Babali ba Batla ho Tseba

Ke Hobane’ng ha Lipaki Tsa Jehova li sa ee Ntoeng?

Hohle moo Lipaki Tsa Jehova li lulang teng hoa tsebahala hore ha li kopanele lintoeng tsa lichaba kapa tsa lehae. Lilemong tse ka bang 50 tse fetileng Australian Encyclopædia e ile ea re: “Lipaki Tsa Jehova ha li nke lehlakore ka ho feletseng nakong ea ntoa.”

Lebaka le leholo le etsang hore Lipaki li se ke tsa kopanela ntoeng ke hore kaha ke Bakreste, ho etsa joalo ho ne ho tla ba khahlanong le letsoalo la bona. Letsoalo la bona le koetlisitsoe ke melao le mohlala oa Morena Jesu Kreste. O ile a laela balateli ba hae hore ba rate baahelani ba bona. Hape o ile a re: “Tsoelang pele ho rata lira tsa lōna, ho etsetsa ba le hloileng se molemo.” (Luka 6:27; Matheu 22:39) Ha morutuoa e mong oa Jesu a ne a leka ho mo sireletsa ka sabole, o ile a re: “Khutlisetsa sabole ea hao sebakeng sa eona, kaha bohle ba nkang sabole ba tla timela ka sabole.” (Matheu 26:52) Kahoo, Jesu o ile a bua ka molomo a ba a bontša ka liketso hore balateli ba hae ha baa lokela ho sebelisa libetsa.

Lebaka le leng leo ka lona Lipaki Tsa Jehova li sa eeng lintoeng ke hore bolumeli ba tsona bo na le litho lefatšeng ka bophara. Ntoa e ka etsa hore litho tsa bolumeli bo le bong li loantšane, ’me seo se khahlanong le taelo ea Jesu ea hore ‘li be le lerato har’a tsona.’​—Johanne 13:35.

Melao-motheo ena e boletsoeng e amanang le lerato hase ntho eo Lipaki Tsa Jehova li buang ka eona feela, ho e-na le hoo, li phela ka eona. Ka mohlala, hlahloba seo li ileng tsa se etsa Ntoeng ea II ea Lefatše ka 1939-1945. United States, Lipaki Tsa Jehova tse fetang 4 300 li ile tsa kenngoa lichankaneng kahobane li ne li hanne ho ea ntoeng. Brithani, batho ba fetang 1 500 ho akarelletsa le basali ba fetang 300 ba ile ba kenngoa chankaneng ka lebaka la ho hana ho etsa mesebetsi e amanang le ntoa. Jeremane ea Bonazi, Lipaki tse fetang 270 li ile tsa bolaoa ke ’Muso kahobane li ile tsa hana ho ea ntoeng. Pusong ea Bonazi, Lipaki tse fetang 10 000 li ile tsa kenngoa chankaneng kapa tsa isoa likampong tseo batšoaruoa ba neng ba hlorisetsoa ho tsona. Lipaki tsa Japane li ile tsa sotloa haholo. Batho leha e le bafe ba ileng ba shoeloa ke baratuoa ba bona Ntoeng ea II ea Lefatše—kapa ntoeng leha e le efe ka mor’a eo—ba tsebe hore ha ho Paki ea Jehova le e ’ngoe e ikarabellang mafung ao.

Tsela eo Lipaki Tsa Jehova li ikutloang ka eona ka ntoa e hlalositsoe ka bokhabane mantsoeng a ho qetela a Wolfgang Kusserow. Ka 1942 Manazi a ile a khaola hlooho ea mohlankana enoa ea lilemo li 20 oa Mojeremane hobane a ile a hana ho ea ntoeng. (Esaia 2:4) Ha a le ka pel’a lekhotla la toka la sesole o ile a re: “Ke hōlisitsoe ke le Paki ea Jehova, ho latela lentsoe la Molimo le fumanehang Mangolong a Halalelang. Molao o moholo le o halalelang ka ho fetisisa oo a o fileng batho ke o reng: ‘U lokela ho rata Molimo oa hao ho feta tse ling tsohle ’me u rate moahelani oa hao joalokaha u ithata.’ Melao e meng e re: ‘U se ke ua bolaea.’ Na ’Mōpi oa rōna o ne a ngolla lifate melao ee?”​—Mareka 12:29-31; Exoda 20:13.

Lipaki Tsa Jehova li lumela hore ke Jehova feela, Molimo ea matla ’ohle, ea tla tlisa khotso e sa feleng lefatšeng. Li tšepile eena hore o tla phetha tšepiso ea hae ea ho “felisa lintoa ho isa pheletsong ea lefatše.”—Pesaleme ea 46:9.