Babali ba Batla ho Tseba . . .

Na Masea a Lokela ho Kolobetsoa?

▪ Victoria o re: “Ke ne ke jeoa ke taba ea hore khaitselinyana ea ka, John, o feletse Limbo.” Ke hobane’ng ha a ne a khathatsoa ke taba eo? O re: “John o hlokahetse pele a kolobetsoa, ’me moruti oa K’hatholike o ile a re kaha John ha aa kolobetsoa, o tla ba Limbo ka ho sa feleng.” Thuto eo ka sebele e ka tšosa motho, empa na Mangolo aa e ruta? Na Bibele e ruta hore bana ba shoang ba e-s’o kolobetsoe ba tobane le kotlo ea ka ho sa feleng?

Ke ’nete hore Bibele e ruta hore Bakreste ba lokela ho kolobetsoa. Jesu o ile a bolella balateli ba hae: “Le etse batho ba lichaba tsohle barutuoa, le ba kolobetse ka lebitso la Ntate le la Mora le la moea o halalelang, le ba rute ho boloka lintho tsohle tseo ke le laetseng tsona.” (Matheu 28:19, 20) Hlokomela hore batho ba kolobetsoang e lokela ho ba barutuoa ba Jesu. Ka mantsoe a mang, ke batho ba ithutileng ka Jesu eaba ba etsa qeto ea ho mo latela—e leng se ke keng sa etsoa ke lesea.

Ho ntse ho le joalo, ba bangata ba tsitlella hore taelo ea Jesu e akarelletsa masea. Moruti oa Lutere, Richard P. Bucher, o re: “Motho e mong le e mong o lokela ho kolobetsoa, ho akarelletsa masea.” O phaella ka ho re: “Ho ba tima kolobetso ke ho ba tima tšoarelo ea libe, ho bolelang hore ba tjametsoe ke kotlo.” Leha ho le joalo, ha e le hantle lipolelo tse joalo li hanana le lithuto tsa Jesu bonyane ka litsela tse tharo.

Ea pele, Jesu ha aa ka a ruta hore bana ba lokela ho kolobetsoa. Ke hobane’ng ha ntlha ee e le ea bohlokoa? Ak’u nahane: Jesu o ile a ruta barutuoa ba hae ka tieo ka seo Molimo a se hlokang. Ka linako tse ling o ne a pheta-pheta thuto ea bohlokoa. Hobane’ng? O ne a batla ho tiisa hore barutuoa ba hae ba tšoere ntlha. (Matheu 24:42; 25:13; Mareka 9:34-37; 10:35-45) Leha ho le joalo, ha ho na lekhetlo le le leng leo a ileng a ruta hore masea a lokela ho kolobetsoa. Na ebe mohlomong ho na le ntho e ileng ea lebatsa Jesu hore a bolele hore seo sea hlokahala? Le letho! Ho hlakile hore haeba masea a ne a lokela ho kolobetsoa, Jesu a ka be a boletse.

Ea bobeli, ha ho mohla Jesu a ileng a ruta hore motho leha e le ofe o tla hlokofala ka mor’a lefu. O ne a lumela se Mangolong, ao ka ho hlaka a reng: “Ba phelang baa tseba hore ba tla shoa; empa ha e le ba shoeleng, ho hang ha ba tsebe letho.” (Moeklesia 9:5) Jesu o ne a tseba hore bafu ha ba tloheloe ba hlokofala pelekatoring, Limbo, mollong oa lihele, kapa sebakeng leha e le sefe se seng. Ho e-na le hoo, o ne a ruta hore ha ba tsebe letho, ba tšoana le batho ba robetseng.—Johanne 11:1-14.

Ea boraro, Jesu o ile a ruta hore “bohle ba mabitleng a khopotso” ba tla tsosoa. (Johanne 5:28, 29) Ha ho pelaelo hore ba tla akarelletsa batho ba limilione tse ngata ba neng ba sa ka ba kolobetsoa. Ha ba tsosoa, ba tla ba le monyetla oa ho ithuta ka seo Molimo a se batlang ’me ba phele ka ho sa feleng Paradeiseng lefatšeng. *—Pesaleme ea 37:29.

Ka hona, ho hlakile hore Bibele ha e rute hore masea a lokela ho kolobetsoa.

[Mongolo o botlaaseng ba leqephe]