Ka July 2009, Lipaki Tsa Jehova li ile tsa reka sebaka se seng New York ka morero oa hore ntlo-khōlō e fallisetsoe moo. Sebaka sena se lihekthere tse 102 (253 a.) se bohōle ba lik’hilomithara tse ka bang 80 (50 mi) ka leboea-bophirimela ba moo ntlo-khōlō e leng teng Brooklyn, New York, moo esale e le hona teng ho tloha ka 1909.

Lipaki tse ka bang 800 li tla lula le ho sebetsa mehahong e mecha e tla akaretsa oa liofisi, oa litšebeletso le e mene ea bolulo. Ho tla hahoa musiamo o itekanetseng o bontšang nalane ea Lipaki Tsa Jehova mehleng ena.

Mehaho e tla nka sebaka sa lihekthere tse 18 (45 a.) tsa setša sena ebe ho sala sebaka se nang le lifate le se mokhoabo. Ho ke ke ha e-ba le sebaka se seholo sa ho lema joang. Ho e-na le hoo se tla lumellana le sebaka seo se leng ho sona se lifate.

Litsebi li ralile mehaho ka tsela e tla khona ho boloka motlakase e leng se tla fella ka ho baballa tikoloho le ho fokotsa litšenyehelo tsa ho sebelisa mehaho. Ka mohlala, marulelong a mehaho ho tla lengoa limela tse tšoarellang tse sa hlokeng ho hlokomeloa ka thata tse tla thusa ho laola metsi a pula le thempereichara ka har’a mehaho. Tsela eo liofisi li raliloeng ka eona e tla etsa hore li chabeloe ke leseli la tlhaho. Ho boloka metsi le hona ke habohlokoa.

Ke hobane’ng ha ho falloa? Liofisi tsa makala tsa Lipaki Tsa Jehova likarolong tse ling tsa lefatše li se li hatisa Libibele le lingoliloeng tse thehiloeng Bibeleng, e leng mosebetsi o neng o etsoa Brooklyn feela. Ka 2004, mosebetsi oa ho hatisa le ho romela lingoliloeng o neng o etsoa United States o ile oa isoa Wallkill, New York, e leng bohōle ba lik’hilomithara tse ka bang 145 (90 mi) ka leboea-bophirimela ba Brooklyn.

Ho ile ha nahanoa le ka litšenyehelo. Ho ja chelete e ngata ho sebelisa mehaho e Brooklyn le ho e boloka e le boemong bo botle. Ka ho fallela sebakeng se itekanetseng, Lipaki li ka khona ho sebelisa chelete hamolemonyana ho hlokomela mosebetsi oa ho ruta ka Bibele.

Pele ho ka fanoa ka tumello ea ho qetela ho lokela ho etsoe tlhahlobo ea tikoloho. Haeba tsohle li tsamaea ka thello mosebetsi oa kaho o tla qala ka 2013 ’me o tla nka lilemo tse ’nè pele o qetoa.

Ntle ho mohaho oa khatiso o Wallkill, New York, Lipaki Tsa Jehova li boetse li na le setsi sa thuto se Patterson, New York. Ho na le liofisi tsa makala linaheng tse ngata. Lefatšeng ka bophara Lipaki li ka ba limilione tse supileng le halofo.