NAKONG eo pula e nang ka sefefo u ka ’na ua utloa sealuma. Na se kile sa u tšosa?— * Jesu o bitsa balateli ba hae ba babeli “Bara ba Sealuma.” A re bone hore na ke hobane’ng.

Balateli bana ba Jesu ba babeli ke Jakobo le Johanne. Ke bana ba motho, bara ba Zebedea le mosali oa hae Salome. E ka ’na eaba Salome e ne e le ngoan’abo Maria, ’mè oa Jesu. Kahoo ho ka etsahala hore Jesu, Jakobo le Johanne e ne e le bo-motsoala ebile e le metsoalle ea sebele ha ba ntse ba hōla.

Zebedea ke motšoasi oa litlhapi hammoho le Jakobo le Johanne. Ba babeli bana ke ba bang ba pele bao Jesu a ba khethang hore e be balateli ba hae. Ha a ba bitsa, hang-hang ba siea khoebo ea bona ea ho tšoasa litlhapi ’me baa mo latela. Hamorao Jesu o khetha ba 12 ho balateli ba hae hore e be baapostola ba hae. Jakobo le Johanne ke ba bang ba bona.

Likhoeli tse ’maloa pele Jesu a bolaoa, eena le baapostola ba hae ba feta sebakeng se lithaba sa Samaria. Ho ntse ho e-ba lefifi ’me kaofela ha bona ba khathetse haholo. Empa Basamaria ba re ha ba batle hore Jesu le baapostola ba hae ba robale motseng oa bona. Na ua tseba hore na ke hobane’ng?— A re bone.

Jesu le baapostola ba hae ke Bajuda, ’me Bajuda ba bangata ba hloile Basamaria. Ka ho hlakileng, Jesu eena ha aa ba hloea. O ba tšoara ka mosa ’me Jakobo le Johanne le bona ba lokela ho etsa se tšoanang. Empa baapostola  bana ba babeli ba halefela Basamaria ha ba sa ba amohele, ba re ho Jesu: ‘Na u batla hore re bolelle mollo hore o theohe ’me o ba felise?’ U nahana hore Jesu o re’ng ho bona?— O ba bolella hore ho fosahetse ho bua ntho e mpe joalo! Ho ne ho hlokahala hore Jakobo le Johanne ba ithute ho ba le mosa haholoanyane.

Bothata bo bong bo boholo boo Jakobo le Johanne ba nang le bona ke hore ba rata ho ba ba pele le ho hlahella. Nakoana pele ho lefu la Jesu, ba ile ba romela ’mè oa bona hore a re ho Jesu: “Laela hore bara bana ba ka ba babeli ba lule, e mong ka letsohong la hao le letona ’me e mong ka ho le letšehali, ’musong oa hao.” Ha baapostola ba leshome ba utloa ka seo Jakobo le Johanne ba se entseng, baa halefa. Na le uena u ne u tla halefa?—

Mohlomong. Ha re rate ha ba bang ba batla ho ba ba pele ’me ba leka ho hlahella. Hamorao Jakobo le Johanne ba hlokomela hore ba ne ba fositse ebile ba hlokile mosa, ’me baa fetoha. E ba baapostola ba lerato haholo le ba mosa. Ke eng seo re ithutang sona tabeng ee?—

Seo re ithutang sona ho Jesu ke hore le rōna re lokela ho bontšana mosa. Jesu o ne a tšoara batho hantle, ho akarelletsa banna, basali le bana. Na u tla lula u leka ka matla ho hopola mohlala oa Jesu le ho o latela?—