1, 2. Jesu o bontšitse joang hore o rata batho?

MORA oa Molimo oa letsibolo ke mohlala o ka sehloohong oa bohlale bo phahameng ba Jehova, ebile o ’nile a sebetsa le Ntate oa hae e le “mosebetsi ea hloahloa.” U ka inahanela kamoo Jesu a neng a thabile a bile a khotsofetse kateng ha Ntate oa hae a ntse ‘a lokisa maholimo’ a bile ‘a theha lefatše.’ Empa har’a lintho tsohle tseo Ntate oa hae a neng a li bōpile, Jesu ‘o ne a rata bara ba batho.’ (Liproverbia 8:22-31) Ho tloha qalong feela, e sa le a rata batho.

² Hamorao, Jesu o ile a bontša hore o rata Ntate oa hae le ho tšepahala ho eena, le hore o rata batho bohle ka ho ithaopela ho tloha leholimong ’me a tla lefatšeng e le motho. Jesu o ile a tela bophelo ba hae hore e be “thekollo e le phapanyetsano bakeng sa ba bangata.” (Matheu 20:28; Bafilipi 2:5-8) Ha Jesu a le lefatšeng, Molimo o ile a mo fa matla a ho etsa mehlolo. Mehlolo ena e bontša kamoo Jesu a ratang batho kateng le hore haufinyane o tla ba etsetsa lintho tse babatsehang.

3. Re tlil’o tšohla’ng sehloohong see?

³ Ha Jesu a le lefatšeng, o ile a bolela “litaba tse molemo  tsa ’muso oa Molimo.” (Luka 4:43) O ne a tseba hore ’Muso ona o tla halaletsa lebitso la Ntate oa hae ’me o rarolle mathata a batho ka ho sa feleng. Jesu o ile a etsa mehlolo e mengata ha a ntse a bolela. Mehlolo ena e ne e senola hore o tsotella batho bohle. Ke hobane’ng ha see e le sa bohlokoa ho rōna? Lintho tseo a li entseng li re fa tšepo le ho re bontša se tla etsahala nakong e tlang. Kahoo, a re ke re tšohleng mehlolo e mene ea Jesu.

4. Ho ile ha etsahala’ng ha Jesu a kopana le monna ea tšoeroeng ke lepera?

⁴ Nakong ea tšebeletso ea hae, Jesu o ile a ea Galilea. Ha a le motseng o mong moo, o ile a kopana le monna ea tšoeroeng ke boloetse bo tšosang ba lepera. (Mareka 1:39, 40) Monna eo o ne a kula hoo ngaka Luka a ileng a re o ‘tletse lepera.’ (Luka 5:12) Bibele e re ha monna eo ea kulang a bona Jesu, o ile “a itihela fatše ka sefahleho ’me a mo kōpa, a re: ‘Morena, haeba feela u batla, u ka ntlhoekisa.’” Monna eo o ne a tseba hore Jesu o na le matla a ho mo folisa, empa a lakatsa ho tseba hore na o batla ho mo folisa. Hobane’ng? Hobane monna eo o ne a tseba hore Bafarisi ba khesa balepera. Empa Jesu eena o ne a ikutloa joang? O ne a tla tšoara monna eo joang, eo mohlomong a neng a holofetse hampe? Uena u ka be u entse’ng?

5. Ke’ng e ileng ea susumelletsa Jesu hore a batle ho folisa molepera?

⁵ Kamoo ho bonahalang kateng, monna ea kulang ha aa ka a hoeletsa a re, “Ha kea hloeka, ha kea hloeka!” joalokaha Molao oa Moshe o ne o laela. (Levitike 13:43-46) Empa Jesu ha aa ka a halefisoa ke seo. Ho e-na le hoo, o ile a ameha ka monna eo, ’me a batla ho mo thusa. Ha re tsebe hantle hore na Jesu o ne a nahana’ng, empa rea tseba hore na o ne a ikutloa joang. O ile a utloela monna eo bohloko hoo a ileng a mo folisa ka mohlolo. A mo ama, e leng seo batho ba bangata ba neng ba ke ke ba se etsa. Ka kholiseho le kutloelo-bohloko, Jesu o ile a re: “Kea batla. Hloeka.” Kahoo, “lepera la nyamela ho eena.” (Luka 5:13) Ka ho hlakileng, Jehova o ile a fa Jesu matla a ho etsa mohlolo ona ho bontša kamoo a ratang batho kateng.—Luka 5:17.

6. Ke’ng e thahasellisang ka mehlolo eo Jesu a neng a e etsa, hona e bontša’ng?

⁶ Molimo o ile a fa Jesu matla a hore a etse mehlolo e mengata e hlollang. Jesu ha aa ka a folisa balepera feela. O ile a folisa batho ba bangata ba nang le maloetse a mefuta e sa tšoaneng. Bibele e re batho ba ile ba hlolloa ha ba “bona limumu li bua le ba holofetseng ba tsamaea le lifofu li bona.” (Matheu 15:31) Ha Jesu a folisa motho, o ne a sa hloke hore motho e mong ea phetseng hantle a fane ka setho se itseng sa ’mele. Ho e-na le hoo, Jesu o ne a e-na le matla a ho folisa litho tse kulang tsa ’mele. O ne a bile a folisa batho hang-hang, ka linako tse ling ba le hōle le eena. (Johanne 4:46-54) Mehlolo ee e bontša’ng? E bontša hore Morena oa rōna Jesu Kreste, o na le matla ebile o lakatsa ho felisa ho kula ka ho sa feleng. Ha re ithuta kamoo Jesu a ileng a tšoara batho kateng, seo se re fa kholiseho ea hore lefatšeng le lecha, “o tla utloela ea tlaase bohloko le ea futsanehileng.” (Pesaleme ea 72:13) Jesu o tla folisa bohle ba kulang hobane a batla.

7, 8. Hlalosa se ileng sa etsahala pele Jesu a kopana le monna ea kulang Bethzatha.

⁷ Likhoeli tse seng kae ka mor’a hore a phekole molepera, Jesu o ile a tloha Galilea a ea Judea, moo a ileng a tsoela pele ho bolela litaba tse molemo tsa ’Muso oa Molimo. E tlameha ebe batho ba likete ba ileng ba utloa molaetsa oa Jesu ba ile ba angoa ke lerato la hae. Ka sebele Jesu o ne a batla ho tšelisa mafutsana le ba hateletsoeng le ho ba fa tšepo.—Esaia 61:1, 2; Luka 4:18-21.

⁸ Ka khoeli ea Nisane, Jesu o ile a ea Jerusalema ho ea keteka Paseka. Ka nako eo ho ne ho phethesela, kaha batho ba bangata ba ne ba tlile moketeng oo o khethehileng. Ka leboea ho tempele ho ne ho e-na le letamo le bitsoang Bethzatha, ’me ha Jesu a le moo, o ile a kopana le monna ea sa tsebeng ho tsamaea.

9, 10. (a) Ke hobane’ng ha batho ba ne ba e-ea letamong la Bethzatha? (b) Jesu o ile a etsa’ng ha a le letamong leo, hona see se re ruta’ng? (Sheba setšoantšo se qalong.)

⁹ Batho ba bangata ba kulang ba ne ba atisa ho ea Bethzatha. Hobane’ng? Hobane ba ne ba nahana hore ba tla fola ka mohlolo ha ba ka kena ka letamong nakong eo metsi a loebehlanang. U ka inahanela hore na e ne e le hlakantsutsu e kaakang moo kaha ho ne ho e-na le batho ba bangata ba tsietsing, ’me ba batla ho fola. Jesu o ne a phethahetse ’me a sa hloke ho phekoloa, joale o ne a il’o etsa’ng moo? O ne a ile moo hobane a rata batho. Ke hona mona moo a ileng a kopana le monna ea qetileng lilemo tse ngata a kula.—Bala Johanne 5:5-9.

¹⁰ Jesu o ile a botsa monna eo hore na o batla ho fola ’me a tsebe ho tsamaea. E tlameha ebe monna eo o ile a araba Jesu ka pelo e bohloko, ha a mo bolella hore o batla ho fola empa ha ho na motho ea mo thusang hore a kene ka letamong. Jesu a ntan’o re monna eo a etse ntho eo ho neng ho bonahala eka e ke ke ea khoneha. O ile a re a nke lempara la hae ’me a tsamaee. Kahoo, monna eo a nka lempara ’me a tsamaea! Mohlolo ona o bontša seo Jesu a tla se etsa lefatšeng le lecha. O boetse o bontša kamoo Jesu a ratang batho kateng. O ne a ea ho batho ba hlokang thuso. Mohlala oa Jesu o lokela ho re susumelletsa ho tsoela pele re batla batho tšimong ea rōna ba sithabelitsoeng ke lintho tse mpe tse etsahalang kajeno.

11. Mareka 5:25-34 e bontša joang hore Jesu o ne a rata batho ba kulang?

¹¹ Bala Mareka 5:25-34. Mosali e mong o ne a qetile lilemo tse 12 a tšoeroe ke boloetse bo hlabisang lihlong. Boloetse bona bo ne bo ama ntho e ’ngoe le e ’ngoe eo a e etsang, ho akarelletsa le borapeli ba hae. O ne a ile lingakeng tse ngata, ’me li mo qetetse chelete, empa boemo ba hae bo ntse bo mpefala. Ka le leng, mosali eo o ile a loha leqheka, eaba o kena  har’a letšoele ’me o ama liaparo tsa Jesu. (Levitike 15:19, 25) Ha Jesu a hlokomela hore matla a tsoile ho eena, o ile a botsa hore na ke mang ea mo ammeng. Mosali eo o ile ‘a tšoha ’me a thothomela,’ kahoo “a itihela fatše ka pel’a hae eaba o mo bolella ’nete eohle.” Jesu o ne a tseba hore ke Jehova ea folisitseng mosali eo, ’me ka mosa a re ho eena: “Morali, tumelo ea hao e u folisitse. Tsamaea ka khotso, ’me u fole boloetseng ba hao bo bohloko.”

12. (a) U ka hlalosa Jesu joang ho latela seo re sa tsoa ithuta sona? (b) Jesu o re behetse mohlala ofe?

¹² Ruri hoa thabisa ho bona kamoo Jesu a neng a rata batho kateng, haholo-holo ba kulang. Satane eena ha a re rate, ebile o batla re lumele hore ha re na thuso le hore ha ho na motho ea re ratang. Empa mehlolo ea Jesu e bontša hore o oa re tsotella le hore o amehile ka mathata a rōna. Rea leboha hore ebe re na le Morena le Moprista ea Phahameng ea lerato ka tsela ena! (Baheberu 4:15) Re ka ’na ra thatafalloa ho utloisisa kamoo motho ea kutseng nako e telele a ikutloang kateng, haholo-holo haeba re sa kule. Empa nahana ka Jesu. O ne a qenehela batho ba kulang, le hoja ho se mohla a kileng a kula. E se eka re ka etsa sohle se matleng a rōna ho etsisa tsela eo a neng a bontša lerato ka eona.—1 Petrose 3:8.

13. Ho tsosoa ha Lazaro bafung ho senola eng ka Jesu?

¹³ Jesu o ne a utloa bohloko ha a bona ba bang ba le mahlomoleng. Ka mohlala, ha motsoalle oa hae Lazaro a shoele, Jesu o ile “a bobola moeeng ’me a khathatseha” ha a bona kamoo beng ka Lazaro le metsoalle ba utloileng bohloko kateng. (Bala Johanne 11:33-36.) Jesu o ile a lla, le hoja a ne a tseba hore o tlil’o tsosa Lazaro. O ne a sa tšabe ho bontša ba bang maikutlo a hae. Jesu o ne a rata Lazaro le ba lelapa labo hoo a ileng a sebelisa matla ao Molimo a mo  fileng ’ona ho tsosa Lazaro!—Johanne 11:43, 44.

14, 15. (a) Ke’ng e bontšang hore Jehova o batla ho felisa mahlomola a batho? (b) Poleloana ‘mabitla a khopotso’ e bontša eng?

¹⁴ Bibele e re Jesu o tšoana hantle le Ntate oa hae, Jehova. (Baheberu 1:3) Kahoo, mehlolo ea Jesu e bontša hore Jehova le eena o batla ho felisa ho kula, bohloko le lefu. Haufinyane, Jehova le Jesu ba tla tsosa batho ba bangata bafung. Jesu o ile a re “hora ea tla eo ka eona bohle ba mabitleng a khopotso” ba tla tsosoa.—Johanne 5:28, 29.

¹⁵ Jesu o ile a sebelisa poleloana ‘mabitla a khopotso,’ ho bontša hore bafu ba mohopolong oa Molimo. Molimo ea Matla ’Ohle, ’Mōpi oa bokahohle, o khona ho hopola lintlha tsohle ka baratuoa ba rōna ba shoeleng, ho akarelletsa le botho ba bona. (Esaia 40:26) Hase feela hore Jehova o khona ho ba hopola, empa o batla ho ba hopola. Litlaleho tse ka Bibeleng tsa batho ba ileng ba tsosoa, li bontša se tla etsahala lefatšeng le lecha.

16. Bahlanka ba bangata ba Molimo ba tla ba le monyetla ofe?

¹⁶ Haeba re lula re tšepahala, re ka ba le monyetla oa ho bona mohlolo o moholo, oa ho pholoha matšoenyeho a maholo! Ka mor’a Armagedone, re tla bona e meng e mengata. Ka nako eo, batho bohle ba tla be ba phetse hantle. (Esaia 33:24; 35:5, 6; Tšenolo 21:4) Ak’u nahane u se u bona batho ba lahla likhalase tsa mahlo, melamu, litulo tsa likooa le mechine e thusang batho ba sa utloeng hantle litsebeng! Jehova o oa tseba hore batho ba pholohileng Armagedone ba lokela ho phela hantle ’me ba be matla, kaha ho tla be ho e-na le mosebetsi o mongata oo ba lokelang ho o etsa. Ke bona ba tla fetola lefatše la rōna hore e be paradeise e ntle.—Pesaleme ea 115:16.

17, 18. (a) Ke hobane’ng ha Jesu a ile a etsa mehlolo? (b) Ke hobane’ng ha u lokela ho ikitlaelletsa ho ba teng lefatšeng le lecha la Molimo?

¹⁷ Kajeno “bongata bo boholo” boa khothala ha bo bala kamoo Jesu a ileng a folisa ba kulang kateng. (Tšenolo 7:9) Mehlolo eo e tiisa tšepo ea rōna e babatsehang ea hore re tla phekoloa nakong e tlang. E boetse e bontša tsela eo Mora oa Molimo oa letsibolo a ratang batho ka eona. (Johanne 10:11; 15:12, 13) Qenehelo ea Jesu e senola lerato le tebileng leo Jehova a ratang mohlanka e mong le e mong oa hae ka lona.—Johanne 5:19.

¹⁸ Kajeno, lefatše le aparetsoe ke bohloko, mahlomola le lefu. (Baroma 8:22) Ke kahoo re hlokang lefatše le lecha la Molimo. Ho lona, batho bohle ba tla phela hantle, joalokaha Molimo a tšepisitse. Malakia 4:2 e re re tla ‘tila fatše joaloka manamane a nontšitsoeng,’ re thabile re bile re nyakaletse kaha re tla be re folisitsoe ’me re phethahetse. E se eka kananelo ea rōna ho Jehova le tumelo litšepisong tsa hae, li ka re susumelletsa hore re ikitlaelletse ho ba teng lefatšeng le lecha. Ruri hoa khothatsa ho tseba hore mehlolo eo Jesu a ileng a e etsa, e bontša lintho tseo a tla li etsa haufinyane ka puso ea hae ho imolla batho mathateng a bona ka ho sa feleng!