Na U ka Tšepa Bolumeli Litabeng Tsa Ntoa?
Alberto e bile lesole ka lilemo tse ka bang leshome. O re: “Moruti oa rōna o ile a re hlohonolofatsa, a re, ‘Molimo o na le lōna.’ Empa ke ile ka nahana, Bibele e bolela hore “u se ke ua bolaea” ‘empa ’na ke il’o bolaea.’”
Ray e ne e le lesole la metsing ka Ntoa ea II ea Lefatše. Ka lekhetlo le leng o ile a botsa moruti oa bona a re: “U tla sekepeng ’me u tlil’o re rapella hore re hlōle. Na ba lireng le bona ha ba etse ntho e tšoanang?” Moruti o ile a re re ke ke ra utloisisa litsela tseo Morena a sebetsang ka tsona.
Haeba karabo eo ha e u khotsofatse, hase uena feela.
KE’NG SEO BIBELE E SE RUTANG?
Jesu o ile a re o mong oa melao ea Molimo e meholo ka ho fetisisa ke hore “u rate moahelani oa hao joalokaha u ithata.” (Mareka 12:31) Na Jesu o ile a beha meeli ea hore na moahelani ke motho ea lulang sebakeng sefe kapa ke oa morabe ofe? Che. O ile a re ho barutuoa ba hae: “Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:34, 35) Lerato la bona e ne e tla ba le ikhethang hoo e neng e tla ba letšoao le ba khethollang. Ba ne ba ka mpa ba shoelana ho e-na le hore ba bolaeane.
Bakreste ba pele ba ne ba phela tumellanong le mantsoe a Jesu. The Encyclopedia of Religion e re: “Bangoli ba boholo-holo ba lithuto tsa Bokreste ba akarelletsang Tertullian le Origen, ba ile ba tiisa taba ea hore Bakreste ba ne ba thibeloa ho bolaea batho ba bang, e leng molao-motheo o ileng oa etsa hore ba se ke ba kena sesoleng sa Roma.”
LIPAKI TSA JEHOVA TSONA LI ETSA JOANG?
Kaha Lipaki Tsa Jehova li lula hoo e ka bang linaheng tsohle, litho tsa tsona li iphumana li le mahlakoreng a mabeli a linaha tse loantšanang. Leha ho le joalo, li leka ka matla ho bontša lerato, e leng letšoao le li khethollang.
Na baeta-pele ba bolumeli ba rutile batho ho bontša lerato la ’nete la Bokreste?
Ka mohlala, ka 1994 ha Mahutu le Matutsi a ne a loantšana, Rwanda, ho hang Lipaki Tsa Jehova ha lia ka tsa nka lehlakore. Lipaki tsa merabe ena e fapaneng li ne li sireletsana ’me hangata li beha bophelo ba tsona kotsing. Ha Lipaki tse peli tsa Mahutu tse neng li patile Lipaki tsa Matutsi li fumanoa, lesole la Mohutu la Interahamwe le ile la re, “Le lokela ho shoa hobane le thusitse Matutsi ho baleha.” Ka masoabi, Lipaki tseo tse peli tsa Mahutu li ile tsa bolaoa.—Johanne 15:13.
U nahana’ng ka see: Na tsela eo Lipaki Tsa Jehova li etsang lintho ka eona e lumellana le seo Jesu a se buileng mabapi le ho itella ba bang le ho ba bontša lerato?
