1. Ke hobane’ng ha re lokela ho leboha Jehova?

KA SEBELE re lokela ho leboha Jehova, Mofani oa “mpho e ’ngoe le e ’ngoe e molemo le neo e ’ngoe le e ’ngoe e phethahetseng.” (Jak. 1:17) Kaha ke Molisa ea lerato, o re fa sohle seo re se hlokang nameng le moeeng. (Pes. 23:1-3) Ke “setšabelo le matla a rōna”—haholo-holo linakong tsa mahlomola! (Pes. 46:1) Ha e le hantle, re na le mabaka a utloahalang a ho lumellana le mopesaleme, ha a re: “Lebohang Jehova, kaha o molemo; etsoe mosa oa hae o lerato o teng ho isa nakong e sa lekanyetsoang.”—Pes. 106:1.

2, 3. (a) Ke hobane’ng ha ho le kotsi ho se ananele litlhohonolofatso tseo re nang le tsona? (b) Re tlil’o tšohla lipotso life sehloohong see?

² Ke hobane’ng ha re lokela ho leboha? Joalokaha ho boletsoe esale pele, batho ba matsatsing ana a ho qetela ha ba na teboho. (2 Tim. 3:2) Ba bangata ha ba ananele litlhohonolofatso tseo ba nang le tsona. Kaha batho ba limilione ba susumetsoa ke lefatše la khoebo le lipapatso, ba batla ho fumana lintho tse eketsehileng ho e-na le ho khotsofalla seo ba nang le sona. Le rōna re ka hahlameloa ke moea ona oa ho hloka teboho. Ho tšoana  le Baiseraele ba boholo-holo, re ka fetoha ba se nang teboho ’me ra khaotsa ho ananela kamano e babatsehang eo re nang le eona le Jehova hammoho le litlhohonolofatso tseo a re fang tsona.—Pes. 106:7, 11-13.

³ Nahana hape ka se ka etsahalang ha re hlaheloa ke liteko. Li ka ’na tsa re sithabetsa ’me ra lebala litlhohonolofatso tseo re nang le tsona. (Pes. 116:3) Ka hona, re ka etsa’ng hore re be le teboho ’me re lule re e-na le eona? Hona ke’ng e tla re thusa hore re lule re e-na le boikutlo bo loketseng ha re tobana le liteko tse matla? A re boneng.

4. Re ka etsa’ng hore re lule re e-na le boikutlo ba ho leboha?

⁴ E le hore re be le boikutlo ba ho leboha ’me re lule re e-na le bona, re lokela ho lumela le ho thuisa ka kananelo ka litlhohonolofatso tseo Jehova a re fang tsona ’me re nahanisise ka liketso tsa mosa oa hae o lerato. Ka mor’a hore mopesaleme a etse seo, o ile a hlolloa ke lintho tse ngata tse babatsehang tseo Jehova a li entseng.—Bala Pesaleme ea 40:5; 107:43.

5. Re ka ithuta’ng ho moapostola Pauluse tabeng ea ho leboha?

⁵ Re ka ithuta ho hongata ho moapostola Pauluse tabeng ea ho leboha. Kamoo ho bonahalang kateng, o ne a thuisa ka litlhohonolofatso tsa hae, kaha o ne a lula a leboha ho tsoa pelong. Pauluse o ne a tseba hore e ne e le ‘monyefoli, mohlorisi le monyelisi.’ Kahoo, o ile a leboha hore le hoja a entse liphoso nakong e fetileng, Molimo le Kreste ba mo bontšitse mosa ’me ba mo abela tšebeletso. (Bala 1 Timothea 1:12-14.) Pauluse o ne a boetse a ananela ka ho teba Bakreste-’moho le eena ’me o ile a leboha Jehova khafetsa ka litšobotsi tse ntle tseo ba nang le tsona le ka ho sebeletsa ha bona ka botšepehi. (Bafil. 1:3-5, 7; 1 Bathes. 1:2, 3) Ho feta moo, ha Pauluse a tobana le liteko, o ne a leboha Jehova ka tšehetso e nakong eo barab’abo ba moea ba mo fang eona. (Lik. 28:15; 2 Bakor. 7:5-7) Ka hona, ha ho makatse hore ebe Pauluse o ile a khothatsa Bakreste ka ho re: ‘Le iponahatse le le ba lebohang, ’me le eletsane ka lipesaleme, lithoriso ho Molimo le lipina tsa moea.’—Bakol. 3:15-17.

6. Ke’ng eo u e ananelang ka ho khetheha eo Jehova a u etselitseng eona?

⁶ Re ka etsisa mohlala o motle oa Pauluse joang tabeng ea ho ithuta ho leboha le ho bontša teboho? Joaloka Pauluse, re lokela ho thuisa ka seo Jehova a re etselitseng sona. (Pes. 116:12) U ne u ka re’ng ha u botsoa hore na, ‘Ke litlhohonolofatso life tsa Jehova tseo u li ananelang’? Na u ne u tla kenyelletsa kamano e ntle eo u nang le eona le Jehova? Kapa tšoarelo ea libe ka lebaka la ho ba le tumelo sehlabelong sa Kreste sa thekollo? Na u ne u tla bolela mabitso a bara le barali babo rōna ba u thusitseng ha u hlaheloa ke liteko tse sa tšoaneng? Ha ho pelaelo hore u ne u tla kenyelletsa le molekane oa hao ea ratehang kapa bana ba lōna. Ho ipha nako ea ho thuisa ka litlhohonolofatso tse babatsehang joalo tse tsoang ho Ntate oa hao ea lerato, Jehova, ho tla etsa hore u be le teboho ’me ho u susumelletse ho leboha letsatsi ka leng.—Bala Pesaleme ea 92:1, 2.

7. (a) Ke hobane’ng ha re lokela ho etsa lithapelo tsa teboho? (b) U tla rua molemo joang ha u etsa lithapelo tsa teboho?

⁷ Ha re lula re nahana re bile re ananela litlhohonolofatso tseo re nang le tsona, re tla rapela Jehova le ho mo leboha. (Pes. 95:2; 100:4, 5) Batho ba bangata ba nka hore thapelo ke tsela feela ea ho kōpa lintho ho Molimo. Empa rōna rea tseba  hore Jehova o oa thaba ha re mo leboha ka seo re nang le sona. Ka Bibeleng ho na le lithapelo tse ngata tse amang maikutlo, ho akarelletsa tse ileng tsa etsoa ke Anna le Ezekiase. (1 Sam. 2:1-10; Esa. 38:9-20) Kahoo, etsisa bahlanka bao ba tšepahalang ba ileng ba bontša hore ba na le teboho. Rapela Jehova u mo lebohe ka litlhohonolofatso tseo u nang le tsona. (1 Bathes. 5:17, 18) Ho etsa joalo ho na le melemo e mengata. Ho tla u hlasimolla, ho matlafatse lerato la hao ho Jehova le ho u atametsa haufi le eena.—Jak. 4:8.

8. Ke’ng e ka etsang hore re khaotse ho ananela seo Jehova a re etselitseng sona?

⁸ Ke hobane’ng ha re lokela ho ba hlokolosi hore re se ke ra oela lerabeng la ho se ananele molemo oa Jehova? Hobane re futsitse tšekamelo ea ho hloka teboho. Ak’u nahane ka sena: Batsoali ba rōna ba pele, e leng Adama le Eva, ba ile ba behoa serapeng sa paradeise. Ba ne ba e-na le lintho tsohle tseo ba li hlokang, ba bile ba e-na le tebello ea ho phela ka ho sa feleng ka khotso. (Gen. 1:28) Empa ha baa ka ba ananela litlhohonolofatso tsa bona. Ka lebaka la meharo, ba ile ba batla ho eketsehileng. Ka hona, ba lahleheloa ke sohle. (Gen. 3:6, 7, 17-19) Kaha re pota-potiloe ke batho ba se nang teboho, le rōna re ka ’na ra qala ho se ananele seo Jehova a re etselitseng sona. Re ka ’na ra se hlole re ananela setsoalle sa rōna le eena. Ra khaotsa ho ananela tlotla ea ho ba karolo ea mokhatlo oa bara ba motho oa lefatšeng ka bophara. Kapa ra phathahana haholo ka lintho tsa lefatše lena le haufi le ho fela. (1 Joh. 2:15-17) E le hore re qobe boemo boo, re lokela ho thuisa ka litlhohonolofatso tseo re nang le tsona ’me re lebohe Jehova kamehla ka tlotla eo re nang le eona ea ho mo sebeletsa.—Bala Pesaleme ea 27:4.

9. Ke hobane’ng ha re lokela ho nahana ka litlhohonolofatso tsa rōna ha re hlaheloa ke liteko?

⁹ Ho ba le boikutlo ba ho leboha ho ka re thusa ho mamella liteko. Re ka ’na ra ikutloa re sithabetse ha re hlaheloa ke maemo a bohloko ka tšohanyetso, joaloka ho se tšepahale ha molekane, ho kula, ho shoeloa ke motho eo re mo ratang kapa ho oeloa ke koluoa ea tlhaho. Maemong a joalo, re tla tšelisoa re be re matlafatsoe ke ho nahana ka litlhohonolofatso tseo re nang le tsona. Nahana ka liphihlelo tsa batho ba latelang.

10. Irina o ruile molemo joang ka ho lula a nahana ka litlhohonolofatso tsa hae?

 ¹⁰ Irina *, eo e leng pula-maliboho oa kamehla Amerika Leboea, o ne a nyetsoe ke moholo ea ileng a mo tsoa tlaase ’me a mo siea le bana. Ke’ng e ileng ea thusa Irina hore a tsoele pele a sebeletsa Jehova ka botšepehi? O re: “Ke ananela tsela eo Jehova a ntlhokomelang ka eona. Ha ke nahana ka litlhohonolofatso tsa ka letsatsi ka leng, ke khona ho bona hore ke tlotla ho tsejoa le ho ratoa ke Ntate oa rōna ea leholimong. Kea tseba hore a ke ke a ntahla le ka mohla.” Le hoja Irina a bile le mathata a mangata, o lutse a thabile ebile o khothatsa ba bangata.

11. Ke’ng e thusitseng Kyung-sook hore a mamelle bothata ba ho kula?

¹¹ Kyung-sook ea lulang Asia, o qetile lilemo tse fetang 20 e le pula-maliboho le monna oa hae. Ha lingaka li fumana hore o na le kankere e mpe ea matšoafo, li ile tsa mo bolella hore o saletsoe ke likhoeli tse tharo ho isa ho tse tšeletseng feela a phela. Le hoja eena le monna oa hae ba ’nile ba tobana le mathata a mangata, ba ne ba nahana hore ba phetse hantle. O re: “Ho kula hona ho ile ha nkama habohloko. Ke ne ke utloa eka ke lahlehetsoe ke sohle, ’me ke tšohile haholo.” Ke’ng e ileng ea thusa Kyung-sook ho mamella boemo boo? O re: “Bosiu bo bong le bo bong pele ke robala, ke nyolohela karolong e marulelong ebe ke rapela ka lentsoe le phahameng ke bolele lintho tse hlano tseo ke li ananetseng letsatsi leo. Seo sea nkhothatsa, ’me se ntšusumelletsa ho bolella Jehova kamoo ke mo ratang kateng.” Lithapelo tsee li thusitse Kyung-sook joang? O re: “Ke hlokometse hore Jehova o oa re tšehetsa ha re tobana le mathata le hore litlhohonolofatso tsa rōna li ngata ho feta mathata.”

12. Ke’ng e ileng ea tšelisa Jason ka mor’a hore a shoeloe ke mosali?

¹² Jason ea sebeletsang ofising e ’ngoe ea lekala Afrika, o qetile lilemo tse fetang 30 a le tšebeletsong ea nako e tletseng. O re: “Lilemong tse supileng tse fetileng, ke ile ka shoeloa ke mosali, ’me bohloko boo ke ileng ka bo utloa, ha ke khone ho bo hlalosa. Ke ne ke nyahamisoa ke ho nahana kamoo a hutseng ka thata kateng ha a ntse a loantšana le kankere.” Ke’ng e thusitseng Jason hore a mamelle boemo boo? O re: “Ka lekhetlo le leng ke ile ka hopola nako e monate eo ke e qetileng ke e-na le mosali oa ka, ’me ka rapela Jehova ka mo leboha ka seo. Ke ile ka ikutloa ke imolohile ’me ka mor’a moo ka qala ho leboha Jehova kamehla ka hore ebe re bile le nako e khathollang joalo. Ho ba le kananelo ho fetotse pono ea ka haholo. Ke ntse ke utloa bohloko ba ho lahleheloa, empa ho leboha Jehova ka hore ebe o nthusitse ho ba le lenyalo le thabileng le tokelo ea ho mo sebeletsa hammoho le motho ea mo ratang ho fetotse pono ea ka.”

13. Ke’ng e thusitseng Sheryl hore a mamelle bohloko ba ho lahleheloa ke ba lelapa labo?

¹³ Ha Leholiotsoana Haiyan le otla karolong e bohareng ea Philippines ho elella qetellong ea 2013, Sheryl ea neng a le lilemo li 13 feela ka nako eo, o ile a lahleheloa ke hoo e ka bang ntho e ’ngoe le e ’ngoe. O re: “Ntlo eso e ile ea senyeha, ’me litho tse ling tsa lelapa leso tsa hlokahala.” Ntate oa hae, ’mè oa hae le bana babo ba bararo ba ile ba bolaoa ke sefefo se matla. Ke’ng e thusitseng Sheryl hore a mamelle tlokotsi ee? Ke ho ba le teboho le ho lula a nahana ka litlhohonolofatso tseo a nang le tsona. O re: “Ke ile ka bona lintho tsohle tseo bara le barali babo rōna ba li entseng ho thusa le ho tšelisa ba mathateng. Kea tseba hore barab’abo rōna bohle lefatšeng baa nthapella.” O phaella ka ho re: “Ke leboha haholo hore ebe  Jehova ke Molimo oa ka. Kamehla o re fa seo re se hlokang.” Ka sebele, ho nahana ka litlhohonolofatso tseo re nang le tsona ho ka re thusa ho loantša ho sareloa. Ho ba le kananelo ho re thusa hore re mamelle, ho sa tsotellehe mathata leha e le afe ao re ka ’nang ra tobana le ’ona.—Baef. 5:20; bala Bafilipi 4:6, 7.

14. Re na le tebello efe e thabisang? (Sheba setšoantšo se qalong.)

¹⁴ Ho theosa le histori, batho ba Jehova ba ’nile ba thabela litlhohonolofatso. Ka mohlala, ka mor’a hore Baiseraele ba lopolloe matsohong a Faro le lebotho la hae Leoatleng le Lefubelu, ba ile ba bina lipina tsa thoriso ’me ba leboha Jehova. (Ex. 15:1-21) E ’ngoe ea lintho tseo re li ananelang ka ho fetisisa kajeno ke tšepo e tiileng ea hore re tla lopolloa linthong tsohle tse re utloisang bohloko le ho re nyahamisa. (Pes. 37:9-11; Esa. 25:8; 33:24) U ka inahanela hore na re tla ikutloa joang ha Jehova a timetsa lira tsohle tsa hae ’me a re kenya lefatšeng le lecha la khotso le ho loka. Ruri letsatsing leo re tla mo leboha haholo!—Tšen. 20:1-3; 21:3, 4.

15. U ikemiselitse ho etsa’ng selemong see sa 2015?

¹⁵ Re lebeletse ka thabo ho fumana litlhohonolofatso tsa moea tse tsoang ho Jehova ka 2015. Ke ’nete hore re ka ’na ra tobana le liteko. Empa rea tseba hore Jehova a ke ke a re lahla le ka mohla. (Deut. 31:8; Pes. 9:9, 10) O tla tsoela pele ho re fa sohle seo re se hlokang hore re mo sebeletse ka botšepehi. Ka hona, e se eka re ka ikemisetsa ho ba le boikutlo bo kang ba moprofeta Habakuke ea ileng a re: “Le hoja sefate sa feiga se ke ke sa thunya, ’me lifate tsa morara li ke ke tsa beha litholoana; mosebetsi oa sefate sa mohloaare o ka ’na oa fella ka ho hlōleha, ’me masimo a ka ’na a se ke a hlahisa lijo; mohlape oa likhutšoane o ka ’na oa tlosoa lesakeng, ’me ho ka ’na ha se ke ha e-ba le mohlape oa liphoofolo tse khōlō ka masakeng; Empa leha ho le joalo, ha e le ’na, ke tla ithabela ho Jehova; ke tla inyakallela ho Molimo oa poloko ea ka.” (Hab. 3:17, 18) E se eka selemong sena re ka lula re nahana ka litlhohonolofatso tseo re nang le tsona ’me ra susumelletseha ho latela khothatso e temaneng ea rōna ea selemo ea 2015 e reng: “Lebohang Jehova, kaha o molemo.”—Pes. 106:1.