BIBELE e bua ka balisa ka makhetlo a mangata, ho tloha bukeng ea pele ea Genese, ho fihlela ho ea ho qetela ea Tšenolo. (Genese 4:2; Tšenolo 12:5) Banna ba tummeng ba kang Abrahama, Moshe le Morena Davida e ne e le balisa. Mopesaleme Davida o ile a hlalosa ka bokheleke boikarabelo ba ho ba molisa le lintho tseo a neng a amehile ka tsona. Pesaleme eo ho thoeng e ngotsoe ke Asafe, e bolela hore Davida e ne e le molisa oa batho ba Molimo ba mehleng ea boholo-holo.—Pesaleme ea 78:70-72.

Hamorao, mehleng ea Jesu, ho lisa e ne e ntse e le mosebetsi oa bohlokoa. Jesu o ne a ipitsa “molisa ea khabane” ʼme hangata o ne a bua ka litšobotsi tsa molisa ea molemo ha a ne a ruta lithuto tsa bohlokoa. (Johanne 10:2-4, 11) Esita le Jehova Molimo, ea Matla ’Ohle, o tšoantšoa le “molisa.”—Esaia 40:10, 11; Pesaleme ea 23:1-4.

Molisa o ne a hlokomela liphoofolo tsa mofuta ofe? Mosebetsi oa hae o ne o akarelletsa eng? Hona re ka ithuta eng ho balisa bao ba neng ba sebetsa ka thata?

E ka ’na eaba har’a linku tse ling tseo balisa ba Iseraele ea boholo-holo ba neng ba li lisa e ne e le linku tsa mefuta e sa tšoaneng tsa Syria tse boea bo teteaneng, tse nang le mehatla e sephara, e metenya. Lipheleu tsa mofuta ona oa linku li na le manaka, empa tse tšehali ha li na manaka. Ho  bonolo ho lisa liphoofolo tsena tse laolehang le tse sa khoneng ho itšireletsa tikolohong le liphoofolong tse ka li jang.

Balisa ba ne ba boetse ba lisa lipōli. Lipōli li ne li tšoana ka ’mala, li ne li le ntšo kapa li le sootho. Litsebe tsa tsona tse telele, tse lepeletseng li ne li taboloa habonolo ke meutloa ea lipalesa ha li ntse li nyoloha maralla ka thata le ha li fula lihlahleng.

Molisa o ne a lula a thulana le bothata ba ho ruta linku le lipōli hore li mamele litaelo tsa hae. Ho ntse ho le joalo, balisa ba molemo ba ne ba hlokomela liphoofolo tse kalosong ea bona ka lerato, ba ne ba bile ba li reha mabitso ao li neng li arabela ha li bitsoa ka ʼona.—Johanne 10:14, 16.

Nakong ea selemo, molisa o ne a ntša mohlape oa hae ka lesakeng le pel’a lapeng hore li e’o fula makhulong a nonneng a haufi le motse letsatsi le letsatsi. Nakong ena ea selemo, ho tsoaloa ha linku le lipōli ho ne ho eketsa mohlape. Ka nako eo ho ne ho boetse ho kutoa linku e le hore ho fumanoe boea bakeng sa mariha ʼme e ne e e-ba nako ea ho keteka!

Motho a le mong motseng o ne a ka ba le linku tse seng kae. Kahoo, o ne a ka hira molisa ea neng a ka eketsa mohlape oo o monyenyane ka o mong. Balisa ba hiriloeng ba ne ba tumme ka hore ha ba hlokomele liphoofolo tsa batho ba bang hantle joalokaha ba hlokomela tsa bona.—Johanne 10:12, 13.

Ha masimo a haufi le motse a se a kotutsoe, molisa o ne a fulisa linku tsa hae mahlomela le lijo-thollo tse setseng litlhakeng. Ha mocheso oa lehlabula o qala, balisa ba ne ba tlosa mehlape ea bona ebe ba e isa makhulong a holimonyana moo ho pholileng. Balisa ba ne ba lula matsatsi-tsatsi naheng ’me ba robala teng, ba fulisa mehlape methipoloheng e nang le botala ʼme bosiu ba ne ba lebela masaka a bulehileng. Ka linako tse ling, molisa o ne a sireletsa mohlape oa hae lehaheng bosiu, moo o neng o ke ke oa hlaseloa ke liphokojoe le liphiri. Haeba mohlape oa linku o ne o ka tšosoa ke sello sa phiri bosiu, o ne o khoba matšoafo ha o utloa lentsoe le khothatsang la molisa.

Mantsiboea a mang le a mang, molisa o ne a bala linku le ho bona hore na ha li kule na. Hoseng, o ne a hooa ebe mohlape o mo latela ho ea lekhulong. (Johanne 10:3, 4) Motšehare o moholo, balisa ba ne ba isa liphoofolo matamong a metsi a pholileng hore li e’o noa. Ha matamo a e-psha, molisa o ne a li isa selibeng ebe o li khella metsi.

Pele ho qala nako ea lipula, molisa o ne a ka isa mohlape oa hae libakeng tse lithota le liphuleng. Ha lipula tse batang li qala, o ne a li orosetsa hae e  le hore li qete mariha li koaletsoe. Ho seng joalo, liphoofolo li ne li ka bolaoa ke lipula tse otlang habohloko, sefako le ho na ha lehloa. Ho tloha ka khoeli ea November ho fihlela nakong ea selemo, balisa ba ne ba sa fulise mehlape ea bona naheng.

Liaparo tsa molisa li ne li se ngata empa li ne li tšoarella nako e telele. E le hore a itšireletse puleng le moeeng o batang oa bosiu, e ka ’na eaba o ne a apara kobo ea letlalo la nku, le hlanoletsoeng. ’Meleng o ne a apara seaparo sa ka hare. E le hore a se ke a hlajoa ke majoe a motsu le meutloa, o ne a roala meqathatso maotong ʼme o ne a itlama ka lesela le lohiloeng ka boea hloohong.

Hangata thepa ea molisa e ne e akarelletsa lintho tse latelang: Mokotlana oa letlalo o neng o tšela lijo tse kang borotho, litholoana tsa mohloaare, mangangajane le chisi (1); molamu, oo e neng e le sebetsa se neng se tšosa, hangata botelele ba oona e ne e e-ba mithara e le ʼngoe ʼme o kenngoa lehare le bohale botlaaseng ba oona bo sephara (2); thipa (3); lere, leo molisa a neng a ikokotlela ka lona ha a tsamaea le ha a nyoloha meepa (4); nkhoana ea metsi (5); nkho e phuthoang ea letlalo e neng e sebelisetsoa ho kha metsi lilibeng tse tebileng (6); letjeketjane, leo a neng a betsa majoe ka lona ho thiba linku kapa lipōli tse hlahlathelang kapa ho leleka liphoofolo tse hlaha tse nanarelang mohlape (7); le phala ea lehlaka, eo a neng a e letsa ho intša bolutu le ho khatholla mohlape oa hae (8).

Kaha molisa o ne a hlokomela liphoofolo hantle, li ne li mo buseletsa ka ho mo fa lintho tse hlokahalang bophelong—tse kang lebese le nama. Ho ne ho fapanyetsanoa ka boea le matlalo tse neng li sebelisetsoa ho etsa liaparo le makuka (libotlolo tsa letlalo). Boea ba pōli bo ne bo ohloa hore ho etsoe masela ʼme ho ne ho hlajoa linku le lipōli ha ho etsoa mahlabelo.

Balisa ba molemo ba ne ba khothetse, ba tšepahala ba bile ba le sebete. Ba ne ba bile ba beha bophelo ba bona kotsing hore ba sireletse mohlape.—1 Samuele 17:34-36.

Ha ho makatse hore ebe Jesu le barutuoa ba hae ba ile ba bolela hore balebeli ba Bakreste ba lokela ho latela mohlala oa molisa. (Johanne 21:15-17; Liketso 20:28) Joaloka molisa ea molemo oa mehleng ea Bibele, kajeno balebeli ba phutheho ba loanela ho ‘lisa mohlape oa Molimo o tlhokomelong ea bona, eseng ka ho qobelloa, empa ka ho rata; eseng ka lebaka la lerato la leruo la ho se tšepahale, empa ka tabatabelo.’—1 Petrose 5:2.