Ba bang ba re lebaka leo ba ketekang Keresemese ka lona ke ho hopola Jesu. Ba keteka Keresemese ho hopola letsatsi la hae la tsoalo.

Lipina tse tloaelehileng tsa Keresemese le meetlo ea eona e mengata ha li amane le Jesu Kreste. Batho ba limilione ba ketekang Keresemese ha ba lumele ho Jesu; ba bang ba bona ha ba lumele le hore o kile a phela lefatšeng. Ho bo-rakhoebo, matsatsi a Keresemese e ba nako ea ho khothalletsa batho ho reka ho e-na le ho ba khothalletsa ho hopola Jesu.

“Mor’a motho ha aa tlela ho sebeletsoa, empa . . . ho fana ka moea oa hae ho ba thekollo e le phapanyetsano bakeng sa ba bangata.” (Mareka 10:45) Ho hlakile hore Jesu o ne a sa bue mantsoe a boletsoeng qalong ea sehlooho sena ka letsatsi la hae la tsoalo empa o ne a a bua bosiung ba pele ho lefu la hae. Bosiung boo, o ile a theha mokete o itekanetseng oa ho ikhopotsa lefu la hae. Empa, ke hobane’ng ha Jesu a ile a batla hore barutuoa ba hae ba hopole lefu la hae eseng tsoalo ea hae? Hobane sehlabelo sa Jesu sa thekollo se fa batho ba mamelang monyetla oa ho fumana bophelo bo sa feleng. Bibele e re: “Moputso oo sebe se o lefang ke lefu, empa mpho eo Molimo a fanang ka eona ke bophelo bo sa feleng ka Kreste Jesu Morena oa rōna.” (Baroma 6:23) Kahoo, selemo le selemo sehopotsong sa lefu la Jesu, balateli ba hae ha ba hopole Jesu Kreste e le lesea le sa khoneng ho etsa letho, empa e le “mopholosi oa lefatše.”—Johanne 4:42.

“Kreste o ile a utloa bohloko bakeng sa lōna, a le siela mohlala hore le latele mehato ea hae haufi-ufi.” (1 Petrose 2:21) U ka hlompha Jesu le ho mo hopola ka hore u ithute mohlaleng oa hae, kaha e ne e le motho ea phethahetseng le ea bohlale. Hape, nahanisisa kamoo Jesu a ileng a ba sebete ha a etsa se nepahetseng, le kamoo a ileng a bontša kutloelo-bohloko le mamello kateng ’me u leke ho batla litsela tsa kamoo u ka mo etsisang kateng bophelong ba hao.

“’Muso oa lefatše o fetohile ’muso oa Morena oa rōna le oa Kreste oa hae, ’me o tla busa e le morena ka ho sa feleng le kamehla.” (Tšenolo 11:15) Ha u hopola Jesu Kreste, nahana ka seo a se etsang hona joale. Jesu o busa e le Morena leholimong. Lentsoe la Molimo le ile la profeta ka Jesu, la re: “O tla ahlola ba tlaase ka ho loka, ’me o tla fana ka khalemelo ka ho loka molemong oa ba bonolo ba lefatše.” (Esaia 11:4) Ke ’Musi ea matla ea ka etsang lintho tsena eseng lesea le sa tsoa tsoaloa.