Mexico le Amerika Bohareng, ho na le bafetoleli ba ka bang 290, ba lulang linaheng tse tšeletseng, ba fetolelang lingoliloeng tse thehiloeng Bibeleng ka lipuo tse fetang 60. Ke hobane’ng ha ba etsa mosebetsi oo? Hobane ha batho ba bala lingoliloeng tse thehiloeng Bibeleng ka puo eo ba e utloisisang, ho ka ba bonolo hore molaetsa o ame lipelo tsa bona.—1 Bakorinthe 14:9.

E le hore ho ntlafatsoe phetolelo, bafetoleli ba bang ba neng ba sebetsa ofising ea lekala ea Lipaki Tsa Jehova e Mexico City, ba isitsoe libakeng tseo lipuo tsa bona li buuoang ho tsona. Seo se ba thusitse joang? Bafetoleli ba kopana le batho ba buang puo eo ba fetolellang lingoliloeng ho eona ’me sena se etsa hore ho be bonolo hore ba fetolele ka tsela eo ba tla e utloisisa.

Bafetoleli ba ikutloa joang ka phetoho eo? Federico, e leng mofetoleli oa puo ea Seguerrero Nahuatl, o re: “Ka lilemo tse leshome tseo ke lutseng Mexico City ka tsona, ke ile ka fumana lelapa le le leng feela le buang puo ea ka. Empa hona joale, litoropong tse haufi le ofisi ea phetolelo, e batla e le motho e mong le e mong ea buang puo ena!”

Karin, e leng mofetoleli oa puo ea Selow German ofising ea phetolelo e Mexico, Chihuahua, o re: “Ho lula mona har’a Bamennonite ho nthusitse hore ke se ke ka salla morao ka puo eo ba e buang. Re lula toropong e nyenyane ebile re sebetsa teng ’me ha ke hlaha ka fensetere kea bona hore batho ba tla rua molemo mosebetsing ona oa phetolelo oo re o etsang mona.”

Neyfi, ea seng a lula ofising ea phetolelo e Mérida, Mexico, o re: “Ha re khanna lithuto tsa Bibele ka Semaya, re hlokomela mantsoe ao Bamaya ba ke keng ba a utloisisa habonolo. Kahoo re sheba mekhoa e meng eo ka eona re ka fetisang molaetsa ka tsela eo ba ka e utloisisang.”

Batho ba balang lingoliloeng tse fetoletsoeng ba una molemo joang? Hlokomela mohlala ona: Elena, eo puo eo a e antseng letsoeleng e leng Setlapanec, o ’nile a ba teng kamehla libokeng tsa Lipaki Tsa Jehova ka lilemo tse 40. Empa kaha liboka li ne li tšoaroa ka Sepanishe, o ne a sa utloisise se buuoang. O ile a re: “Ke ne ke thabela ho ba teng libokeng.” Leha ho le joalo, ka mor’a hore Elena a ithute Bibele ka libukana tsa Setlapanec, o ile a rata Molimo haholo hoo a ileng a inehela ho eena ’me a kolobetsoa ka 2013. Elena o re: “Ke leboha Jehova ka hore ebe u nthusitse ho utloisisa Bibele.”