Thutong ea hae ea Thabeng, Jesu o ile a re ho balateli ba hae: “Le letsoai la lefatše; empa haeba letsoai le tapa, botsoai ba lona bo tla khutlisoa joang? Le ke ke la hlola le sebelisetsoa letho haese ho lahleloa ka ntle hore le hatakeloe ke batho.” (Matheu 5:13) Letsoai le sireletsa lijo hore li se ke tsa senyeha. Kahoo, e ka ’na eaba papiso ea Jesu e ne e bolela hore barutuoa ba hae ba lokela ho sireletsa ba bang hore ba se ke ba senya boitšoaro ba bona le kamano ea bona le Molimo.

Leha ho le joalo, ha The International Standard Bible Encyclopedia e hlalosa seo Jesu a ileng a se bua ka ho tapa ha letsoai, e re: “Letsoai le tsoang sebakeng se pel’a Leoatle le Shoeleng le ne le silafalitsoe ke liminerale tse ling; kahoo ha motsoako ona o kopana le metsi letsoai ha le sa utloahala.” Kahoo, hoa utloahala hore Jesu o ile a hlalosa se setseng e le se ‘ke keng sa hlola se sebelisetsoa letho haese ho lahleloa ka ntle.’ Encyclopedia eo e phaella ka ho re: “Le hoja ho se hloeke ha letsoai la Leoatle le Shoeleng ho entse hore boleng ba lona bo be tlaasana ha bo bapisoa le ba matsoai a mang a leoatleng, ke lona le neng le sebelisoa haholo Palestina kaha le ne le fumaneha habonolo feela lebōpong la leoatle.”

Jesu o ile a etsa papiso ea mosali ea neng a e-na le lidrakema tse leshome ’me ka mor’a ho lahleheloa ke e ’ngoe ea tsona, o ile a nka lebone ’me a fiela ntlo ea hae ka hloko ho fihlela a e fumana. (Luka 15:8-10) Mehleng ea Jesu drakema e ne e ka lekana le moputso oa letsatsi, kahoo drakema e le ’ngoe e ne e le chelete e ngata hore motho a ka lahleheloa ke eona. Leha ho le joalo, papiso ena e ne e se pale feela empa e ne e le ntho ea sebele.

Libuka tse ling li bontša hore hangata basali ba ne ba khabisa matlo ka chelete ea tšepe. Kahoo e ka ’na eaba ka mokhoa o sa tobang Jesu o ne a bua ka chelete ea tšepe eo e neng e le lefa la lelapa kapa e le karolo ea bohali ba mosali. Ebang ho ne ho le joalo kapa che, ho lahleheloa ke e ’ngoe ea lichelete tsa hae tsa tšepe tse leshome ho ne ho ka etsa hore mosali a tšoenyehe haholo ka hore a e fumane.

Ho feta moo, matlo a mehleng ea Jesu a ne a ahiloe ka tsela eo leseli le mocheso li neng li ke ke tsa khona ho kena habonolo. A ne a e-na le lifensetere tse ’maloa athe a mang a ’ona a ne a se na tsona. Hangata fatše ho ne ho aloa joang kapa lithupa tse omeletseng tsa limela tsa mefuta-futa. Ha chelete ea tšepe e ne e ka oela fatše, ho ne ho e-ba thata hore motho a e fumane. Setsebi se seng se re: “Kahoo, ha ntho e nyenyane joaloka chelete ea tšepe e lahleha sebakeng se joalo, ntho eo motho a neng a ka e etsa ke ho fiela ntlo le ho khantša lebone e le hore a e fumane.”