•   U ikutloa joang ha batho ba bang ba rohakana?

  •  Ha ke hlokomele ebile ha ke utloe letho le phoso.

  •  Hoa ntšoenya empa ke se ke amohetse hore batho ba bua joalo.

  •  Hoa nkhopisa kamehla.

•   U rohakana hangata hakae?

  •  Ho hang

  •  Ka linako tse ling

  •  Hangata

•   U bona eka ho rohakana ke ntho e tebileng hakae?

  •  Ha se ntho e tebileng hakaalo

  •  Ke ntho e tebileng

 Na u bona eka ho rohakana ke taba e tebileng? U ka ’na oa re ‘eseng hakaalo, hobane ho na le mathata a mangata lefatšeng ao re ka tšoenyehang ka ’ona. Ntle ho moo batho bohle baa rohakana.’ Empa na taba eo ke ’nete?

 U ka ’na oa makatsoa ke hore ho na le batho ba bangata ba sa rohakaneng, ’me ho na le lintho tseo ba li tsebang ka ho rohakana tseo batho ba bang ba sa li tsebeng. Ka mohlala:

•  Ho rohakana ha se feela taba ea mantsoe. Lintho tseo u li buang lia bontša hore na u motho oa mofuta ofe. Ho rohakana ho bontša hore ha u nahanele maikutlo a batho ba bang. Na u motho oa mofuta oo?

   Bibele e re: “Lintho tse tsoang molomong li tsoa pelong.”​—Matheu 15:18.

•  Ho rohakana ho ka etsa hore batho ba bang ba se ke ba u hlompha. Buka ea Cuss Control e re: “Tsela eo re buang ka eona e ka ama hore na metsoalle ea rona e tla ba bo-mang, hore na ba malapa a rona le batho bao re sebetsang le bona ba tla re hlompha kapa che, hore na re sebelisana joang le batho ba bang, hore na batho ba bang ba tla nka likeletso tsa rona, hore na re tla nyolloa mosebetsing kapa re tla hiroa le hore na batho ba sa re tsebeng ba tla ikutloa joang ka rona.” E boetse e re: “Ipotse hore na mohlomong tsela eo u sebelisanang le batho ka eona e ne e ka ntlafala haeba u ne u sa rohakane.”

   Bibele e re: ‘Puo e nyefolang e ke e tlosoe ho lona.’​—Baefese 4:31.

•  Ho rohakana ha ho khahlise joalokaha u ka nahana hore hoa khahlisa. Bukeng ea hae ea How Rude! Dr. Alex Packer o re: “Hoa khathatsa ho mamela batho ba lulang ba rohakana.” O boetse o re ho bua mantsoe a mabe “ha ho fe motho monyetla oa ho bontša hore o bohlale, oa qabola kapa o utloela ba bang bohloko. Haeba lintho tseo u li buang li sa utloahale, li bontša hore u botsoa li bile li se na moelelo, kelello ea hao le eona e tla ba joalo.”

   Bibele e re: “Polelo e bolileng e se ke ea tsoa melomong ea lona.”​—Baefese 4:29.

•  Ipehele seo u batlang ho se finyella. Leka ho ipehela nako e etsang khoeli kapa ka tlaase ho moo u sa rohakane. U ka tšoaea matsatsi ao u sa rohakanang ka oona k’halendareng. Leha ho le joalo, u ka ’na oa lokela ho etsa lintho tse ling hape tse ka u thusang. Ka mohlala:

•  Qoba ho ithabisa ka lintho tse rohakanang. Bibele e re: “Litloaelano tse mpe li senya mekhoa e metle.” (1 Bakorinthe 15:​33) “Litloaelano” ha se feela batho bao re qetang nako le bona empa li akarelletsa le boithabiso, e leng limovie tseo re li shebellang, lipapali tsa livideo tseo re li bapalang le ’mino oo re o mamelang. Kenneth ea lilemo li 17 o re: “Ho bonolo ho bina le pina eo u e ratang ebe u iphapanyetsa taba ea hore e ntse e rohakana hobane feela e e-na le morethetho o monate.”

•  Bontša hore u holile. Batho ba bang ba nahana hore ho rohakana ho bontša hore ha e sa le bana. Empa ntho eo ha se ’nete. Ha Bibele e bua ka batho ba holileng e re, ‘matla a bona a ho lemoha a koetliselitsoe ho khetholla se nepahetseng le se fosahetseng.’ (Baheberu 5:​14) Ha ba tlohele mekhoa ea bona e metle hore feela ba “khahlise” ba bang.

 Puo e hlohlontšang litsebe e silafatsa kelello ka menahano e fosahetseng. Lefatšeng ho se ho ntse ho e-na le batho ba bangata ba rohakanang, u se ke oa eketsa palo ea bona. Buka ea Cuss Control e re: “Etsa seo u ka se khonang ho bua puo e hloekileng. Ha u etsa joalo u tla ikutloa hantle le batho ba bang ba tla u hlompha.”