Moea o Halalelang​—ke Matla ao U a Hlokang Bophelong

“U SE ke ua ntahlela hōle le sefahleho sa hao; u se ke ua tlosa moea oa hao o halalelang ho ’na.” (Pesaleme ea 51:11) Ena e bile thapelo e matla ea Morena Davida ka mor’a hore a etse phoso e khōlō.

Ka makhetlo, Davida o ne a ile a fumana matla a moea o halalelang bophelong ba hae. Ha a sa le mocha, matla ao a ile a mo thusa hore a hlōle Goliathe eo e neng e le lesole le tšosang. (1 Samuele 17:45-50) Hape a ile a mo thusa hore a ngole tse ling tsa lipesaleme tse monate ka ho fetisisa. Davida o ile a hlalosa: “Moea oa Jehova ke oona o buileng ka ’na, lentsoe la hae le ne le le lelemeng la ka.”—2 Samuele 23:2.

Jesu Kreste ka boeena o ile a tiisa hore moea o halalelang o ile oa thusa Davida bophelong ba hae. Ka lekhetlo le leng Jesu o ile a bolella bamameli ba hae, a re: “Ka moea o halalelang Davida o ile a re, ‘Jehova o itse ho Moren’a ka: “Lula ka letsohong la ka le letona ho fihlela ke beha lira tsa hao tlas’a maoto a hao.”’” (Mareka 12:36; Pesaleme ea 110:1) Jesu o ne a tseba hore ha Davida a ne a ngola lipesaleme, o ne a tataisoa ke moea o halalelang. Na moea oo o ntse o ka re thusa le kajeno?

 “Le ’ne le Kōpe, ’me le Tla Fuoa”

Mohlomong le ka mohla u ke ke ua ngola pesaleme. Empa u ka ’na ua thulana le mathata a tšabehang joalokaha eka u talimane le Goliathe oa seqhenqha. Ka mohlala, nahana ka Isabel. * Monna oa hae o ile a mo siea ’me a ea lula le mosali e mong ea monyenyane. O ile a mo siea ka har’a sekoloto se seholo ’me a se ke a mo thusa ka chelete ea ho hlokomela barali ba bona ba babeli ba neng ba sa le banyenyane. Isabel o re: “Ke ile ka utloa a ntsoile tlaase a bile a ntšoere joaloka sekatana. Leha ho le joalo, haesale a ntšiea, ke lemohile hore moea o halalelang oa Molimo o ’nile oa ntšehetsa.”

Na Isabel o ne a lebeletse hore ho tla iketsahalla feela hore a fumane moea o halalelang? Che, ho e-na le hoo, letsatsi le leng le le leng o ne a kōpa Molimo hore a mo fe moea oa hae. O ne a tseba hore o hloka matla a tsoang ho Molimo e le hore a mo thuse ho tiea lengole, hore a hlokomele bana ba hae hantle hammoho le hore a boele a inke a e-na le thuso bophelong. O ile a nka mantsoe a Jesu ka ho teba, a reng: “Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa.”—Matheu 7:7.

Roberto le eena o ile a hlokomela hore o hloka moea oa Molimo, le hoja e ne e le ka lebaka le fapaneng. O ne a lemalletse koae le matekoane ’me o ne a li tsuba kamehla. O ile a qeta lilemo tse peli a leka ka matla ho khaotsa ho ba lekhoba la tsona, empa ka linako tse ling o ne a iphumana a boetse a li tsuba. Roberto o re: “Ha u khaotsa ho sebelisa lithethefatsi, u sotleha maikutlong kaha ’mele o lula o li batla letsatsi le letsatsi.”

Roberto o tsoela pele: “Empa ke ne ke ikemiselitse ho fetola bophelo ba ka e le hore nka sebeletsa Molimo ka tsela eo a e amohelang. Ke ile ka leka ho lula ke nahana ka lintho tse hahang tse hlahang ka Bibeleng. Letsatsi le letsatsi ke ne ke rapela ka tieo, ke kōpa Molimo hore a mphe matla e le hore ke hloekise bophelo ba ka. Ke ne ke tseba hore nke ke ka atleha ntle ho thuso ea hae. Ke ile ka bona kamoo Jehova a ileng a araba lithapelo tsa ka kateng, haholo-holo nakong eo ke nyahameng haholo ka mor’a hore ke boele ke tsube. Ke lumela hore moea o halalelang oa Molimo o ile oa mpha matla a macha; ntle ho moea oa hae, nka be ke sa khona ho hlōla mokhoa oo ke neng ke u lemaletse.”—Bafilipi 4:6-8.

Ho Nyoloha “ka Mapheo a Kang a Ntsu”

Joaloka Isabel le Roberto, Lipaki Tsa Jehova tse limilione li ’nile tsa fumana matla a moea o halalelang bophelong ba tsona. Matla a sebetsang a Jehova—e leng matla a bōpileng leholimo le lefatše—u ka a fumana, haeba u a batla. Molimo o ikemiselitse ebile o chesehela ho u fa moea oa hae haeba u o kōpa ka tieo. Empa re lokela hore re ithute ’nete ka eena ’me re batle ho etsa thato ea hae ka pelo eohle e le hore re tle re fumane moea oo.—Esaia 55:6; Baheberu 11:6.

Ka thuso ea matla a moea o halalelang, u ka fumana matla a ho sebeletsa Molimo ka katleho hammoho le ho mamella mathata leha e le afe a ka u hlahelang bophelong. Sena ke seo Bibele e re tiisetsang sona: “[Jehova] o fana ka matla ho ea khathetseng; ’me o etsa hore matla a feletseng a atele ea se nang matla. . . . Ba tšepileng Jehova ba tla boela ba fumane matla. Ba tla nyoloha ka mapheo a kang a ntsu. Ba tla matha ’me ba ke ke ba tepella; ba tla tsamaea ’me ba ke ke ba khathala.”—Esaia 40:28-31.

[Mongolo o botlaaseng ba leqephe]

[Ntlha e Qolotsoeng e leqepheng la 8]

‘Letsatsi le letsatsi ke ne ke rapela ka tieo, ke kōpa Molimo hore a mphe matla. Ke ne ke tseba hore nke ke ka atleha ntle ho thuso ea hae. Ke ile ka bona kamoo a ileng a araba lithapelo tsa ka kateng’

 [Lebokose/Litšoantšo tse leqepheng la 7]

MESEBETSI EA MOEA O HALALELANG

Molimo o ile a sebelisa moea o halalelang hore a bōpe lefatše le lintho tsohle tse bokahohleng. Mopesaleme o ile a re: “Jehova, mesebetsi ea hao e mengata hakaakang! Kaofela ha eona u e entse ka bohlale. Lefatše le tletse lihlahisoa tsa hao. Ha u romela moea oa hao, lia bōptjoa.”—Pesaleme ea 104:24, 30; Genese 1:2; Jobo 33:4.

Moea o halalelang o ile oa susumetsa banna ba tšabang Molimo hore ba ngole Bibele. Moapostola Pauluse o ile a ngola, a re: “Lengolo lohle le bululetsoe ke Molimo ’me le molemo.” (2 Timothea 3:16) Poleloana ea Segerike e fetoletsoeng e le “bululetsoe ke Molimo” ha e le hantle e bolela hore “le phefumolohetsoe ke Molimo.” Phefumoloho ea Jehova, kapa moea oa hae, ke eona e ileng ea tataisa mehopolo ea bangoli ba Bibele e le hore ba ka fetisa “lentsoe la Molimo.”—1 Bathesalonika 2:13.

Moea o halalelang o ile oa fa bahlanka ba Molimo matla a hore ba profete se nepahetseng. Moapostola Petrose o ile a re: “Ha ho boprofeta ba Lengolo bo hlahang tlhalosong leha e le efe ea botho. Etsoe ha ho nako eo ka eona boprofeta bo ileng ba tlisoa ke thato ea motho, empa batho ba ile ba bua ho tsoa ho Molimo ha ba ntse ba khannoa ke moea o halalelang.”—2 Petrose 1:20, 21; Joele 2:28.

Moea o halalelang o ile oa thusa Jesu le banna ba bang ba neng ba e-na le tumelo hore ba bolele litaba tse molemo tsa ’Muso oa Molimo le ho etsa mehlolo. Jesu o ile a re: “Moea oa Jehova o holim’a ka, hobane o ntlotselitse hore ke bolelle mafutsana litaba tse molemo, o nthometse hore ke bolelle baholehuoa tokollo le hore ba foufetseng ba boele ba bone.”—Luka 4:18; Matheu 12:28.

 [Lebokose/Litšoantšo tse leqepheng la 9]

KAMOO MOEA O HALALELANG O KA RE THUSANG KATENG

Moea o halalelang o ka u matlafatsa e le hore u loantše liteko le ho hlōla mekhoa e kotsi eo u e tloaetseng. Moapostola Pauluse o ile a re: “Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.”—1 Bakorinthe 10:13.

Moea o halalelang o ka u thusa hore u leke ka matla ho ba le litšobotsi tse khahlisang Molimo. “Litholoana tsa moea ke lerato, thabo, khotso, tiisetso, mosa, molemo, tumelo, bonolo, boitšoaro.”—Bagalata 5:22, 23.

Moea o halalelang o ka u fa matla a ho mamella liteko. “Bakeng sa lintho tsohle ke na le matla ka lebaka la ea mphang bonatla.”—Bafilipi 4:13.