Ke hlahile ka 1956, ke e-na le lefu le nkholofalitseng mokokotlo. Kaha mothapo oa kutlo o ka har’a lesapo la ka la mokokotlo ha o oa ka oa koaleha hantle, tšenyo e bileng teng methapong ea ka ea kutlo e entse hore ke thatafalloe ke ho tsamaea ’me ka lebaka leo, ke na le mathata a mang a tebileng a bophelo.

Nakoana pele ke hlaha, baromuoa ba Lipaki Tsa Jehova ba ile ba qala ho ithuta Bibele le batsoali ba ka. Ha ke sa le ngoana, ho ne ho e-na le bahoeletsi ba seng bakae feela ba neng ba lula torotsoaneng ea heso ea Usakos, Namibia. Ka hona, re ne re tšohla boitsebiso ba liboka tsa phutheho re le lelapa. Ha ke le lilemo li supileng, ke iIe ka tlameha ho etsoa opereishene e le hore nka khona ho ntša metsi. Ha ke le lilemo li 14, ke ile ka ba le sethoathoa. Kaha sekolo se phahameng seo ke neng nka ea ho sona se ne se le hōle haholo, ’me ho ne ho hlokahala hore batsoali ba ka ba ntlhokomele ka mokhoa o khethehileng, ha ke ea ka ka khona ho qeta sekolong.

Ho sa tsotellehe seo, ke ile ka etsa qeto ea ho imatlafatsa moeeng. Ka nako eo lingoliloeng tse ngata tsa rōna tsa Bokreste li ne li sa fumanehe ka Seafrikanse, e leng puo ea heso. Kahoo, ke ile ka ithuta Senyesemane e le hore nka khona ho ithuta libuka tsa rōna tse ’maloa. Ke ile ka ba mohoeletsi oa ’Muso ’me ka kolobetsoa ha ke le lilemo li 19. Lilemong tse ’nè tse latelang, ke ile ka ba le mathata a mangata a bophelo le a maikutlo. Ho phaella moo, kaha batho ba motseng oa heso ba ne ba momahane, ke ne ke sa kopanele ka cheseho mosebetsing oa boboleli ka lebaka la ho ba tšaba.

Ha ke le lilemo li ka holimonyana ho 20, re ile ra tloha Namibia eaba re fallela Afrika Boroa, ’me ka lekhetlo la pele ho ile ha ba le phutheho eo ke kopanelang ho eona. Ruri eo e ile ea e-ba ntho e thabisang! Leha ho le joalo, ke ile ka tlameha ho etsoa opereishene e ’ngoe hape e le hore ke khone ho ithusa.

Nakoana hamorao, ke ile ka utloa molebeli oa potoloho a bua ka bopula-maliboho. Lintlha tseo a ileng a bua ka tsona li ile tsa nkama pelo. Ke ne ke tseba hore ho haelloa ke bophelo ho ka ’na ha ntšitisa, empa ke ne ke bone kamoo Jehova a ileng a ntlhokomela kateng tlas’a mathata a mangata. Kahoo, ke ile ka etsa kōpo ea ho ba pula-maliboho oa kamehla. Leha ho le joalo, ka lebaka la mathata a ka a bophelo, baholo ba ile ba e-ba lesisitheho ho amohela kōpo ea ka.

Ho ntse ho le joalo, ke ile ka etsa qeto ea ho etsa sohle seo nka se khonang mosebetsing oa ho ruta ka ’Muso. Ka thuso ea ’Mè le ea batho ba bang, ke ile ka khona ho finyella lihora tsa bopula-maliboho ka likhoeli tse fetang tse tšeletseng. Seo se ile bontša hore ke hlile ke ikemiselitse ho ba pula-maliboho le hore maemo a ka a bophelo aa mamelleha. Ke ile ka etsa kōpo hape, ’me lekhetlong lena e ile ea amoheloa. Ka la 1 September 1988, ke ile ka ba pula-maliboho oa kamehla.

Nakong ena eo ke bileng pula-maliboho, ke ’nile ka bona ha Jehova a ntšehetsa. Ho ruta batho ba bang ’nete ho e-na le ho nahana ka mathata a ka ho ile ha ntšireletsa, ha ’matlafatsa ha ba ha nthusa hore ke hōle moeeng. Ke ile ka ba le thabo e khaphatsehang ha ke ne ke khona ho thusa batho ba ’maloa ho fihlela ba inehela ba bile ba kolobetsoa.

Bophelo ba ka bo ntse bo sa tsitsa. Empa Jehova ‘o ntjarela mojaro letsatsi le letsatsi.’ (Pes. 68:19) Ha a etse feela hore ke khone ho mamella; empa o etsa hore ke thabele bophelo!