Na ke Buka Feela Tjee?

“Lengolo lohle le bululetsoe ke Molimo ’me le molemo . . . , e le hore motho oa Molimo a ka tšoaneleha ka botlalo, a hlomelloa ka ho feletseng bakeng sa mosebetsi o mong le o mong o molemo.”—2 TIMOTHEA 3:16, 17.

HASE batho bohle ba lumellanang le mantsoe ana a ka holimo. Uena u re’ng? Lintlheng tsee tse ka tlaase, ke efe e hlalosang hantle kamoo u nkang Bibele kateng?

• Ke buka feela e ngotsoeng ka bokheleke

• Ke e ’ngoe ea libuka tse ngata tse nkoang li halalela

• Ke buka ea litšōmo e re rutang melao ea boitšoaro

• Ke Lentsoe la Molimo

Potso e ’ngoe hape ke e reng, Na hoa tsotelleha hore na u lumela’ng? Hlokomela hore na Bibele ka boeona e re’ng: “Lintho tsohle tse ileng tsa ngoloa nakong e fetileng li ile tsa ngolloa ho re laea, e le hore ka mamello ea rōna le ka matšeliso a tsoang Mangolong re ka ba le tšepo.” (Baroma 15:4) Ka hona, Bibele e bolela hore e ngoletsoe ho re laea, ho re tšelisa le ho re fa tšepo.

Leha ho le joalo, haeba Bibele e ne e le buka feela kapa e ’ngoe ea libuka tse nkoang li halalela, na u ne u ka e tšepa hore e u laee le hore e tataise lelapa la hao, haholo-holo haeba molaetsa oa eona o fapane le seo u neng u nahana hore se nepahetse? Haeba Bibele e ne e le buka ea litšōmo, na e ne e ka u tšelisa ea ba ea etsa hore u lumele litšepiso tsa eona?

Ka lehlakoreng le leng, batho ba limilione ba ithutileng Bibele ba kholisehile hore ke Lentsoe la Molimo le ikhethang. Hobane’ng? Ke eng e etsang hore Bibele e ikhethe ho libuka tse ling? Re kōpa u ke u hlahlobe lintho tse hlano tse etsang hore Bibele e ikhethe tse hlalositsoeng lihloohong tse latelang.