Ruta Bana ba Hao

Jesu o Ile a Ithuta ho Mamela

NA KA linako tse ling u ee u utloe ho le thata ho mamela?— * Ha ho makatse haeba u ee u ikutloe joalo. Motho e mong le e mong u ee a utloe ho le thata ho mamela ka linako tse ling. Na ua tseba hore Jesu le eena o ile a ithuta ho mamela?—

Na ua tseba hore na bana ba lokela ho mamela mang?— Ehlile, ba lokela ho mamela ’Mè le Ntate. Bibele e re: “Le mamele batsoali ba lōna bonngoeng le Morena.” (Baefese 6:1) Ntate oa Jesu ke mang?— Ke Jehova Molimo, ’me le rōna ke Ntate oa rōna. (Matheu 6:9, 10) Empa, haeba u itse Josefa ke ntate oa Jesu ’me Maria ke ’mè oa hae, u ntse u nepile. Na ua tseba hore na ho tlile joang hore e be batsoali ba hae?—

Lengeloi Gabriele le ile la joetsa Maria hore na o ne a tla ba le ngoana joang le hoja a ne a e-s’o kopane le monna. Jehova o ile a etsa hore seo se phethahale ka hore a etse mohlolo o moholo. Gabriele o ile a hlalosetsa Maria a re: “Matla a Ea Phahameng ka ho Fetisisa a tla u koahela. Ka lebaka leo le se tsoetsoeng se tla bitsoa se halalelang, Mor’a Molimo.”—Luka 1:30-35.

Molimo o ile a nka bophelo ba Mora oa hae leholimong ’me a bo kenya ka har’a Maria. Joale bophelo boo bo ile ba hōla ka hare ho eena feela joalokaha bana ba bang ba hōlela ka ho bo-’mè ba bona. Ka mor’a likhoeli tse robong, Jesu o ile a hlaha. Ka nako eona eo, Josefa le Maria ba ne ba nyalane, ’me batho ba bangata ba ne ba nahana hore Josefa ke ntate oa Jesu. Ha e le hantle, Josefa e ne e le ntate ea neng a hōlisa Jesu. Ka mantsoe a mang, Jesu o ne a e-na le bo-ntate ba babeli!

Ha Jesu a le lilemo li 12 feela, o ile a etsa ntho e ’ngoe e neng e bontša kamoo a ratang Ntate oa hae ea leholimong, Jehova, kateng. Ka nako eo, joaloka tloaelo, Jesu le lelapa labo ba ile ba nka leeto le lelelele ho ea Pasekeng Jerusalema. Ka mor’a moo, ha ba le tseleng e khutlelang hae Nazaretha, Josefa le Maria ba ile ba lemoha hore Jesu o ne a le sieo har’a bona. Na ebe ua ipotsa hore na ho tlile joang hore ba mo lebale?—

Ka nako eo, Josefa le Maria ba ne ba se ba e-na le bana ba bang. (Matheu 13:55, 56) Mohlomong ba ne ba bile ba tsamaea le beng ka bona ba bang, ba kang Jakobo le Johanne hammoho le ntate oa bona, Zebedea le ’mè oa bona Salome, eo e ka ’nang eaba e ne e le ausi oa Maria. Ka hona, e ka ’na eaba Maria o ne a nahana hore Jesu o na le ba bang ba lelapa kae-kae sehlopheng seo.—Matheu 27:56; Mareka 15:40; Johanne 19:25.

Ha Josefa le Maria ba elelloa hore Jesu ha a eo, kapele-pele ba khutlela Jerusalema. Ba ile ba batla mora eo oa bona ba tsielehile haholo. Ka letsatsi la boraro ba ile ba mo fumana tempeleng. Maria o ile a re ho eena: “Ke hobane’ng ha u re entse tjee? Bona! ’na le ntat’ao re ’nile ra u batla re khathatsehile.” Empa Jesu a re ho bona: “Ke hobane’ng ha le ne le lokela ho tsamaea le mpatla? Na le ne le sa tsebe hore ke tla ba ka tlung ea Ntate?”—Luka 2:45-50.

Na u nahana hore Jesu ha aa ka a bua hantle le ’mè oa hae?— Batsoali ba hae ba ne ba tseba hore Jesu o ne a rata ho ea rapela ntlong ea Molimo. (Pesaleme ea  122:1) Ka hona, ha ho pelaelo hore Jesu o ne a tla nahana hore sebaka sa pele seo ba neng ba tla mo sheba ho sona ke tempeleng ea Molimo.— Ka mor’a moo, Maria o ile a lula a nahana ka seo Jesu a se boletseng.

Jesu o ne a ikutloa joang ka Josefa le Maria?— Bibele e re: “[Jesu a] theoha le bona [a] tla Nazaretha, ’me a tsoela pele ho ipeha tlas’a bona.” (Luka 2:51, 52) Re ithuta’ng mohlaleng oa Jesu?— E, le rōna re lokela ho mamela batsoali ba rōna.

Empa ho ne ho se bonolo kamehla ho Jesu ho mamela—haesita le ho mamela Ntate oa hae ea leholimong.

Bosiung ba pele a e-shoa, Jesu o ile a kōpa Jehova hore na A ke ke a fetola monahano oa hae mabapi le seo a neng a batla hore a se etse. (Luka 22:42) Leha ho le joalo, Jesu o ile a mamela Molimo le hoja ho ne ho se bonolo. Bibele e re “o ile a ithuta ho mamela linthong tseo a ileng a utloisoa bohloko ke tsona.” (Baheberu 5:8) Na u nahana hore le rōna re ka ithuta thuto eo?—

[Mongolo o botlaaseng ba leqephe]

LIPOTSO:

▪ Ho tlile joang hore Maria e be ’mè oa Jesu, hona ho tlile joang hore Jesu a be le bo-ntate ba babeli?

▪ Ke hobane’ng ha batsoali ba Jesu ba sa ka ba lemoha hore ba ne ba mo siile morao?

▪ Jesu o ne a lebeletse hore batsoali ba hae ba mo shebe hokae?

▪ U ka ithuta eng mohlaleng oa Jesu?

[Setšoantšo se leqepheng la 31]

Ke hobane’ng ha u nahana hore e ne e tlameha ebe Josefa le Maria ba ile ba ea tempeleng pele ho ea sheba Jesu?