Bontša Tumelo e Tšoanang le ea Bona

O Ithutile ho Tšoarela ho Mong’a Hae

LE KA mohla Petrose o ne a ke ke a lebala motsotso oo o bohloko oa ha ba ne ba teanya mahlo. Na ebe tsela eo Jesu a ileng a mo sheba ka eona e ne e bontša ho soetseha ho itseng kapa hona ho soaba? Moo re ke ke ra tseba; tlaleho ea Bibele e re feela ‘Morena o ile a reteleha a sheba Petrose.’ (Luka 22:61) Empa ha a mo sheba, hang-hang Petrose o ile a hlakeloa hore o entse phoso e tebileng. O ile a hlokomela hore o entse eona ntho eo Jesu a neng a ile a re o tla e etsa, eo eena Petrose a ileng a re ho hang a ke ke a e etsa—o ne a latotse Mong’a hae eo a mo ratang. Petrose o ile a tetebela haholo maikutlong, ebile e ka ’na eaba ke eona nako eo ka eona a ileng a nyahama ka ho fetisisa bophelong bohle ba hae.

Leha ho le joalo, tšepo e ne e ntse e le teng. Kaha Petrose o ne a e-na le tumelo e matla, o ne a ntse a e-na le monyetla oa ho hlaphoheloa liphosong tsa hae le ho ithuta e ’ngoe ea lithuto tsa Jesu tsa bohlokoa haholo. Thuto eo e ne e le ea ho tšoarela. Kaofela ha rōna re lokela ho ithuta thuto ena, ka hona, a re hlahlobeng hore na Petrose o ile a ithuta eona joang, le hoja ho ne ho se bonolo.

Monna ea Neng a Lokela ho Ithuta ho Hongata

Hoo e ka bang likhoeli tse tšeletseng pejana, ha Petrose a le motseng oa habo oa Kapernauma, o ile a botsa Jesu potso ena: “Morena, ke ka makhetlo a makae mor’eso a lokelang ho ntšiteloa ’me ke mo tšoarele? Ho fihlela makhetlong a supileng?” E ka ’na eaba Petrose o ne a nahana hore ka ho bua mantsoe ao, o bontša ho se fele pelo. Etsoe baeta-pele ba bolumeli ba mehleng eo ba ne ba ruta hore motho o ne a ka tšoareloa ka makhetlo a mararo feela! Jesu o ile a mo araba, a re: “Eseng, Ho fihlela makhetlong a supileng, empa, Ho fihlela makhetlong a mashome a supileng a metso e supileng.”—Matheu 18:21, 22.

Na Jesu o ne a re Petrose o lokela ho tšoaea hore na motho o mo sitetsoe hakae? Che; ho e-na le hoo, ha a re makhetlo a 7 ao Petrose a buileng ka ’ona e lokela ho ba a 77, o ne a bontša hore motho ha aa lokela ho bala hore na o tšoaretse e mong ka makhetlo a makae. Jesu o ile a bontša hore Petrose o ne a susumelitsoe ke moea oa ho hloka kutloelo-bohloko le oa ho se tšoarele o neng o atile mehleng eo, o neng o etsa hore batho ba tšoaee lekhetlo le leng le le leng leo ba tšoarelang motho ka lona joalokaha eka ba etsa tlaleho ea sekoloto. Leha ho le joalo, tšoarelo e thehiloeng melaong ea Molimo e khōlō haholo, e bontša ho se fele pelo.

Petrose ha aa ka a phehisa Jesu khang. Empa na thuto eo ea Jesu e ne e hlile e kene pelong ea hae? Ka linako tse ling re ithuta bohlokoa ba ho tšoarela ha re le mohaung oa ba bang hore ba re tšoarele. Kahoo, a re hlahlobeng lintho tse ileng tsa etsahala pele Jesu a bolaoa. Lihoreng tseo tse thata ka ho fetisisa, Petrose o ile a etsa lintho tse ngata tseo ho neng ho tla hlokahala hore Mong’a hae a mo tšoarele ka lebaka la tsona.

Lintho Tse Ngata Tse Ileng Tsa Etsa Hore a Hloke ho Tšoareloa

E ne e le shoalane ea bohlokoa haholo kaha e ne e le bosiu ba ho qetela Jesu a phela lefatšeng. Leha ho le joalo, Jesu o ne a ntse a e-na le lintho tse ngata tseo a lokelang ho li ruta baapostola ba hae—ka mohlala, tabeng ea boikokobetso. Jesu o ile a ba behela mohlala ka hore ka boikokobetso a ba hlatsoe maoto, e leng mosebetsi oo ka tloaelo o  neng o fuoa bahlanka ba tlaase ka ho fetisisa. Qalong Petrose o ne a e-na le khoao mabapi le seo Jesu a se etsang. Eaba o hana ha a mo hlatsoa maoto. Ka mor’a moo, a tsitlella hore Jesu a se ke a mo hlatsoa maoto feela, empa a be a mo hlatsoe matsoho hammoho le hlooho! Jesu ha aa ka a mo fella pelo, empa ka bonolo bohle o ile a mo hlalosetsa bohlokoa ba seo a se etsang le hore na se bolela eng.—Johanne 13:1-17.

Leha ho le joalo, nakoana ka mor’a moo baapostola ba ile ba qala ho pheha khang ka hore na e moholo ho bona ke ofe. Ha ho pelaelo hore Petrose le eena o ne a le teng ketsahalong eo e soabisang e bontšang boikhohomoso boo batho ba nang le bona. Leha ho le joalo, Jesu o ile a ba khalemela ka mosa, a ba a ba babatsa ka ntho e ntle eo ba e entseng—e leng ea ho lula ba tšepahala ho Mong’a bona. Empa o ile a boela a bolela esale pele hore kaofela ha bona ba ne ba tla mo lahla. Petrose o ile a re eena o tla khomarela Jesu esita le haeba a talimane le lefu. Jesu o ile a profeta hore ho e-na le hoo, Petrose o ne a tla latola Mong’a hae ka makhetlo a mararo hona bosiung boo pele mokoko o lla habeli. Joale Petrose o ile a hanyetsa Jesu, a ba a ikotla sefuba ka hore eena o tla tšepahala le ho feta baapostola ba bang kaofela!—Matheu 26:31-35; Mareka 14:27-31; Luka 22:24-28.

Na Jesu o ne a se a fella Petrose pelo? Ha e le hantle, nakong ena eohle e mahlonoko, Jesu o ile a lula a sheba liketso tse ntle tsa baapostola ba hae ba sa phethahalang. O ne a tseba hore Petrose o tla mo siteloa, empa o ile a re: “Ke u etselitse thapeli hore tumelo ea hao e se ke ea fela; ’me uena, hang feela ha u khutlile, u matlafatse barab’eno.” (Luka 22:32) Ka tsela eo, Jesu o ne a bontša hore o kholisehile hore Petrose o ne a tla hlaphoheloa moeeng ebe o khutlela tšebeletsong ea hae ka botšepehi. Boo e bile boikutlo bo botle hakaakang ba ho ba mosa le ho tšoarela!

Hamorao ha ba le serapeng sa Gethesemane, ho ile ha hlokahala hore Petrose a khalemeloe ka makhetlo a ’maloa. Jesu o ile a kōpa eena Petrose, hammoho le Jakobo le Johanne hore ba lule ba lebetse ha eena A ntse a rapela. Jesu o ne a sithabetse maikutlo habohloko ’me a hloka ho tšehetsoa, empa Petrose le bao a nang le bona ba ile ba robala ka makhetlo a mangata. Jesu o ile a bua mantsoe ana a bontšang kutloelo-bohloko le moea oa ho tšoarela: “Ka ho hlakileng, moea o na le tabatabelo, empa nama ea fokola.”—Mareka 14:32-38.

Ho e-s’o ee kae, ha fihla mokhopi oa batho ba nkileng lirumula ba bileng ba hlometseng ka lisabole le melangoana. Ena e ne e le nako ea ho ba hlokolosi le ho etsa lintho ka bohlale. Leha ho le joalo, ho e-na le hore Petrose a nahane, ka lepotlapotla a hula sabole a e tsoka hloohong ea Malkuse, e leng lekhoba la moprista ea phahameng, ’me a mo hlatha tsebe. Jesu o ile a khalemela Petrose ka bonolo, a folisa tsebe ea monna eo ’me a fana ka molao-motheo oa ho se be mabifi oo le kajeno o ntseng o tataisa balateli ba hae. (Matheu 26:47-55; Luka 22:47-51; Johanne 18:10, 11) Petrose o ne a se a entse liphoso tse ngata tseo Mong’a hae a neng a lokela ho mo tšoarela ka tsona. Sena se re hopotsa hore “kaofela re khoptjoa hangata.” (Jakobo 3:2) Ke mang ho rōna ea sa hlokeng ho tšoareloa ke Molimo letsatsi le leng le le leng? Leha ho le joalo, seo Petrose a ileng a se etsa bosiung boo e ne e sa le linyane feela, e ne e le hona likhōlō li sa ntseng li tla.

Phoso e Soabisang ka ho Fetisisa ea Petrose

Jesu o ile a buisana le mokhopi oo, a re haeba o batla eena, o tlohele baapostola ba hae ba ikele. Petrose o ile a shebella ka pelo e bohloko empa ho se seo a ka se etsang ha mokhopi oo o tlama Jesu. Ka mor’a moo, eaba Petrose oa baleha hammoho le baapostola ba bang.

Petrose le Johanne ba ile ba khaotsa ho matha, mohlomong ha ba le haufi le ntlo ea Anase, eo e neng e kile ea e-ba Moprista ea Phahameng, moo Jesu a ileng a isoa teng pele ho ea hlongoa lipotso. Ha Jesu a tlosoa moo, Petrose le Johanne ba ile ba ba latela empa ba “le hōle.” (Matheu 26:58; Johanne 18:12, 13) Petrose e ne e se lekoala. Ha ho pelaelo hore ho ne ho hlokahala sebete hore motho a latele mokhopi oo oa batho ba hlometseng bao Petrose a neng a se a bile a lemalitse e mong oa bona. Leha ho le joalo, ha re bone mohlala oa lerato leo Petrose a ileng a re o tla le bontša ka botšepehi—e  leng oa ho ikemisetsa ho shoa le Mong’a hae haeba ho hlokahala.—Mark 14:31.

Joaloka Petrose, ba bangata kajeno ba batla ho latela Kreste ba “le hōle”—ka tsela eo batho ba bang ba ke keng ba elelloa hore baa mo latela. Empa joalokaha hamorao Petrose a ile a ngola, mokhoa o nepahetseng oa ho latela Kreste ke oa ho mo khomarela ka hohle kamoo re ka khonang, re etsise mohlala oa hae linthong tsohle, ho sa tsotellehe hore na liphello e tla ba life.—1 Petrose 2:21.

Petrose o ile a latela mokhopi a patile mohoasa a ba a fihla hekeng ea e ’ngoe ea matlo a maholohali a Jerusalema. E ne e le ha moprista ea phahameng, Kaifase, ea neng a ruile a bile a e-na le tšusumetso e matla. Hangata matlo a joalo a ne a hahuoa ho pota-pota lebala, ebe ho ba le heke ka pele. Petrose o ile a fihla hekeng empa a haneloa ho kena. Eaba Johanne, ea neng a se a kene ka hare, o buisana le molebeli oa heke hore a lumelle Petrose ho kena. Ho bonahala Petrose a sa ka a ema haufi le moo Johanne a leng hona teng; ebile ha aa ka a leka ho kena ka tlung e le hore a eme haufi le Mong’a hae. O ile a ema ka lebaleng, moo makhoba a mang le bahlanka ba neng ba orile khanare ea mollo bosiung boo bo batang, ba shebeletse ha lipaki tsa bohata tse qosang Jesu li ntse li tsoa li kena ka moo nyeoe e tšoaretsoeng ka teng.—Mareka 14:54-57; Johanne 18:15, 16, 18.

Ka lebaka la khanya ea mollo, ngoanana ea neng a lumeletse Petrose hore a kene hekeng o ile a khona ho mo bona hantle. O ne a mo tseba. Eaba oa mo qosa o re: “Le uena u ne u e-na le Jesu Mogalilea!” Kaha o ne a sa lebella sena, Petrose o ile a latola hore o tseba Jesu—a ba a re ha a utloisise le hore na ha e le hantle ngoanana eo o bua ka eng. O ile a leka ho ipata, eaba oa tloha o il’o ema haufi le tsela e lebang hekeng, empa ngoanana e mong a mo hlokomela ’me a bua ntho e tšoanang, a re: “Monna enoa o ne a e-na le Jesu Monazaretha.” Petrose o ile a hlapanya a re: “Monna eo ha ke mo tsebe!” (Matheu 26:69-72) Mohlomong ka mor’a hore Petrose a latole Jesu lekhetlong lena la bobeli ke hona moo a ileng a utloa ha mokoko o lla, empa o ne a ferekantsoe ke lintho tse ngata hoo a sa kang a hopola boprofeta boo Jesu a neng a bo boletse lihora tse ’maloa pejana.

Nakoana ka mor’a moo, Petrose o ne a ntse a leka ka matla hore batho ba se ke ba mo lemoha. Empa sehlopha sa batho ba emeng lebaleng se ile sa atamela. E mong sehlopheng seo o ne a amana le Malkuse, e leng lekhoba leo Petrose a ileng a le lematsa. O ile a re ho Petrose: “Ke u bone ka serapeng u e-na le eena, na ha ho joalo?” Petrose o ile a ikutloa a tlameha ho ba kholisa hore seo ba se buang hase ’nete. Kahoo, a hlapanya hore ha a mo tsebe, e leng seo ha e le hantle se neng se bolela hore a oeloe ke bomalimabe haeba a bua leshano. Hang hoba a qete ho bua, mokoko oa lla—’me e ne e le lekhetlo la bobeli Petrose a o utloa bosiung boo.—Johanne 18:26, 27; Mareka 14:71, 72.

Jesu o ne a qeta ho tsoela ka ntle mathuleng a ntlo a shebile lebaleng. Motsotsong oo, mahlo a hae a ile a teana le a Petrose joalokaha ho hlalositsoe qalong. Hang-hang Petrose o ile a hlakeloa hore na o ne a sitetsoe Mong’a hae hakaakang.  Eaba o tloha lebaleng moo a sithabelitsoe ke letsoalo le molato ka lebaka la sebe sa hae. O ile a leba literateng tsa motse a bona tsela e le lerootho kaha khoeli e ne e se e il’o likela. Kae-kae ha re fi! ha meokho e tlala ka mahlong. Eaba o sitoa ho itšoara ’me o qala ho lla habohloko.—Mareka 14:72; Luka 22:61, 62.

Ha motho a elelloa ho teba ha phoso ea hae, ho bonolo hore a nahane hore sebe sa hae se tebile hoo a ke keng a tšoareloa. E ka ’na eaba Petrose le eena o ile a ipotsa seo. Na ebe o ne a tla tšoareloa?

Na Phoso ea Petrose e ne e le e ke Keng ea Tšoareloa?

Petrose o tlameha a ne a utloile bohloko boo re sitoang ho bo nahana ha mafube a hlaha ’me ho etsahala lintho tse ling letsatsing leo. E tlameha ebe o ile a itšola hakaakang ha Jesu a shoa thapameng ea letsatsi leo ka mor’a hore a hlokofatsoe lihora tse ngata! E tlameha ebe Petrose o ne a sehoa ke mala a masesaane nako le nako ha a nahana kamoo a tlatselitseng kateng ho utloiseng Mong’a hae bohloko letsatsing la Hae la ho qetela a phela lefatšeng. Ho sa tsotellehe ho nyahama ho tebileng ha Petrose, ha aa ka a tela. Re bua joalo hobane tlaleho e re nakoana ka mor’a moo o ne a e-na le barab’abo hape. (Luka 24:33) Ha ho pelaelo hore baapostola kaofela ba ne ba ikoahlaela seo ba ileng ba se etsa bosiung bo fetileng eaba baa tšelisana.

Ha e le hantle, mona re bona ha Petrose a etsa qeto e bohlale ka ho fetisisa. Ha mohlanka oa Molimo a oa, taba-taba hase hore na o entse sebe se tebileng hakae, empa ntho ea bohlokoa ke hore na o ikemiselitse hakae hore a eme, a lokise litaba. (Liproverbia 24:16) Petrose o ile a bontša hore o na le tumelo ea sebele ka hore a e’o kopana le barab’abo ho sa tsotellehe hore na o ne a nyahame hakae. Ha motho a imetsoe ke ho nyahama kapa ho ikoahlaea, ho bonolo hore a itšehle thajana, empa seo se kotsi haholo. (Liproverbia 18:1) Ntho e bohlale ke hore a lule a le haufi le balumeli-’moho le eena e le hore a tle a matlafale moeeng.—Baheberu 10:24, 25.

Kaha Petrose o ne a e-na le barab’abo ba moea, o ile a utloa tlaleho e tšosang ea hore setopo sa Jesu se ne se le sieo ka lebitleng. Petrose le Johanne ba ile ba mathela lebitleng leo Jesu a neng a patiloe ho lona ’me monyako oa lona o koetsoe ka thata. Johanne o ile a fihla pele kaha e ka ’na eaba e ne e le eena e monyenyane. O ile a tsilatsila ha a fumana lebitla le butsoe. Petrose eena ha aa ka a tsilatsila.  Le hoja a ne a hemesela ke mokhathala oa ho matha, o ile a itahlela ka hare. Lebitla le ne le re na u ne u ’nehile eng!—Johanne 20:3-9.

Na Petrose o ile a lumela hore Jesu o tsositsoe? Qalong ha aa ka a lumela, le hoja basali ba tšepahalang ba ile ba tlaleha hore mangeloi a ile a hlaha ho bona a ba bolella hore Jesu o tsositsoe bafung. (Luka 23:55–24:11) Empa ha letsatsi leo le likela, Petrose o ne a se a hlasimolohile a bile a se a se na lipelaelo. Jesu o ne a phela e le sebōpuoa sa moea se matla! O ile a hlaha ho baapostola ba hae kaofela. Empa pele ho moo, o ile a etsa ntho e ’ngoe lekunutung. Baapostola ba ile ba re letsatsing leo: “Kannete Morena o tsositsoe ’me o bonahetse ho Simone!” (Luka 24:34) Ka tsela e tšoanang, hamorao moapostola Pauluse o ile a ngola hore letsatsing leo le ikhethang, Jesu o ile a “bonahala ho Kefase, ea ntan’o ba ho ba leshome le metso e ’meli.” (1 Bakorinthe 15:5) Kefase le Simone ke mabitso a mang a Petrose. Jesu o ile a hlaha ho eena letsatsing leo—ho hlakile hore e bile nakong eo Petrose a leng mong.

Bibele ha e bolele hore na ho ile ha etsahala’ng ha Jesu le Petrose ba kopana motsotsong oo o khethehileng. Re se re ka nahana feela hore e tlameha ebe Petrose o ile a ameha maikutlo haholo ha a bona hore Morena oa hae eo a mo ratang o boetse oa phela, a bile a e-ba le monyetla oa ho mo bolella kamoo a itšoabetseng kateng a bileng a bakileng kateng. Ntho feela eo a neng a e batla e ne e le hore a tšoareloe. Ha ho ea ka belaellang taba ea hore Jesu o ile a mo tšoarela, le hona ka pelo eohle! Bakreste ba oelang sebeng kajeno ba lokela ho hopola taba ena ea Petrose. Le ka mohla ha rea lokela ho nahana hore Molimo a ke ke a re tšoarela. Jesu o ile a bontša hantle seo Ntate oa hae a hlileng a leng sona, kaha O “tla tšoarela ka tsela e khōlō.”—Esaia 55:7.

Bopaki bo Eketsehileng ba Hore o Tšoaretsoe

Jesu o ile a bolella baapostola ba hae hore ba ee Galilea moo a neng a tla kopana le bona hape hona teng. Ha ba fihla, Petrose o ile a etsa qeto ea ho ea tšoasa litlhapi Leoatleng la Galilea. Ba ’maloa ba ile ba tsamaea le eena. Petrose o ile a boela a iphumana a le letšeng leo nakong e fetileng a neng a qeta nako e ngata a le ho lona. E tlameha ebe o ile a ikutloa a tšeliseha ha a utloa lintho tseo a li tloaetseng tse kang lerata la sekepe ha se tsamaea, ho khahlellana ha maqhubu le ho hoasha ha matlooa ka matsohong a hae. Na ebe bosiung boo o ile a ipotsa hore na o tl’o etsa’ng ka bophelo ba hae ha e le moo tšebeletso ea Jesu lefatšeng e felile? Na o ile a hoheloa ke bophelo bo itekanetseng ba ho ba motšoasi oa litlhapi? Seo re se tsebang ke hore ha baa ka ba tšoasa letho bosiu bohle.—Matheu 26:32; Johanne 21:1-3.

Leha ho le joalo, ka meso ba ile ba hoeletsoa ke motho e mong lebōpong, ea ileng a re ba lahlele matlooa a bona ka lehlakoreng la sekepe. Ba ile ba etsa joalo ’me ba tšoasa litlhapi tse 153 kaofela! Petrose o ile a tseba hore na motho eo ke mang. O ile a itahlela metsing ’me a sesa ho ea lebōpong. Ha a fihla teng, Jesu o ile a ba fa litlhapi tse besitsoeng holim’a mashala, eaba o bua le Petrose.

Jesu o ile a botsa Petrose hore na o rata Morena oa hae “ho feta tsee”—e le ha a bua ka litlhapi tse ngata tseo ba li tšoasitseng. Na lerato leo Petrose a ratang ho tšoasa litlhapi ka lona le ne le tla ba matla ho feta leo a ratang Jesu ka lona? Feela joalokaha Petrose a ile a latola Morena oa hae ka makhetlo a mararo, mona Jesu o ile a mo fa monyetla oa hore a tiise hore oa mo rata ka makhetlo a mararo ka pel’a metsoalle ea hae. Ha Petrose a re oa mo rata, Jesu o ile a mo bolella hore na a bontše lerato leo joang: ka hore a behe tšebeletso e halalelang ka pele ho lintho tsohle, a fepe le ho lisa mohlape oa Kreste, e leng balateli ba hae ba tšepahalang.—Johanne 21:4-17.

 Ka tsela eo, Jesu o ile a tiisa hore eena le Ntate oa hae ba ne ba ntse ba ka sebelisa Petrose. Petrose o ne a tla phetha karolo ea bohlokoa ka phuthehong tlas’a tataiso ea Kreste. E ne e le bopaki bo bokaakang ba hore Jesu o mo tšoaretse ka ho feletseng! Ha ho pelaelo hore mohau o joalo o ile oa ama Petrose ka ho teba.

Petrose o ile a phetha mosebetsi oo a o abetsoeng ka botšepehi ka lilemo tse ngata. O ile a matlafatsa barab’abo, joalokaha Jesu a ne a mo laetse bosiung ba pele ho lefu la Hae. Petrose ha a lisa balateli ba Kreste le ho ba fepa, o ile a etsa sena ka mosa le ho se fele pelo. Monna enoa ea bitsoang Simone o ile a phela ka tsela e tšoanelang lebitso leo Jesu a neng a mo file lona—la Petrose, kapa Lefika—ka ho ba mohloli o tsitsitseng, o matla le o ka tšeptjoang oa tšusumetso e ntle ka phuthehong. Bopaki bo boholo ba seo bo fumanoa mangolong a mabeli ao Petrose a a ngotseng ka lerato ao e bileng karolo ea libuka tsa bohlokoa tsa Bibele. Mangolo ao a boetse a bontša hore Petrose ha aa ka a lebala thuto eo a ithutileng eona ho Jesu ka ho tšoarela.—1 Petrose 3:8, 9; 4:8.

E se eka le rōna re ka ithuta thuto eo. Na kamehla re kōpa hore Molimo a re tšoarele ka liphoso tse ngata tseo re li etsang? Na joale re amohela tšoarelo eo re be re lumele hore e na le matla a ho re hloekisa? Hona na rōna re tšoarela ba bang? Haeba re etsa joalo, re tla be re etsisa tumelo ea Petrose le mosa oa Mong’a hae.

[Ntlha e Qolotsoeng e leqepheng la 22]

Petrose o entse liphoso tse ngata tseo Mong’a hae a neng a lokela ho mo tšoarela ka tsona, empa na ho na le ea sa hlokeng ho tšoareloa letsatsi le leng le le leng?

[Setšoantšo se leqepheng la 23]

‘Morena o ile a reteleha a sheba Petrose’

[Setšoantšo se leqepheng la 24]

“Morena . . . o bonahetse ho Simone!”