Maikutlo a Sithabetsang—U ka a Loantša Joang?

NA KA linako tse ling u ikutloa u sithabetse maikutlong? Ka sebele, ha ho motho ea sa sithabeleng maikutlo ka linako tse ling. Mehleng ena batho ba imetsoe ke mathata a lichelete, pefo le ho hloka toka ho tsoileng taolong. Hase feela batho ba se nang palo ba imetsoeng ke ho utloa bohloko, ho jeoa ke letsoalo ka tsela e feteletseng le ho ikutloa eka ha ba na thuso.

Maikutlo a joalo a ka ba kotsi. A ka etsa hore re se ke ra itšepa, a etsa hore re sitoe ho beha mabaka a ba a etsa hore re felloe ke thabo. Bibele e re: “Na u iponahalitse u nyahame letsatsing la mahlomola? Matla a hao a tla fokola.” (Liproverbia 24:10) Re hloka matla e le hore re ’ne re tsoele pele lefatšeng lena le tletseng mathata. Ka hona, ke ntho ea bohlokoa haholo hore re laole maikutlo a sithabetsang. *

Bibele e na le likeletso tsa bohlokoa tse ka sebelisoang ho loantša maikutlo a sithabetsang. Jehova Molimo, ’Mōpi le ’Moloki oa tsohle tse phelang ha a batle hore u imeloe ke ho nyahama kapa ho felloa ke tšepo. (Pesaleme ea 36:9) Ka hona, a re hlahlobeng litsela tse tharo tseo ka tsona Lentsoe la hae le ka re thusang hore re loantše maikutlo a sithabetsang.

Hlokomela Hore Molimo o Amehile ka Uena

Batho ba bang ba nahana hore Molimo o tšoarehile ka lintho tse ling hoo a sa ameheng hakaalo hore na ba ikutloa joang. Na ke kamoo u ikutloang kateng? Ha e le hantle, Bibele e re tiisetsa hore ’Mōpi oa rōna o amehile ka maikutlo a rōna. Mopesaleme o ile a re: “Jehova o haufi le ba lipelo li robehileng; o pholosa ba sithabetseng moeeng.” (Pesaleme ea 34:18) Ho tšelisa hakaakang ho tseba hore ’Musi ea matla ’ohle o haufi le rōna ha re le mahlomoleng!

Molimo ha a pelo e thata ebile ha a hōle le rōna. Bibele e re “Molimo ke lerato.” (1 Johanne 4:8) O rata batho ebile o ameha haholo ka batho ba utloang bohloko. Ka mohlala, ha Baiseraele ba ne ba le botlamuoeng Egepeta lilemong tse ka bang 3 500 tse fetileng, o ile a re: “Ntle ho pelaelo ke bone mahloreho a sechaba sa ka se Egepeta, ’me ke utloile mohoo oa sona ka lebaka la ba se qobellang ho sebetsa; hobane ke tseba hantle bohloko boo se bo utloang. Kea theoha ho ea se lopolla.”—Exoda 3:7, 8.

Molimo o tseba hantle hore na re ameha joang maikutlong. Etsoe “ke eena ea re entseng, eseng rōna.” (Pesaleme ea 100:3) Ka hona, le ha re ka lemoha hore ekare batho ha ba re utloisise, re ka kholiseha hore Molimo eena oa re utloisisa. Lentsoe la Molimo le re: “Tsela eo motho a bonang ka eona hase tsela eo Molimo a bonang ka eona, hobane motho o bona se bonahalang mahlong; empa ha e le Jehova, o bona seo pelo e leng sona.” (1 Samuele 16:7) Esita le maikutlo a rōna a ka hare-hare Molimo oa a tseba.

Ke ’nete hore Jehova o boetse o tseba liphoso tsa rōna le mefokolo ea rōna. Empa re ka leboha hore ebe Moetsi enoa oa rōna ea lerato oa tšoarela. Davida ea neng a bululetsoe hore a ngole Bibele o ile a re: “Joalokaha ntate a bontša mohau ho bara ba hae, Jehova o bontšitse mohau ho ba mo tšabang. Etsoe o tseba sebōpeho sa rōna hantle, oa hopola hore re lerōle.” (Pesaleme ea 103:13, 14) Molimo o re bona ka tsela e fapaneng hōle le eo e ka ’nang eaba re inka ka eona. O  sheba makhabane a rōna eseng liphoso tsa rōna, ha feela re bakela libe tsa rōna.—Pesaleme ea 139:1-3, 23, 24.

Ka hona, ha re ikutloa eka ha re na thuso bophelong, re lokela ho ikemisetsa ho loantša maikutlo ao. Ha rea lokela ho lebala hore na Molimo eena o re nka joang!—1 Johanne 3:20.

E-ba le Kamano e Haufi le Molimo

Re rua molemo joang ha re inka ka tsela eo Molimo a re nkang ka eona? Ho tla ba bonolo hore re nke mohato o mong o re thusang hore re loantše ho nyahama—e leng ho ba le kamano e haufi le Molimo. Na ruri eo ke ntho e ka etsahalang?

Jehova Molimo ke Ntate ea lerato, ea ikemiselitseng ho re thusa hore re be le kamano e haufi le eena. Bibele e re khothatsa tjena: “Atamelang ho Molimo, ’me o tla atamela ho lōna.” (Jakobo 4:8) Nahana ka ’nete ena e tsotehang: Le hoja re e-na le mefokolo re bile re le baetsalibe, re ka khona ho ba metsoalle e haufi le ’Musi oa bokahohle.

Molimo o itšenotse ka Bibeleng e le hore re ka mo tseba. Ha re bala Bibele kamehla, re ka ithuta ka litšobotsi tse babatsehang tsa Molimo. * Ha re nahanisisa ka tsona, re tla ikutloa re e-ba haufi le Jehova le ho feta. Re tla fela re mo nke e le Ntate ea lerato le ea nang le kutloelo-bohloko.

Re rua molemo o mong hape ha re nahana ka ho teba ka seo re se balang Bibeleng. Re ba haufi-ufi le Ntate oa rōna ea leholimong ha re etsa hore monahano oa hae o tebe likelellong le lipelong tsa rōna ’me re o lumella hore o re khalemele, o re tšelise le ho re tataisa. Re lokela ho etsa joalo ka ho khetheha ha ho e-na le ho re tšoenyang maikutlong kapa ho re hlokisang khotso. Mopesaleme o itse: “Ha ke ne ke imetsoe ke matšoenyeho, u ile ua nkhothatsa ua ba ua etsa hore ke ikutloe ke sireletsehile.” (Pesaleme ea 94:19, Contemporary English Version) Motho a ka khothatsoa ke Lentsoe la Molimo haholo. Haeba re amohela molaetsa oa hae oa ’nete ka boikokobetso, butle-butle re ka ’na ra utloa maikutlo a sithabetsang a fela ’me re tšeliseha re bile re e-ba le khotso, e leng lintho tse ka fanoang ke Molimo feela. Ka hona, Jehova o re tšelisa ka tsela e tšoanang le eo ka eona motsoali ea lerato a tšelisang ngoana oa hae ea lemetseng kapa ea utloileng bohloko.

Ntho e ’ngoe e ka etsang hore u be motsoalle oa Molimo ke ho bua le eena kamehla. Bibele ea re tiisetsa hore “ho sa tsotellehe hore na ke eng eo re e kōpang ho ea ka thato ea hae, [Molimo] oa re utloa.” (1 Johanne 5:14) Ho sa tsotellehe hore na re tšaba eng kapa re tšoenngoa ke eng, re ka rapela Molimo ’me ra kōpa hore a re thuse. Ha re tšollela lipelo tsa rōna ho Molimo, re tla ba le khotso. Moapostola Pauluse o ile a ngola, a re: “Nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li  ke li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.”—Bafilipi 4:6, 7.

Ha u khomarela lenaneo la ho bala Bibele, u thuisa u bile u rapela, ha ho pelaelo hore u tla ba le kamano e haufi le Ntate oa hao ea leholimong. Kamano eo, ke sebetsa se matla haholo sa ho loantša maikutlo a sithabetsang. Ke eng hape e ka thusang?

Lula U Nahanne ka Tšepo e Tiileng eo re e Fuoeng ka Bokamoso

Re ka lula re nahanne ka lintho tse molemo esita le ha re le tlas’a maemo a thata ka ho fetisisa. Joang? Molimo o fane ka tšepo e tiileng ka Bokamoso. Moapostola Petrose o ile a akaretsa tšepo ena e babatsehang ka mantsoe ana: “Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho loka ho tla aha ho tsona.” (2 Petrose 3:13) Seo se bolela’ng?

Poleloana “maholimo a macha” ha e le hantle e bolela ’muso—’Muso oa Molimo oa leholimong tlas’a taolo ea Jesu Kreste. “Lefatše le lecha” le bolela sechaba se secha sa batho ba amoheloang ke Molimo mona lefatšeng. Tlas’a puso ea “maholimo a macha,” sechaba seo se secha ha se sa tla hlola se e-ba le lintho tsohle tse etsang hore se sithabele maikutlong. Mabapi le batho ba tšepahalang ba tla phela moo, Bibele e re tiisetsa hore Molimo “o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.”—Tšenolo 21:4.

Ha ho pelaelo hore eo ke tšepiso e thabisang le e tšelisang. Ke lona lebaka le etsang hore Bibele e re bokamoso boo Molimo a bo lokiselitseng Bakreste ba ’nete ke “tšepo e thabisang.” (Tite 2:13) Haeba re lula re nahanne ka bokamoso boo Molimo a bo tšepisitseng moloko oa batho—le hore na ke hobane’ng ha litšepiso tseo e le tse tiileng  le tse ka tšeptjoang—re tla be re leleka maikutlo a sithabetsang.—Bafilipi 4:8.

Bibele e bapisa tšepo ea rōna ea poloko le helmete. (1 Bathesalonika 5:8) Mehleng ea boholo-holo, lesole le ne le ke ke la ea ntoeng le sa roala helmete. Le ne le tseba hore e ne e tla le sireletsa ha le otloa e be e etse hore metsu e kube ka holimo. Joalokaha helmete e sireletsa hlooho, tšepo e sireletsa kelello. Ho lula re nahana ka lintho tse re fang tšepo ho etsa hore re se ke ra lula re nahana ka lintho tse sithabetsang, tse re tšosang, kapa tse etsang hore re felloe ke tšepo.

Ka hona, hoa khoneha hore motho a loantše maikutlo a sithabetsang. Le uena u ka khona ho a loantša! Nahana ka tsela eo Molimo a u nkang ka eona, atamela haufi le eena ’me u lule u nahana ka tšepo eo u nang le eona ka bokamoso. Joale u ka kholiseha hore u tla phela nakong eo ka eona ho ba le maikutlo a sithabetsang ho ke keng ha hlola ho e-ba teng!—Pesaleme ea 37:29.

[Mongolo o botlaaseng ba leqephe]

[Ntlha e Qolotsoeng e leqepheng la 19]

“Ke tseba hantle bohloko boo se bo utloang.”—EXODA 3:7, 8

[Ntlha e Qolotsoeng e leqepheng la 20]

“Ha ke ne ke imetsoe ke matšoenyeho, u ile ua nkhothatsa ua ba ua etsa hore ke ikutloe ke sireletsehile.”—PESALEME EA 94:19, CONTEMPORARY ENGLISH VERSION

[Ntlha e Qolotsoeng e leqepheng la 21]

“Khotso ea Molimo e fetang monahano oohle e tla lebela lipelo tsa lōna le matla a lōna a kelello.”—BAFILIPI 4:7

[Lebokose/Setšoantšo se leqepheng la 20, 21]

Mangolo a Tšelisang a Buang ka Jehova Molimo

“Jehova, Molimo ea mohau le ea mosa, ea liehang ho halefa le ea tletseng mosa o lerato le ’nete.”—EXODA 34:6.

“Mahlo a hae a qamaka ho pholletsa le lefatše lohle hore a bontše matla a hae molemong oa bao lipelo tsa bona li feletseng ho eena.”—2 LIKRONIKE 16:9.

“Jehova o haufi le ba lipelo li robehileng; o pholosa ba sithabetseng moeeng.”—PESALEME EA 34:18.

“Jehova, u molemo ’me u itokiselitse ho tšoarela.”—PESALEME EA 86:5.

“Jehova o molemo ho bohle, mehauhelo ea hae e holim’a mesebetsi eohle ea hae.”—PESALEME EA 145:9.

“’Na, Jehova Molimo oa hao, ke u tšoara ka letsoho la hao le letona, ke ’na Ea reng ho uena, ‘U se ke ua tšoha. Ke tla u thusa.’”—ESAIA 41:13.

“Ho bokoe . . . Ntate oa mehauhelo e bonolo le Molimo oa matšeliso ’ohle.”—2 BAKORINTHE 1:3.

“Re tla kholisa lipelo tsa rōna ka pel’a hae mabapi le eng kapa eng eo lipelo tsa rōna li ka re tsoang ho eona, hobane Molimo o moholo ho lipelo tsa rōna ’me o tseba lintho tsohle.”—1 JOHANNE 3:19, 20.

[Lebokose/Litšoantšo tse leqepheng la 22]

Ba Khona ho Laola Maikutlo a Sithabetsang

“Ntate ke lekhoba la joala ’me ke fetile mahlomoleng a mangata ka lebaka la hae. E se e le nako e telele haholo ke khathatsoa ke maikutlo a sithabetsang. Empa eitse ha ke lumela ho ithuta Bibele le e mong oa Lipaki Tsa Jehova, ke ile ka tseba ka tšepiso ea bophelo bo sa feleng lefatšeng mona. Tšepo eo e ile ea etsa hore ke lule ke thabile. Ho bala Bibele kamehla e ile ea e-ba karolo ea bophelo ba ka. Ke lula ke e-na le Bibele ka linako tsohle. Ha maikutlo a sithabetsang a nkaparela, kea e nka ebe ke bala mangolo a khothatsang. Ho bala ka litšobotsi tse babatseng tsa Molimo ho ntiisetsa hore o nkuka ke le oa bohlokoa.”—Kátia, ’mè ea lilemo li 33. *

“Ke ne ke lemaletse joala, matekoane le k’hok’heine, ke bile ke tsuba glue. Ke ile ka qetella ke le mokōpa-kōpa kaha ke ile ka lahleheloa ke ntho e ’ngoe le e ’ngoe eo ke neng ke e-na le eona. Empa ka mor’a hore ke lumele ho ithuta Bibele le Lipaki Tsa Jehova, ke ile ka fetola bophelo ba ka ka ho feletseng. Ke ile ka ba le kamano e haufi le Molimo. Le hoja ke ntse ke lokela ho loantša letsoalo le molato le maikutlo a hore ha ke na thuso, ke ithutile ho itšetleha ka mohau oa Molimo le mosa oa hae o lerato. Ke kholisehile hore Molimo o tla lula a mpha matla a hore ke hlōle maikutlo ana a sithabetsang. Ha ho na ntho e bileng molemo bophelong ba ka ho feta ho tseba ’nete ea Bibele.”—Renato, ntate ea lilemo li 37.

“Ho tloha ha ke sa le monyenyane, ke ne ke tloaetse ho ipapisa le abuti oa ka. Ke ne ke lula ke ikhalala ha ke ipapisa le eena. Le kajeno ke ntse ke na le ho se itšepe le ho ikhalala. Leha ho le joalo, ke ikemiselitse ho hlōla ntoa ena. Ke rapela Jehova ke sa khaotse, ’me o nthusitse hore ke hlōle maikutlo ana a ho ikhalala. Ho khothatsa haholo ho tseba hore ka sebele Molimo oa nthata ebile oa ntsotella!”—Roberta, ’mè ea lilemo li 45.

[Mongolo o botlaaseng ba leqephe]