Lipaki Tsa Jehova li kentse mochine o mocha oa ho kopanya libuka lefapheng la tsona la khatiso le Ebina, Japane, e le hore li khone ho finyella palo e hlokahalang ea Libibele tse lekoko le thata le tsa deluxe.

Qalong, ho ne ho bonahala eka mosebetsi ona o ke ke oa atleha kaha ho ile ha e-ba le tšisinyeho ea lefatše le tsunami Japane, ka la 11 March, 2011, ’me seo se ile sa etsa hore motlakase o time khafetsa libakeng tse ngata.

Leha ho le joalo, mosebetsi ona o ile oa qala ka September 2011. Ka nako e ka tlaase ho likhoeli tse tharo hamorao, likopi tsa pele tsa Phetolelo ea Lefatše le Lecha tsa Sechaena li ile tsa kopanngoa ka mochine ona.

Mochine ona o kopanyang oa othomathike, o bolelele ba limithara tse ka bang 400. Ha maqephe a hatisitsoeng a tsamaea lebanteng, aa kopanngoa, a kenngoa lekoko, aa otlolloa, aa pakoa ebe a kenngoa ka mabokoseng, ebe mabokose ao aa koaloa ’me a pakoa mapolankeng.

E le hore mosebetsi ona o atlehe ho ile ha hlokahala hore o reroe ka hloko le ho hlophisoa hantle. Ka mohlala, likarolo tsa mochine ona li ile tsa pakoa ka tsela e sireletsehileng, tsa kenngoa mabokoseng a lepolanka tsa ntan’o kenngoa lik’hontheinareng tse 34 eaba li romeloa Japane ka sekepe li tsoa Europe.

Litho tse leshome tsa lekala la Lipaki Tsa Jehova la United States li ile tsa ea Japane ho ea thusa ka mosebetsi ona. Barab’abo rōna ba bang, ba ile ba lula likhoeli tse tšeletseng ba ntse ba ruta basebetsi ba Japane hore na mochine ona o sebetsa joang le hore o ka hlokomeloa joang e le hore o lule o le maemong a matle.

Lik’hamphani tse khōlō tsa Japane tse kopanyang libuka, tse li hatisang le tse li phatlalatsang, li ile tsa khahloa ke mochine ona. Ka la 19 March, 2012, batho ba ka holimo ho lekholo ba tsoang lik’hamphaning tseo, ba ile ba tla ho tla bona mehaho ea rōna. Ba ile ba hlolloa haholo.

Pele ba tsamaea, e mong le e mong o ile a fuoa kopi ea Phetolelo ea Lefatše le Lecha e entsoeng ka mochine o mocha.

Joaloka makala a rōna a United States le Brazil, lekala la Japane le lona le tla hatisa Libibele tse lekoko le thata bakeng sa Lipaki Tsa Jehova lefatšeng ka bophara.

Lipaki le basebeletsi ba lik’hamphani tse ikemetseng ba ileng ba thusa mosebetsing ona ba ile ba thabela ho sebetsa hammoho. Monna e mong ea neng a sebetsa moo eo e seng Paki o ile a re: “Ekare le banab’eso.”

Letsatsing la ho qetela, mosebetsi e mong eo e seng Paki o ile a re: “Mosebetsi o latelang oo ke tla o etsa o tla ba thata ka ho fetisisa hobane e ke ke ea e-ba o thabisang joaloka oo ke ileng ka o etsa mona Watchtower!”