Na lefu le matla ho feta Molimo? Le hanyenyane! Lefu—kapa “sera” sefe kapa sefe—le ke ke la ba matla ho feta “Molimo ea Matla ’Ohle.” (1 Bakorinthe 15:26; Exoda 6:3) Ka hore a tsose bafu, Molimo o tla felisa lefu ’me o tšepisa ho etsa seo lefatšeng la hae le lecha. * Tšepiso eo ke ’nete hakae? Seo Mora oa Molimo, e leng Jesu, a re bolellang sona se re fa tšepo.—Bala Matheu 22:31, 32.

Ha a bua le Basaduse, ba neng ba sa lumele hore bafu ba tla tsoha, Jesu o ile a re: “Ha e le mabapi le tsoho ea bafu, na ha lea ka la bala seo Molimo a ileng a le bolella sona, ha a re, ‘Ke ’na Molimo oa Abrahama le Molimo oa Isaka le Molimo oa Jakobo’? Eena ke Molimo oa ba phelang, eseng oa bafu.” Mona Jesu o ne a bua ka puisano eo Molimo a ileng a ba le eona le Moshe ka pel’a sehlahla se neng se tuka, lilemo tse ka bang tse 3 500 tse fetileng. (Exoda 3:1-6) Ho latela Jesu, mantsoe ao Jehova a ileng a a bua ho Moshe—“Ke ’na Molimo oa Abrahama le Molimo oa Isaka le Molimo oa Jakobo”—a bontša hore joang kapa joang tšepiso ea tsoho e tla phethahala. Joang?

Nahana ka se neng se etsahala ha Molimo a tla bua mantsoe ana. Ka nako eo Jehova a neng a bua le Moshe, e ne e se e le khale bapatriareka Abrahama, Isaka le Jakobo ba shoele—Abrahama o ne a se a e-na le lilemo tse 329 a shoele, Isaka tse 224 ’me Jakobo eena tse 197. Leha ho le joalo, Jehova o ile a re “ke”—eseng “ke ne ke le”—Molimo oa bona. Molimo o ile a bua ka bapatriareka bana ba bararo ba shoeleng joalokaha eka ba ntse ba phela. Hobane’ng?

Jesu o ile a re: “[Jehova] ke Molimo oa ba phelang, eseng oa bafu.” Nahana ka nakoana hore na mantsoe ana ke a bohlokoa hakae. Haeba bafu ba ne ba ke ke ba tsoha, seo se bolela hore Abrahama, Isaka le Jakobo ba tla lula litlamong tsa lefu ka ho sa feleng. Haeba ho ne ho le joalo, e ne e tla ba Jehova ke Molimo oa litopo. Seo se ne se tla bolela hore lefu le matla ho feta Jehova—joalokaha eka o fokola hoo a sa khoneng ho lopolla bahlanka ba hae litleneng tsa lefu.

Joale, re ka re’ng ka Abrahama, Isaka le Jakobo le bahlanka bohle ba tšepahalang ba Jehova ba shoeleng? Jesu o ile a bua polelo ena e matla a re: “Kaofela baa phela ho eena.” (Luka 20:38) Ka sebele, morero oa Jehova oa ho tsosa bahlanka ba hae ba tšepahalang ba shoeleng, ke oa sebele hoo a nahanang ka bona joalokaha eka baa phela. (Baroma 4:16, 17) Jehova o tla lula a ba hopola ho fihlela nako ea hore a ba tsose e fihla.

Na ha u thabisoe ke ho ba le tšepo ea ho boela u kopana le motho eo u mo ratang ea shoeleng? Haeba ho joalo, u hopole hore Jehova o na le matla ’ohle ao a a hlokang hore a tsose bafu. Ha ho na letho le ka mo sitisang hore a phethahatse tšepiso ea hae ea ho tsosa bafu. Na u ka rata ho ithuta ho eketsehileng ka tšepiso ea tsoho le ka Molimo ea tla phethahatsa tšepiso eo? Ho etsa joalo ho tla etsa hore u be le kamano e haufi le Jehova, “Molimo oa ba phelang.”