1. (a) Petrose o ile a etsa’ng ha ho e-na le sefefo Leoatleng la Galilea? (Sheba setšoantšo se qalong.) (b) Ke hobane’ng ha Petrose a ile a qala ho teba?

BOSIUNG bo bong, moapostola Petrose le barutuoa ba bang ba ne ba tsamaea ka seketsoana Leoatleng la Galilea, ’me se ba sokolisa ka lebaka la sefefo. Eaba ba bona Jesu a tsamaea holim’a metsi. Petrose a hoeletsa Jesu, a mo kōpa hore na a ka tla ho eena a tsamaea holim’a metsi. Jesu o ile a re a tle, eaba Petrose o tsoa ka seketsoaneng ’me o ea ho eena. Empa ka mor’a nakoana, Petrose a qala ho teba. Hobane’ng? Hobane o ile a talima sefefo le maqhubu eaba o oa tšoha. Petrose o ile a hoeletsa a kōpa thuso ’me Jesu a mo tšoara a ntan’o re: “Uena ea nang le tumelo e nyenyane, ke hobane’ng ha u ile ua itesella ho belaela?”—Matheu 14:24-32.

2. Re tlil’o tšohla lintlha life?

² A re tšohleng lintlha tse tharo mabapi le tumelo tseo re ka ithutang tsona phihlelong ea Petrose: (1) kamoo qalong Petrose a ileng a tšepa Jehova kateng hore o tla mo thusa, (2) lebaka  le ileng la etsa hore Petrose a felloe ke tumelo le (3) hore na ke’ng e ileng ea thusa Petrose hore a boele a be le tumelo. Ho hlahloba lintlha tsena ho tla re thusa ho bona kamoo re ka ‘emang re tiile kateng tumelong.’—1 Bakorinthe 16:13.

3. Ke hobane’ng ha Petrose a ile a tsoa ka seketsoaneng, hona re entse’ng e batlang e tšoana le seo?

³ Petrose o ne a e-na le tumelo e matla. Ke hobane’ng ha re bua joalo? Ha Jesu a mo bitsa, Petrose o ile a tsoa ka seketsoaneng ’me a tsamaea holim’a metsi. O ne a lumela hore matla a Molimo a tla mo nolofalletsa ho tsamaea holim’a metsi, feela joaloka Jesu. Le rōna ka ho tšoanang, ha Jesu a re mema hore re mo latele, re ile ra inehela ho Jehova ’me ra kolobetsoa. Hobane’ng? Hobane re lumela ho Jehova le ho Jesu ’me re tšepa hore ba tla re thusa.—Johanne 14:1; bala 1 Petrose 2:21.

4, 5. Ke hobane’ng ha tumelo e le letlotlo la bohlokoa?

⁴ Ke habohlokoa ho ba le tumelo. Tumelo e ile ea nolofalletsa Petrose ho tsamaea holim’a metsi, e leng ntho eo ho neng ho sa bonahale eka motho a ka e etsa. Le rōna tumelo e ka re nolofalletsa ho etsa lintho tseo ho sa bonahaleng eka li ka khoneha. (Matheu 21:21, 22) Ba bang ba rōna re fetotse mekhoa ea rōna ea pele hoo batho ba neng ba re tseba pele ba seng ba sa re elelloe. Re entse liphetoho tsena hobane re rata Jehova le hobane a re thusitse ho li etsa. (Bala Bakolose 3:5-10.) Tumelo e ile ea re susumelletsa hore re inehele ho Jehova, kahoo ra ba metsoalle ea hae, e leng seo re neng re ke ke ra se finyella ntle ho thuso ea hae.—Baefese 2:8.

⁵ Tumelo e etsa hore re be matla. Ka mohlala, e re thusa ho loantša litlhaselo tsa sera sa rōna se matla, e leng Diabolose. (Baefese 6:16) Hape, kaha re tšepile Jehova, ha ho hlokahale hore re tšoenyehe ka ho feteletseng ha re e-na le mathata. Jehova o tšepisitse hore o tla re fa seo re se hlokang haeba re e-na le tumelo ho eena, re bile re etelletsa ’Muso oa hae pele. (Matheu 6:30-34) Ho feta moo, Jehova o tla re fa mpho e babatsehang ea bophelo bo sa feleng hobane re e-na le tumelo.—Johanne 3:16.

6, 7. (a) Re ka ’na ra bapisa sefefo le maqhubu a ileng a tšosa Petrose le eng? (b) Ke hobane’ng ha re lokela ho hopola hore re ka ’na ra felloa ke tumelo?

⁶ Petrose o ile a tšoha ha a ntse a tsamaea holim’a metsi Leoatleng la Galilea. Hobane’ng? Hobane o ile a tšosoa ke sefefo le maqhubu. Re ka ’na ra bapisa sena le liteko tse ngata tseo Bakreste ba tobanang le tsona kajeno. Esita le haeba liteko tsena li le boima, Jehova a ka re fa matla e le hore re tobane le tsona ka katleho. Empa hopola se ileng sa etsahalla Petrose. Ha aa ka a teba ka lebaka la sefefo kapa maqhubu. Ho e-na  le hoo, Bibele e re: “Ha a sheba moea oa sefefo, a ba le tšabo.” (Matheu 14:30) Petrose o ile a khaotsa ho talima ho Jesu ’me a sheba sefefo se matla. Sena se ile sa fokolisa tumelo ea hae. Le rōna haeba re tsepamisa kelello mathateng a rōna, re ka ’na ra qala ho belaella hore Jehova o tla re thusa.

⁷ Re lokela ho hopola hore re ka felloa ke tumelo. Hobane’ng? Hobane Bibele e re ho felloa ke tumelo ke “sebe se re tšoasang habonolo.” (Baheberu 12:1) Ho tšoana le Petrose, haeba re tsepamisa kelello linthong tse fosahetseng, seo se ka fokolisa tumelo ea rōna ka potlako. Joale re ka tseba joang haeba tumelo ea rōna e se e fokola? Lipotso tse latelang li tla re thusa ho itlhahloba.

8. Ke lintho life tse ka ’nang tsa etsa hore re se hlole re nka litšepiso tsa Molimo e le tsa sebele joaloka pele?

⁸ Na ke nka litšepiso tsa Molimo e le tsa sebele joaloka pele? Ka mohlala, Molimo o tšepisa ho felisa lefatše lena la Satane. Empa na re ferekanngoa ke mefuta e sa tšoaneng ea boithabiso e fumanehang lefatšeng lee? Haeba ho joalo, re ka ’na ra qala ho belaella hore bofelo bo atametse. (Habakuke 2:3) Nahana ka mohlala o mong hape. Jehova o fane ka thekollo, ’me a tšepisa hore o tla re tšoarela liphoso. Empa haeba re tsepamisa kelello liphosong tseo re li entseng nakong e fetileng, re ka ’na ra qala ho belaella hore Jehova o fela a re tšoaretse. (Liketso 3:19) Ka lebaka leo, re ka ’na ra felloa ke thabo tšebeletsong ea Molimo ’me ra khaotsa ho bolella ba bang litaba tse molemo.

9. Ke’ng e ka etsahalang haeba re se re phathahane ka mabaka a rōna?

⁹ Na ke ntse ke fa Jehova se molemohali? Ha re sebetsa ka thata tšebeletsong ea Jehova, seo se re thusa ho tsepamisa kelello litšepisong tsa hae tsa nakong e tlang. Empa re lokela ho etsa’ng haeba re se re phathahane ka mabaka a rōna? Ka mohlala, re ka ’na ra amohela mosebetsi o lefang hantle, empa o re sitisa ho sebeletsa Jehova. Sena se ka re fokolisa tumelong, ’me kahoo ra qala ho khoehlisa tšebeletsong ea rōna ho Jehova.—Baheberu 6:10-12.

10. Ke joang re bontšang tumelo ho Jehova ha re tšoarela ba bang?

¹⁰ Na ke thatafalloa ho tšoarela ba bang? Na ha ba bang ba re khopisa kapa ba re utloisa bohloko, rea ba halefela kapa hona ho khaotsa ho ba buisa? Haeba ho joalo, mohlomong re ameha haholo ka maikutlo a rōna. Re bontša hore re na le tumelo ho Jehova ha re tšoarela ba bang. Ka tsela efe? Ha motho a re siteloa, o oa re kolota. Ha re siteloa Jehova, rea mo kolota. (Luka 11:4) Kahoo, ha re tšoarela ba  bang, re bontša hore re tšepa Jehova. Re tšepa hore o tla hlohonolofatsa boikutlo ba rōna, ’me ho hlohonolofatsoa ke eena ke habohlokoa ho feta ho lefisa motho e mong seo a re entseng sona. Barutuoa ba Jesu ba ile ba ithuta hore ho hlokahala tumelo hore motho a tšoarele ba bang. Ha Jesu a bolella barutuoa ba hae hore ba tšoarele esita le batho ba ba sitetsoeng ka makhetlo a mangata, ba ile ba mo kōpa, ba re: “Re fe tumelo e eketsehileng.”—Luka 17:1-5.

11. Ke hobane’ng ha re ka ’na ra thatafalloa ho amohela keletso?

¹¹ Na kea koata ha ke fuoa keletso? Ho e-na le ho batla liphoso keletsong eo u e fuoang kapa tsa motho ea u eletsang, batla litsela tseo u ka sebelisang keletso eo ka tsona. (Liproverbia 19:20) Sebelisa monyetla oo e le hore u ithute ho nahana joaloka ka Jehova!

12. E ka ’na eaba bothata ke bofe ha motho a lula a tletleba ka ba etellang pele?

¹² Na ke tletleba ka ba etellang pele ka phuthehong? Ka mor’a hore Baiseraele ba mamele tlaleho e mpe ea lihloela tse leshome, ba ile ba tletleba ka Moshe le Arone. Kahoo, Jehova a botsa Moshe, a re: “Sechaba see . . . se ke ke sa beha tumelo ho ’na . . . halelele hakae?” (Numere 14:2-4, 11) Ha e le hantle, Jehova o ne a tseba hore Baiseraele ha ba mo tšepe kaha ba ne ba tletleba ka Moshe le Arone, bao a neng a ba khethile. Ka ho tšoanang, haeba re lula re tletleba ka batho bao Jehova a ba sebelisang ho etella batho ba hae pele kajeno, sena se ka ’na sa bontša hore tumelo ea rōna ho Molimo e ea fokola.

13. Ke hobane’ng ha re sa lokela ho nyahama ha re hlokomela hore tumelo ea rōna e se e fokola?

¹³ Ka mor’a ho hlahloba lipotso tsena, u se ke ua nyahama haeba u hlokomela hore  tumelo ea hao e se e fokola. Hopola hore esita le moapostola Petrose o ile a tšoha ’me a qala ho ba le lipelaelo. Ka nako e ’ngoe, Jesu o ile a ba a khalemela baapostola bohle hobane ba ne ba e-na le “tumelo e nyenyane.” (Matheu 16:8) Leha ho le joalo, re ka ithuta thuto ea bohlokoa phihlelong ea Petrose. Ela hloko seo a ileng a se etsa ka mor’a hore a be le lipelaelo ’me a qale ho teba leoatleng.

14, 15. (a) Petrose o ile a etsa’ng ha a qala ho teba? (b) Re ka ‘talima ka hloko’ joang ho Jesu?

¹⁴ Petrose o ile a etsa’ng ha a qala ho teba? Petrose o ne a tseba ho sesa, kahoo o ne a ka ’na a sesa ho khutlela ka seketsoaneng. (Johanne 21:7) Empa ke hobane’ng ha a sa ka a etsa joalo? Ke hobane o ne a sa tšepa bohlale ba hae. O ile a boela a talima ho Jesu ’me a amohela thuso ea hae. Haeba re hlokomela hore tumelo ea rōna e ea fokola, re lokela ho etsisa Petrose. Re ka mo etsisa joang?

¹⁵ Feela joalokaha Petrose a ile a boela a talima ho Jesu hore a mo thuse, le rōna re lokela ‘ho talima ka hloko’ ho Jesu. (Bala Baheberu 12:2, 3.) Empa rōna re ke ke ra mo bona ka tsela ea sebele joaloka Petrose. Kahoo, re ka ‘talima ka hloko’ joang ho Jesu? Re lokela ho bala lintho tseo a ileng a li ruta le ho li etsa ’me re leke ho latela mehato ea hae haufi-ufi. Ha re etsa joalo, re tla fumana thuso eo re e hlokang hore re matlafale tumelong. A re hlahlobeng tse ling tsa litsela tseo re ka etsisang Jesu ka tsona.

16. Bibele e ka re thusa hore re matlafatse tumelo ea rōna joang?

¹⁶ Tšepa Bibele haholoanyane. Jesu o ne a kholisehile hore Bibele ke Lentsoe la Molimo le hore e fana ka keletso e molemohali. (Johanne 17:17) E le hore re etsise Jesu, re lokela ho bala Bibele letsatsi le letsatsi, re ithute eona ’me re thuise ka seo re ithutang sona. Re boetse re lokela ho etsa lipatlisiso ka lipotso tseo re ka ’nang ra ipotsa tsona. Ka mohlala, na u kholisehile ka ho feletseng hore re phela matsatsing a ho qetela? Hlahloba boprofeta ba Bibele bo bontšang hore re phela matsatsing a ho qetela, e le hore u ikholise hore bofelo bo atametse. Na u batla ho matlafatsa tumelo ea hao litšepisong tsa Molimo tsa nakong e tlang? Joale hlahloba boprofeta ba Bibele bo seng bo phethahetse. Na u kholisehile hore keletso e fanoeng ka Bibeleng e ka re thusa kajeno? U ka bala liphihlelo tsa bara le barali babo rōna bao Bibele e ileng ea ba thusa hore ba ntlafatse bophelo ba bona. * (Sheba naletsana.)—1 Bathesalonika 2:13.

17. Ke hobane’ng ha Jesu a ile a khona ho mamella liteko tse matla, hona u ka mo etsisa joang?

¹⁷ Tsepamisa kelello litlhohonolofatsong tseo Jehova a li tšepisitseng. Jesu o ne a tsepamisitse kelello litlhohonolofatsong tsa nakong e tlang, ’me sena se ile sa mo thusa hore a mamelle liteko tse matla. (Baheberu 12:2) Ha aa ka a ferekanngoa ke lintho tseo lefatše le li tšepisang. (Matheu 4:8-10) Re ka etsisa mohlala oa Jesu joang? Ka ho thuisa ka lintho tse babatsehang tseo Jehova a li tšepisitseng. Ipone u le lefatšeng le lecha. Ngola kapa u toroee lintho tseo u tla li etsa Paradeiseng. Kapa u etse lethathamo la batho ba tla tsosoa bafung bao u ka ratang ho buisana le bona le hore na u ka rata ho bua eng le bona. Talima litšepiso tsena tsa Molimo e  le tse lebisitsoeng ho uena ka ho toba, eseng ho batho ka kakaretso.

18. Thapelo e ka u thusa joang hore u matlafatse tumelo ea hao?

¹⁸ Rapella tumelo e eketsehileng. Jesu o ile a ruta barutuoa ba hae hore ba kōpe moea o halalelang ho Jehova. (Luka 11:9, 13) Ha u kōpa moea o halalelang, rapella le tumelo e eketsehileng. Ke tšobotsi e ’ngoe ea tholoana ea moea o halalelang. U lokela ho toba taba ha u rapela. Ka mohlala, haeba u hlokomela hore u thatafalloa ho tšoarela, kōpa Jehova hore a matlafatse tumelo ea hao ’me a u thuse hore u tšoarele ba bang.

19. Re ka khetha metsoalle ea sebele joang?

¹⁹ Khetha metsoalle e matla tumelong. Jesu o ile a khetha metsoalle ea hae ka hloko. Baapostola bao e neng e le metsoalle ea hae e haufi-ufi, ba ne ba tšepahala ba bile ba mo mamela. (Bala Johanne 15:14, 15.) Etsisa Jesu ’me u khethe metsoalle ea hao ka hloko. E lokela ho ba batho ba nang le tumelo e matla le ba mamelang Jesu. Metsoalle ea sebele e bolellana ’nete, esita le haeba ho hlokahala hore e fane ka keletso kapa e e amohele.—Liproverbia 27:9.

20. Ho tla etsahala’ng ha re thusa ba bang hore ba tiee tumelong?

²⁰ Thusa ba bang hore ba tiee tumelong. Jesu o ile a thusa barutuoa ba hae hore ba tiee tumelong ka seo a neng a se bua le ho se etsa. (Mareka 11:20-24) Re lokela ho etsisa mohlala oa Jesu. Ha re etsa joalo, re tla matlafatsa tumelo ea rōna le ea ba bang. (Liproverbia 11:25) U ka thusa batho ba tšimong ea lōna joang? Ha u ruta ba bang Bibele, totobatsa bopaki bo bontšang hore Molimo o teng le hore o oa re tsotella, esita le hore Bibele ke Lentsoe la Molimo. U ka etsa’ng ho thusa bara le barali beno hore ba lule ba le matla tumelong? Haeba u utloa e mong a tletleba ka barab’abo rōna ba etellang pele, u se ke ua potlakela ho mo qoba. Ka bohlale, leka ho mo thusa hore a tsosolose tumelo ea hae. (Juda 22, 23) Haeba u ntse u kena sekolo ’me tichere e bua ka khopolo ea ho iphetola ha lintho, e bolelle ka sebete hore u lumela hore lintho li bōpiloe. U ka ’na ua hlolloa ke tsela eo tichere ea hao le bana bao u kenang le bona ba ka ’nang ba arabela ka eona.

21. Jehova o re tšepisa eng?

²¹ Jehova le Jesu ba ile ba thusa Petrose hore a se hlole a e-ba le lipelaelo le tšabo. Ha nako e ntse e ea, Petrose e ile ea e-ba mohlala o motle oa tumelo ho ba bang. Ka tsela e tšoanang, Jehova o thusa e mong le e mong oa rōna hore a eme a tiile tumelong. (Bala 1 Petrose 5:9, 10.) Re lokela ho etsa boiteko e le hore re be matla tumelong, ’me Jehova o tla putsa boiteko boo ba rōna.