a bue leshano ebile ha a etse lintho ka ho hloka toka. (Deut. 32:4; Tite 1:2) Ka linako tsohle o iphaphatha le melao e phahameng ea ’nete le toka, esita le haeba seo se ka etsa hore ho bonahale eka oa lahleheloa. (Bar. 8:32) E tlameha ebe Jehova o ile a utloa bohloko hakaakang ha a bona Mora oa hae eo a mo ratang a shoela thupeng ea tlhokofatso joalokaha eka e ne e le monyefoli ea sa tšepahaleng! Leha ho le joalo, kaha Jehova o rata batho, o ne a ikemiselitse ho lumella hore ntho ena e bohloko e etsahale e le hore a iphaphathe le molao oa hae o phethahetseng oa toka. (Bala Baroma 5:18-21.) Lefatše le tletseng ho hloka toka, le ile la fa Jehova monyetla oa hore a bontše hore ke eena ea ka sehloohong ea bontšang toka.
14, 15. Bohlale ba Jehova bo boholo le ho se fele pelo ha hae ho hoholo ho bonahalitsoe ka litsela life?
14 Bohlale. Hang-hang ka mor’a hore Adama le Eva ba etse sebe, Jehova o ile senola hore na o ne a tla etsolla litholoana tse bosula tsa bofetoheli ba bona joang. (Gen. 3:15) Taba ea hore ebe Jehova o ile a nka bohato kapele hakaalo hammoho le hore ebe butle-butle o ile a senolela bahlanka ba hae lintlha tse amanang le morero ona, e ile ea etsa hore bohlale ba hae bo totobale haholo. (Bar. 11:33) Ha ho letho le ka sitisang Molimo hore a atlehe ha a sebetsa litaba. Lefatšeng lena leo ho lona ho tletseng boitšoaro bo hlephileng, ntoa, ho se nahanele, ho se mamele, ho hloka mohau, khethollo le boikaketsi, Jehova o bile le monyetla o moholo oa hore a bontše libōpuoa tsa hae bohlale ba ’nete. Morutuoa Jakobo o ile a re: “Bohlale bo tsoang holimo pele ho tsohle bo hloekile, hape bo na le khotso, kahlolo e molemo, bo itokiselitse ho mamela, bo tletse mohau le litholoana tse molemo, ha bo khetholle ka leeme, ha bo na boikaketsi.”—Jak. 3:17.
15 Ho se Fele Pelo le Tiisetso. Ho se fele pelo le ho tiisetsa ha Jehova ho ka be ho sa bonahala hakana hoja ha se ke ha hlokahala hore a sebetsane le ho se phethahale ha batho, libe tsa bona le mefokolo ea bona. Taba ea hore ebe Jehova o ile a ikemisetsa ho etsa joalo ka lilemo tse likete, e bontša hore o na le litšobotsi tsena tse tsotehang ka tsela e phethahetseng, ’me re lokela ho leboha seo haholo. Moapostola Petrose o ile a opa khomo lenaka ha a ne a re re lokela ho “[nka] ho se fele pelo ha Morena oa rōna e le poloko.”—2 Pet. 3:9, 15.
16. Ke hobane’ng ha e le taba e thabisang hakaale hore ebe Jehova o ikemiselitse ho tšoarela?
16 Ho Ikemisetsa ho Tšoarela. Kaofela ha rōna re baetsalibe ’me re khoptjoa hangata. (Jak. 3:2; 1 Joh. 1:8, 9) Ka sebele re lokela ho leboha hore ebe Jehova o ikemiselitse ho tšoarela “ka tsela e khōlō”! (Esa. 55:7) Hape nahana ka taba ena: Kaha re tsoetsoe re le baetsalibe ba sa phethahalang, re thaba haholo ha Molimo a re tšoarela liphoso tsa rōna. (Pes. 51:5, 9, 17) Ha Jehova a re tšoarela ka lerato joalo, seo se matlafatsa lerato leo re mo ratang ka lona ’me se re khothalletsa hore re latele mohlala oa hae ha re sebelisana le batho ba bang.—Bala Bakolose 3:13.
Ke Hobane’ng ha Lefatše le Kula?
17, 18. Puso ea Satane e hlōlehile ka litsela life?
17 Tsamaiso eohle ea lefatše ea Satane—e hlahisitsoeng ke tsela eo a busang ka eona—e hlōlehile khafetsa ebile e sa phetse ka makholo a lilemo. Ka 1991, koranta ea The European e ile ea re: “Na lefatše lea kula? Ka sebele ho joalo, empa . . . ha le kulisoe ke Molimo—batho ke bona ba entseng hore lefatše le kule.” Ruri sena ke ’nete! Satane o ile a susumetsa batsoali ba rōna ba pele hore ba khethe ho busoa ke batho ho e-na le ho busoa ke Jehova. Ka tsela eo ba ile ba qala puso eo joang kapa joang e neng e ke ke ea atleha. Bohloko le masisa-pelo ao batho ba a utloang lefatšeng lohle ke sesupo sa hore puso ea batho e hlasetsoe ke boloetse bo tšosang.
18 Tsela eo Satane a busang ka eona e etsa hore batho e be baithati. Leha ho le joalo, ha ho mohla boithati bo ka hlōlang lerato, leo e leng mokokotlo oa puso ea Jehova. Puso ea Satane e hlōlehile ho tlisa botsitso, thabo kapa tšireletseho. Ruri puso ea Jehova e tlositsoe qoso! Na re na le bopaki ba mehleng ee ba seo? Ka sebele ho joalo, ’me re tla bona seo sehloohong se latelang.
Re Ithutile’ng ka Bobusi ha re Bala . . .
[Lipotso Tsa Sehlooho se Ithutoang]
[Setšoantšo se leqepheng la 25]
Ha ho mohla puso ea Satane e kileng ea tsoela batho molemo
[Litlhaloso Tsa Moo Litšoantšo li Nkiloeng Teng]
U.S. Army photo
WHO photo by P. Almasy
[Setšoantšo se leqepheng la 26]
Jehova o na le matla a ho tsosa bafu
[Setšoantšo se leqepheng la 27]
Lerato la Jehova le toka ea hae li bonahalitsoe ka sehlabelo sa Mora oa hae