Ka mor’a ho ithuta Bibele ka hloko ka likhoeli tse hlano, liithuti tsa sehlopha sa bo136 sa Gileade, li ile tsa fumana mangolo ka Moqebelo oa la 8 March, 2014. Sekolong sena, baboleli ba nang le phihlelo ba ithuta hore na ke joang ba ka atlehang haholoanyane tšebeletsong ea bona le hore na ba ka matlafatsa tumelo ea balumeli-’moho le bona joang. Batho ba 11 548 ba ne ba le teng lenaneong lena, ba bang ba ne ba ile moo le neng le tšoaretsoe teng setsing sa thupelo sa Lipaki Tsa Jehova se Patterson, New York, ha ba bang bona ba ne ba hoketsoe ka video ba le Canada, Jamaica, Puerto Rico, le United States.

“Bolokang Boikutlo Bona ba Kelello ho Lōna.” David Splane, e leng setho sa Sehlopha se Busang sa Lipaki Tsa Jehova eo hape e neng e le molula-setulo oa lenaneo leo, o ile a theha mantsoe a hae a qalang ho Bafilipi 2:5-7, e reng: “Bolokang boikutlo bona ba kelello ho lōna bo neng bo le teng le ho Kreste Jesu.” Ha Jesu a ne a le lefatšeng, o ne a sa ameha ka maemo empa o ne a ikokobelitse ’me a sebetsa ka thata tšebeletsong ea hae.

Ka mohlala, ha Jesu a ne a hanyetsa liteko tsa Diabolose o ne a bua mantsoe a reng, “Ho ngoliloe,” a qotsa mantsoe ao Moshe a ileng a a bolella sechaba sa Iseraele. (Matheu 4:4, 7, 10; Deuteronoma 6:13, 16; 8:3) Kaha ke Mor’a Molimo ea tlotsitsoeng, Jesu a ka be a ile a sebelisa boemo ba hae ’me a bua ho latela bohlale ba hae empa o ile a ikokobetsa ’me a bontša hore o ananela mosebetsi oa Moshe. Ka tsela e tšoanang, le rōna re lokela ho ananela bokhoni ba batho ba bang ’me re ba babatse.

Mor’abo rōna Splane o ile a boela a totobatsa kamoo Jesu a ileng a bontša boikokobetso kateng qetellong ea koetliso ea hae ea lefatšeng. Thapelong ea hae, Jesu o ile a re: “Ke u tlotlisitse lefatšeng, kaha ke qetile mosebetsi oo u mphileng oona hore ke o etse. Kahoo joale, Ntate, u ntlotlise haufi le uena ka khanya eo ke neng ke e-na le eona haufi le uena pele lefatše le e-ba teng.” (Johanne 17:4, 5) Jesu ha aa ka a batla litokelo tse eketsehileng. Kōpo ea hae feela e ne e le hore a khutlisetsoe boemong boo a neng a le ho bona pele, kapa hona hore a ‘fuoe mosebetsi oa hae hape,’ ha a khutlela leholimong. Ka tsela e tšoanang, liithuti tsa Gileade li lokela ho etsisa mohlala oa Jesu ka ho ameha ka ho etsa mosebetsi, ho e-na le ho ameha ka maemo ’me li khotsofale le hoja li sa fumane litokelo tse eketsehileng ha li khutlela likabelong tsa tsona.

‘Ho Itela le sa Ikoahlaee.’ William Malenfant, e leng mothusi Komiting ea Thuto ea Sehlopha se Busang o ile a khothalletsa liithuti hore li etsise mohlala oa moapostola Pauluse oa ho itela. Ho e-na le hore a ikoahlaele lintho tseo a ileng a itella tsona bakeng sa tšebeletso ea Molimo, Pauluse o ile a re: “Ha ke lebala lintho tse ka morao le ho hahamalla linthong tse ka pele, ke phehella pakaneng.”—Bafilipi 3:13, 14, Bibele ea Sesotho.

Ha liithuti li itela li sa ikoahlaee, li tla etsisa mohlala oa bahlanka ba Molimo ba tšepahalang ba nakong e fetileng le ba mehleng ena. Mor’abo rōna Malenfant o ile a qotsa Clara Gerber Moyer, ea ileng a qala ho sebeletsa Jehova esale ngoana. Clara o ile a ngola a re: “Hoa thabisa ho sheba morao lilemong tse 80 tse fetileng tseo ke li qetileng tšebeletsong ea Molimo ’me ke sa ikoahlaee! Haeba nka khutlisetsa nako morao, nka etsa lintho ka tsela e tšoanang.”

“Ho Bolela ka ’Muso Joaloka Mangeloi Hammoho le Mangeloi.” Gerrit Lösch, e leng setho sa Sehlopha se Busang, o ile a thusa liithuti ho ananela litokelo tse peli tseo batho ba bolelang litaba tse molemo ba li thabelang. Ea pele, ba sebetsa joaloka mangeloi a Molimo ha ba bolela litaba tse molemo tsa ’Muso, hobane lentsoe la Seheberu le la Segerike le sebelisoang ka Bibeleng e le “lengeloi” le ka boela la fetoleloa e le “moromuoa.” Ea bobeli, liithuti li bolela litaba tse molemo li tataisoa ke mangeloi feela joalokaha morutuoa Filipi a ne a etsa.—Liketso 8:26-35.

Mor’abo rōna Lösch o ile a bua ka lintho tse ’maloa tseo Lipaki Tsa Jehova li ileng tsa kopana le tsona ha li le mosebetsing oa boboleli. Ka mohlala, Gabino e leng Paki e lulang Mexico, eo ka tloaelo a kokotang hanngoe kapa habeli menyako ea batho, ka letsatsi le leng o ile a kokota ntlong e ’ngoe ka makhetlo a mane. Mong’a ntlo eo o ile a bula ’me a bolella Gabino hore o ne a le mothating oa ho ipolaea. Monna eo o ile a re: “Ha o ne o kokota ka lekhetlo la bone, ke ne ke se ke itlamme ka thapo molaleng. Empa ke ile ka e tlamolla e le hore ke tl’o bula monyako. Kea leboha ha o ile oa phehella ho kokota. Ha u ne u sa etsa joalo, nka be ke ipolaile.”

Le hoja liphihlelo tse kang tsena li iketsahalla feela li sa reroa, rea tseba hore tse ngata tsa tsona li fana ka bopaki ba hore mangeloi a Molimo a tataisa mosebetsi oa boboleli o etsoang lefatšeng lohle.—Tšenolo 14:6.

“Ea Hlomphehang o Tla Hlohonolofatsoa.” Michael Burnett, e leng morupeli oa sekolo sa Gileade, o ile a atolosa sehlooho sena ka ho bua ka mohlala oa setloholo sa Juda e leng Jabeze, ea neng a ‘hlompheha ho feta barab’abo.’ Jabeze o ile a rapela Molimo a re: “Haeba ruri u tla ntlhohonolofatsa ’me u eketse naha ea ka ’me letsoho la hao le hlile le e-ba le ’na, ’me ka sebele u mpoloka tlokotsing!”—1 Likronike 4:9, 10.

Liithuti li ka etsisa mohlala o hlomphehang oa Jabeze ka hore ha li rapela li tobe taba, haholo-holo ha li kōpa Molimo hore a li thuse ho sebelisa koetliso eo li e fumaneng sekolong sa Gileade. Ka ho loketseng li ka kōpa Molimo hore a li boloke tlokotsing eseng hore a li sireletse tlokotsing ka ho feletseng empa a li thuse hore li se ke tsa sithabela haholo ke liphello tsa bokhopo. Molimo o ile a araba thapelo ea Jabeze ’me o tla arabela le ea liithuti tsa Gileade.

“Lula u Cheseha.” Mark Noumair, e leng morupeli oa Gileade le mothusi Komiting ea Thuto, o ile a theha puo ea hae ho 1 Bathesalonika 5:16-19. Joalokaha mollo oa sebele o hloka libeso, moea le mofuthu hore o lule o tuka, liithuti le tsona li ka sebelisa lintho tse tharo ho etsa hore li lule li chesehela tšebeletso.

Ea pele, “thabang kamehla.” (1 Bathesalonika 5:16) Liithuti li ka fumana thabo ka ho nahanisisa ka tlhohonolofatso ea ho amoheloa ke Jehova ’me seo se tla etsa hore li lule li cheseha. Ea bobeli, “rapelang le sa phetse.” (1 Bathesalonika 5:17) Thapelo e tšoana le moea o etsang hore mollo o lule o tuka. Re lokela ho lelefatsa lithapelo tsa rōna ka ho tšollela lipelo tsa rōna ho Molimo. Ea boraro, “mabapi le ntho e ’ngoe le e ’ngoe le lebohe.” (1 Bathesalonika 5:18) Ha re bontša teboho re ba le kamano e mofuthu le Jehova hammoho le bara le barali babo rōna. Mor’abo rōna Noumair o ile a re: “Ho e-na le hore le lule le tšoaea liphoso, bontšang boikutlo bo mofuthu ba kananelo.”

“Ho Rorisa Jehova Hammoho le Maholimo.” Sam Roberson, e leng morupeli likolong tsa Puso ea Molimo, o ile a theha mantsoe a hae a qalang lipolelong tse hlahang ka Bibeleng tse bontšang hore letsatsi, khoeli le linaleli li tlotlisa Jehova. (Pesaleme ea 19:1; 89:37; 148:3) O ile a boela a re liithuti le tsona li bile le tokelo ea ho rorisa Jehova ’me o ile a li bontša seo ka hore li etse lipontšo tsa lintho tse thabisang tseo li ileng tsa kopana le tsona tšimong. Ka mohlala, ka mor’a hore seithuti se emise koloi hore monna ea neng a le setulong sa likooa a fete, monna eo o ile a leboha seithuti ’me seithuti le sona se ile sa mo leboha ka hore ebe o bontšitse teboho. Ka mor’a moo ba ile ba buisana ’me monna eo o ile a amohela thuto ea Bibele ea mahala. Ha seithuti sa Gileade se ntse se tsoela pele ho ithuta le monna eo, se ile sa pakela batho ba bang ba neng ba etetse monna eo. Qetellong, ka lebaka la moqoqo oo se ileng sa e-ba le oona le monna eo, seithuti se ile sa qala ho ithuta le batho ba bang ba supileng.

“Thuto ea Molimo e ke e le Matlafatse.” Donald Gordon, e leng mothusi Komiting ea Khatiso, o ile a buisana le barab’abo rōna ba babeli le basali ba bona sehlopheng seo. E mong oa barab’abo rōna o ile a hopola Baefese 3:16-20, e ileng ea tšohloa ha sekolo se ntse se tsoela pele. Sena se ile sa thusa liithuti hore li “matlafatsoe” ka hore li ikokobetse le ho atameleha le ho hlokomela hore Jehova o ntse a e-na le mosebetsi o mongata bakeng sa Paki e ’ngoe le e ’ngoe. Morali’abo rōna e mong o ile a re o ananela kamoo morupeli e mong oa Gileade a ileng a khothalletsa liithuti hore li tšoane le tlhapi e nyenyane ka leoatleng le leholo eseng tlhapi e khōlō ka sejaneng se senyenyane. O ile a re: “Ntho eo ke ithutileng eona ke hore ha ke itšoara joaloka e monyenyane mokhatlong oa Jehova, o tla nthusa hore ke hōle moeeng.”

“E se e ka Jehova a ka le Hopola Bakeng sa se Molemo.” Mark Sanderson, e leng setho sa Sehlopha se Busang o ile a fana ka puo ea sehlooho ea lenaneo leo ’me o ne a e thehile thapelong ea Nehemia e reng: “Molimo oa ka, u nkhopolele bakeng sa se molemo.” (Nehemia 5:19; 13:31) Nehemia o ne a sa tšoha hore Jehova a ka mo lebala hammoho le mosebetsi oo a o entseng tšebeletsong ea Hae. Ho e-na le hoo, o ne a kōpa Molimo hore a mo bontše lerato le hore a mo hlohonolofatse.

Ka ho tšoanang, liithuti li ka ba le tumelo ea hore Jehova o tla li hopola haeba feela li sebelisa seo li ithutileng sona sekolong sa Gileade. Lerato la tsona ho Jehova e lokela ho ba ntho e ka sehloohong e li susumetsang ho mo rapela. (Mareka 12:30) Abrahama o ne a rata Jehova ka pelo ea hae eohle ’me Molimo le eena o ne a mo rata. Le hoja Abrahama a ne a se a e-na le lilemo tse sekete a hlokahetse, Molimo o ile a mo bitsa “motsoalle oa ka.”—Esaia 41:8.

Mor’abo rōna Sanderson o ile a boela a hopotsa liithuti hore li rate baahelani ba tsona, haholo-holo bara le barali babo rōna ba Bakreste. (Mareka 12:31) Joaloka Mosamaria ea molemo, ea ileng a ‘iketsa moahelani oa monna eo ea ileng a oela har’a masholu,’ li lokela ho nka bohato ba pele ho thusa ba bang. (Luka 10:36) Ho hlakisa ntlha eo a buang ka eona, o ile a etsa mohlala ka Nicholas Kovalak, ea neng a tsoa sekolong sa Gileade ’me a sebeletsa joaloka molebeli oa setereke. Mor’abo rōna Kovalak o ne a tsejoa ka mofuthu le lerato leo a neng a e-na le lona. Ka lekhetlo le leng o ile a khothalletsa molebeli ea tsamaeang le mosali oa hae hore ba chesehe boboleling ba bona a sebelisa polelo e reng, “Qalang tšebeletso esale hoseng, ha beke e qala, ha khoeli e qala le mathoasong a selemo.” Leha ho le joalo, ka mor’a matsatsi a seng makae a shebile tsela eo morali’abo rōna a neng a sebetsa ka eona, o ile a re: “Lebala seo ke ileng ka se bua. U se u ntse u sebetsa ka thata. Fokotsa hanyane e le hore u ’ne u tsoele pele u sebeletsa Jehova.” Keletso ea hae e mosa le e neng e bontša kutloelo-bohloko e ile ea thusa morali’abo rōna hore a tsoele pele tšebeletsong ea nako e tletseng ka lilemo tse mashome.

Qetellong, Mor’abo rōna Sanderson o ile a khothalletsa liithuti ho sebelisa seo li ithutileng sona sekolong ka ho ruta le ho koetlisa ba bang. (2 Timothea 2:2) Ha li ntse li phetha likabelo tsa tsona, li ka matlafatsa le ho tiisa mokhatlo oohle oa bara ba motho, li kholisehile hore Jehova o tla li hopola bakeng sa se molemo.—Pesaleme ea 20:1-5.

Qetello. Ka mor’a hore liithuti li fumane mangolo a tsona, e mong oa liithuti o ile a bala lengolo la teboho le tsoang sehlopheng. Liithuti tse 15 li ile tsa phethela lenaneo leo ka ho bina pina ea 123 e tsoang bukeng ea Binelang Jehova, e nang le sehlooho se reng, “Balisa—Limpho Tseo e Leng Banna.”