Ithute Lentsoe la Molimo

Ho Tla Etsahala’ng ka Bolumeli?

Sehlooho sena se na le lipotso tseo e ka ’nang eaba u ’nile ua ipotsa tsona ’me se bontša hore na u ka fumana likarabo hokae Bibeleng. Lipaki Tsa Jehova li ka thabela ho tšohla likarabo tsena le uena.

1. Na malumeli ’ohle a lokile?

Malumeli a mangata a na le batho ba tšepahalang ba batlang ho khahlisa Molimo. Molimo oa ba bona ebile oa ba rata. Leha ho le joalo, ka masoabi batho ba bang ba sebelisitse bolumeli hore ba phethe merero e mebe. Nakong e fetileng, baeta-pele ba bolumeli ba ile ba hlorisa bahanyetsi ba bona. (2 Bakorinthe 4:3, 4; 11:13-15) Kajeno, mecha ea litaba e bolela hore baeta-pele ba bang ba bolumeli ba khothallelitse bokhukhuni kapa ba tšehelitse lintoa, kapa ba hlekefelitse bana.—Bala Matheu 24:3-5, 11, 12.

Bibele e ruta hore ho na le mefuta e ’meli ea bolumeli—ba ’nete le ba bohata. Bolumeli ba bohata ha bo rute ’nete ka Molimo. Leha ho le joalo, Jehova Molimo o batla hore batho ba tsebe ’nete ka eena.—Bala 1 Timothea 2:3-5.

2. Ho tla etsahala’ng ka bolumeli?

Molimo ha a batle ha batho ba thetsoa ke malumeli a bolelang hore aa mo rata empa a sa rute ’nete ka eena. Ha e le hantle, litho tsa malumeli ao li rata ho ba metsoalle ea lefatše le laoloang ke Satane Diabolose. (Jakobo 4:4; 1 Johanne 5:19) Lentsoe la Molimo le re malumeli a tšepang mebuso ea batho ho e-na le ho tšepa Molimo a tšoana le seotsoa. Bibele e bitsa seotsoa sena “Babylona e Moholo,” e se reheletse ka motse oa boholo-holo oo bolumeli ba bohata bo qalileng ho oona ka mor’a Moroallo oa mehleng ea Noe. Haufinyane, ka tšohanyetso Molimo o tla felisa bolumeli bo thetsang batho le bo ba hatellang.—Bala Tšenolo 17:1, 2, 5, 17; 18:8, 23, 24.

  3. Molimo o tla tlisetsa lefatše lohle thabo joang?

Taba ea hore Molimo o tla ahlola bolumeli ba bohata ke litaba tse monate. Seo se tla imolla lefatše lohle khatellong. Bolumeli ba bohata bo ke ke ba hlola bo thetsa batho kapa bo ba qabanya. Bohle ba tla beng ba phela ka nako eo, ba tla rapela Molimo a le mong feela oa ’nete ba utloana.—Bala Esaia 11:9; Tšenolo 18:20, 21; 21:3, 4.

4. Batho ba tšepahalang ba lokela ho etsa’ng?

Jehova ha aa lebala batho ba tšepahalang ba leng malumeling a bohata lefatšeng ka bophara. Hona joale o bokella batho bao hore e be ntho e le ’ngoe ka ho ba ruta ’nete.—Bala Mikea 4:2, 5.

Jehova o amohela batho ba batlang ho mo sebeletsa hore e be karolo ea lelapa la hae. Esita le haeba metsoalle ea rōna le beng ka rōna ba ka re halefela ha re qala ho sebeletsa Jehova, rōna re rua molemo haholo. Re ba metsoalle ea Molimo, re fumana “lelapa” le lecha le nang le lerato, ebile re ba le tšepo ea ho phela ka ho sa feleng.—Bala Mareka 10:29, 30; 2 Bakorinthe 6:17, 18.

E le hore u fumane boitsebiso bo eketsehileng, sheba khaolo ea 15 le ea 16 bukeng ena ea Ha e le Hantle ke Eng Seo Bibele e se Rutang? e hatisoang ke Lipaki Tsa Jehova.

[Tlhaloso ea Moo Setšoantšo se Nkiloeng Teng e leqepheng la 16]

The Complete Encyclopedia of Illustration/J. G. Heck