ROSALIND, ea hōletseng Engelane, o ne a e-na le taba-tabelo ea ho fumana tsebo. O ne a boetse a batla ho thusa batho. Ka mor’a hore a qete sekolong se phahameng, o ile a fumana mosebetsi oa maemo a holimo o neng o akarelletsa ho thusa batho ba se nang mahae a bile a thusa le batho ba nang le bokooa le ba nang le bothata ba ho ithuta. Le hoja a ne a e-na le mosebetsi o motle le chelete e ngata, o re, “Ka lilemo tse ngata ke ile ka ipotsa, ‘Ke hobane’ng ha re le lefatšeng moo?’ hona ‘Re phelela’ng?’”

Ho fapana le liphoofolo, batho ba khona ho behelana mabaka. Re na le bokhoni ba ho ithuta linthong tse fetileng, ba ho rera bokamoso le ba ho batla ho tseba hore na re phelela’ng.

Batho ba bangata ba nahana hore ntho e ka sehloohong bophelong ke ho ba le maruo kapa botumo le hore seo se tla ba tlisetsa thabo.

Ke rōna ba ikhethelang se tlang pele bophelong ba rōna. Litakatso tsa rōna ke tsa bohlokoa ho feta ho etsa thato ea Molimo.

Morena Solomone o ile a ipokella ka maruo a mangata haholo le ho phelela menyaka empa o ile a hlokomela hore lintho tseo hase tsona tse etsang hore motho a tsebe seo a se phelelang. Ha a bontša hore na ha e le hantle morero oa ho phela ke ofe, o ile a ngola a re: “Qetello ea taba, ha ntho e ’ngoe le e ’ngoe e se e utloiloe, ke ena: Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa.” (Moeklesia 12:13) Ho boloka litaelo tsa Molimo ho akarelletsa eng?

Molimo o batla hore re thabele bophelo. Solomone o ile a ngola a re: “Ho motho ha ho letho le molemo ho feta hore a je ’me ka sebele a noe le  ho etsa hore moea oa hae o bone se molemo ka lebaka la mosebetsi oa hae o boima. Sena le sona ke se bone, hore sena se tsoa letsohong la Molimo oa ’nete.”—Moeklesia 2:24.

Molimo o boetse o batla hore re hlokomele malapa a rōna re be re a rate. Hlokomela melao e bonolo e sebetsang eo Molimo a e fileng setho ka seng sa lelapa.

• “Banna ba tšoanela ho rata basali ba bona joaloka ’mele ea bona.”—Baefese 5:28.
• “Mosali o lokela ho ba le tlhompho e tebileng ho monna oa hae.”—Baefese 5:33.
• “Bana, le mamele batsoali ba lōna.”—Baefese 6:1.

Haeba re sebelisa melao-motheo eo ea Bibele, re tla fumana thabo le khotsofalo. Leha ho le joalo, ntho ea bohlokoahali eo re ka e etsang ke ho ithuta ka hohle kamoo re ka khonang ka ’Mōpi oa rōna le ho ba haufi le eena joaloka Motsoalle. Ha e le hantle, Bibele e re khothalletsa hore re ‘atamele ho Molimo.’ E boetse e na le tšepiso ena e babatsehang: “O tla atamela ho lōna.” (Jakobo 4:8) Haeba u ka etsa seo, ka sebele u tla tseba hore na u phela’ng.

Rosalind, eo ho builoeng ka eena qalong ea sehlooho sena, o re hona joale o se a tseba hore na o phelela’ng. U ka ipalla hore na o re ke’ng e ileng ea etsa hore a fetole maikutlo a hae, leqepheng la 10 la makasine ena.