Sylvia, eo e leng mooki ea hlokomelang batho ba hōlileng, o re: “Ke ne ke le k’holejeng le batho ba bangata ba neng ba ipitsa balumeli. Leha ho le joalo, ba ne ba etsa bolotsana hore ba pase litlhahlobo ba bile ba sebelisa lithethefatsi. Bolumeli bo ne bo sa susumetse tsela eo ba phelang ka eona.”

Monna e mong ea bitsoang Lionel, o re: “Basebetsi-’moho le ’na ba ne ba bua leshano, ba lofa mosebetsing, ba re baa kula le hoja ba sa kule. Ba ipitsa balumeli empa liketso tsa bona li latola seo—ho bona bolumeli bo itšoanela feela le thepa ea ka tlung e khabisitseng.”

Bolumeli ha bo susumetse tsela eo batho ba bangata ba itšoarang ka eona. Batho ba bangata kajeno ba na le “ponahalo ea boinehelo ba bomolimo” empa ha ba na “’nete matleng a bona.” (2 Timothea 3:5) Baeta-pele ba bona ba bolumeli ha ba ba behele mohlala o motle, ebile ha ba ba rute lithuto tsa Bibele tse mabapi le boitšoaro. Ha ho makatse hore ebe batho ba bangata ba nahana hore Molimo ha a na taba le hore na ba phela ka tsela efe.

Bibele e bontša hore Molimo o na le maikutlo ebile o tsotella hore na re itšoara joang. Ha Baiseraele ba boholo-holo ba ne ba fetohela Molimo, ba ne “ba mo utloisa bohloko.” (Pesaleme ea 78:40) Leha ho le joalo, ho ba le “thabo e [khōlō] leholimong” ha ka boikokobetso motho a fetola boitšoaro ba hae bo fosahetseng. (Luka 15:7) Ha motho a qala ho ananela litšobotsi tse ntle tsa Ntate oa rōna ea leholimong, lerato la hae ho Molimo le tla hōla ’me seo se tla mo thusa hore a rate seo Molimo a se ratang le ho hloea seo Molimo a se hloileng.—Amose 5:15.

Ha e bua ka Lipaki Tsa Jehova, koranta ea Deseret News ea Salt Lake City, Utah, U.S.A., e re: “Li thusa malapa hore a be le kamano e ntle, li thusa ba bang ebile ke baahi ba tšepahalang.” E eketsa ka ho re: “Li latela melao e phahameng ea boitšoaro. Li lumela hore ho tsuba, ho noa haholo, ho sebelisa lithethefatsi, ho becha, boitšoaro bo hlephileng ba ho kopanela liphate le ho ratana le batho ba bong bo tšoanang ke liketso tse senyang kamano ea motho le Molimo.”

Ho ithuta botho ba Molimo ho thusa Lipaki ka tsela efe? Sylvia, eo ho builoeng ka eena pejana, o re: “Bobolu bo tloaelehile moo ke sebetsang teng. Ho ka ba bonolo hore motho a bo etse. Empa ho utloisisa hore na Jehova * o ikutloa joang ka bona, ho nthusitse hore ke etse se nepahetseng. Ke thabile ebile ke na le letsoalo le khutsitseng.” Sylvia o kholisehile hore ho phela tumellanong le lithuto tseo bolumeli ba hae bo li rutang ho ntlafalitse bophelo ba hae.