Ithute Lentsoe la Molimo

Re ka Khetha Metsoalle ea Sebele Joang?

Sehlooho sena se na le lipotso tseo e ka ’nang eaba u ’nile ua ipotsa tsona ’me se bontša hore na u ka fumana likarabo hokae Bibeleng. Lipaki Tsa Jehova li ka thabela ho tšohla likarabo tsena le uena.

1. Ke hobane’ng ha re lokela ho khetha metsoalle ka hloko?

Batho ba bangata ba rata ho amoheloa ke ba bang. Hangata sena se etsa hore re etsise batho bao re leng haufi le bona. Ka hona, metsoalle ea rōna e na le tšusumetso e matla mekhoeng ea rōna. Ho bolelang hore seo re tla ba sona se itšetlehile haholo ka metsoalle eo re e khethang.—Bala Liproverbia 4:23; 13:20.

Davida, ea ileng a susumetsoa ke moea o halalelang ha a ngola Bibele, o ile a khetha metsoalle ka hloko. O ile a tloaelana le batho ba neng ba mo thusa hore a lule a tšepahala joaloka mohlanka oa Molimo. (Pesaleme ea 26:4, 5, 11, 12) Ka mohlala, Davida e ile ea e-ba motsoalle oa Jonathane hobane Jonathane o ne a mo khothalletsa hore a tšepe Jehova.—Bala 1 Samuele 23:16-18.

2. Ke joang u ka bang motsoalle oa Molimo?

Le hoja Jehova e le Ea Matla ’Ohle, ha e le hantle re ka ba metsoalle ea hae. Ka mohlala, Abrahama e ile ea e-ba motsoalle oa Molimo. Abrahama o ne a tšepa Jehova a bile a mo mamela, ka hona Jehova o ne a mo nka e le motsoalle oa hae. (Genese 22:2, 9-12; Jakobo 2:21-23) Haeba re tšepa Jehova re bile re etsa seo a reng re se etse, le rōna re ka ba metsoalle ea hae.—Bala Pesaleme ea 15:1, 2.

  3. Re ka rua melemo efe ha re e-na le metsoalle ea sebele?

Metsoalle ea sebele ea tšepahala ebile e u thusa hore u etse se nepahetseng. (Liproverbia 17:17; 18:24) Ka mohlala, le hoja e ka ’na eaba Jonathane o ne a le moholo ho Davida ka lilemo tse 30 ’me ka tloaelo a ne a lokela ho ba mojalefa teroneng ea Iseraele, o ile a tšehetsa Davida ka botšepehi kaha Davida o ne a khethiloe ke Molimo hore e be morena. Hape, metsoalle ea sebele ha e tšabe ho u khalemela ha e bona u etsa lintho ka booatla. (Pesaleme ea 141:5) Metsoalle e ratang Molimo e tla u thusa hore u be le mekhoa e metle.—Bala 1 Bakorinthe 15:33.

U ka kopana le batho ba ratang ho etsa se lokileng joaloka uena Holong ea ’Muso ea Lipaki Tsa Jehova. Moo u tla fumana metsoalle e tla u khothatsa ha u ntse u leka ka matla ho thabisa Molimo.—Bala Baheberu 10:24, 25.

Leha ho le joalo, ka linako tse ling le metsoalle e ratang Molimo e ka re soetsa. U se ke ua utloisoa bohloko habonolo ke liphoso tsa eona. (Moeklesia 7:9, 20-22) Hopola hore ha ho motsoalle ea phethahetseng ’me metsoalle e ratang Molimo ke ea bohlokoa ho rōna. Lentsoe la Molimo le re khothalletsa hore re iphapanyetse liphoso tsa Bakreste-’moho le rōna.—Bala Bakolose 3:13.

4. Ho thoe’ng haeba u hanyetsoa ke batho bao u nahanang hore ke metsoalle?

Batho ba bangata ba fumana hore ha ba qala ho thusoa hore ba ithute Lentsoe la Molimo, bao e bileng metsoalle ea bona ka nako e telele baa ba hanyetsa. Mohlomong metsoalle eo ha e utloisise keletso ea bohlokoa kapa tšepo ea sebele eo u e fumaneng ka Bibeleng. Mohlomong u ka ba thusa.—Bala Bakolose 4:6.

Ka linako tse ling, batho bao u nahanang hore ke metsoalle ea hao ba ka ’na ba soma litaba tse molemo tse ka Lentsoeng la Molimo. (2 Petrose 3:3, 4) Ba bang ba ka ’na ba u soma ha u leka ho etsa se nepahetseng. (1 Petrose 4:4) Haeba seo se etsahala ho uena, u ka ’na ua tlameha ho khetha pakeng tsa ho ba motsoalle oa bona le ho ba motsoalle oa Molimo. Haeba u khetha ho ba motsoalle oa Molimo, u tla be u khethile motsoalle oa sebele ka ho fetisisa.—Bala Jakobo 4:4, 8.

E le hore u fumane boitsebiso bo eketsehileng, sheba khaolo ea 12 le ea 19 bukeng ena ea Ha e le Hantle ke Eng Seo Bibele e se Rutang? e hatisoang ke Lipaki Tsa Jehova.