Sehloohong sena

•  Boikarabelo ba ntate ke bofe ka lapeng?

•  Ke joang karolo eo ntate a e phethang ka lapeng e ikhethang?

•  Bo-ntate le barali ba bona

•  Keletso bakeng sa bo-ntate

•   Pele ngoana oa hao a hlaha. Tsela eo u tšoarang molekane oa hao ka eona hona joale ea bontša hore na u tla ba ntate ea joang nakong e tlang. Buka ea Do Fathers Matter? e re:

   “Ho tla ba bonolo haholo ho ntate hore a phethe boikarabelo ba hae ho molekane oa hae le ho lesea la hae ka mor’a hore le hlahe haeba a thusa molekane oa hae ho reka lintho tsa lesea le e-s’o hlahe, a mo isa ngakeng, a bile a bona lesea le e-s’o hlahe le ho utloa pelo ea lona ka skene sa ultra-sound.”

   “Ke ne ke sa batle hore molekane oa ka a ikutloe eka o mong nakong eo a neng a lebeletse lesea la rona, kahoo ke ile ka mo thusa ka hohle kamoo ke neng ke khona. Re ile ra ba ra thusana ho lokisa kamore ea ngoana. E ne e le nako e monate haholo ho rona ha re lokisetsa ho ba teng ha lesea la rona.”—James.

   Keletso ea Bibele: “Le se ke la ameha feela ka lintho tse le tsoelang molemo empa le amehe le ka lintho tse tla tsoela batho ba bang molemo.”—Bafilipi 2:4.

•   Ha ngoana a se a le teng. Le tla ba metsoalle le ngoana oa hao haeba u qeta nako le eena ebile u bapala le eena. U ka boela oa ipha nako ea ho hlokomela ngoana. Lintho tseo u li etsetsang ngoana oa hao li etsa phapang e kholo ha a ntse a hola. Setsoalle seo u se etsang le ngoana oa hao se bontša hore u mo nka e le oa bohlokoa haholo.

   “Theohela boemong ba ngoana oa hao. Bapala le eena ’me u mo qabole. U se ke oa etsa hore ngoana oa hao a u tšabe. Hopola hore ha ngoana a qala ho utloa mofuthu oa lerato, o le utloa ka batsoali ba hae.”—Richard.

   Keletso ea Bibele: “Bana ke lefa le tsoang ho Jehova, ke mpho e tsoang ho Molimo.”—Pesaleme ea 127:3, naletsana.

•   Ha ngoana oa hao a ntse a hola. Lipatlisiso li bontša hore bana ba holang ba e-na le setsoalle se haufi le bo-ntate ba bona ba sebetsa hantle sekolong, ha se hangata ba bang le khatello ea maikutlo kapa ba sebelisang lithethefatsi le ho kenella botlokotsebeng. Iphe nako ea ho etsa setsoalle se haufi le ngoana oa hao.

   “Mora oa ka o ile a mpolella hore ntho eo a neng a tla e hopola haholo nakong eo a tlohang lapeng, ke moqoqo o molelele oo re neng re e-ba le oona nakong ea lijo kapa ha re nkile leeto. Ka linako tse ling re ne re iphumana re se re buile litaba tsa bohlokoa re sa lebella. Sena se ne se etsahala hobane re ne re qeta nako e ngata re le ’moho.”—Dennis.

   Keletso ea Bibele: “Le se ke la itšoara joaloka batho ba se nang kelello empa le itšoare joaloka ba bohlale, le sebelise nako ea lona hantle.”—Baefese 5:15, 16.

 Ka tloaelo, bo-ntate ba tsejoa ka ho hlokomela ba malapa a bona ka lintho tseo ba li hlokang le ho ba sireletsa, ha bo-’mé bona ba khona ho hlokomela ba lelapa maikutlong. (Deuteronoma 1:31; Esaia 49:15) Malapeng a mang, motsoali a le mong a ka phetha boikarabelo ba hae le ba e mong. Leha ho le joalo, bafuputsi ba bontša hore ’mé le ntate ba tlatsetsa ka litsela tse fapaneng ho etsa hore lelapa le thabe. a

 Mofuputsi oa tsa malapa Judith Wallerstein o ile a bua ka se ileng sa mo etsahalla e le ho netefatsa taba ena. O re: “Ha morali oa ka ea lilemo li 12 a ne a chaisitsoe ke koloi, o ne a batla hore ebe ntate oa hae ea palamang le eena ka koloing ea bakuli hobane o ne a kholisehile hore ntate oa hae o tla potlakela ho nka bohato. Ha a se a le sepetlele o ne a batla hore ke lule pel’a hae nako eohle e le hore ke mo khothatse.” b

 “Ntate o etsa hore lelapa le ikutloe le sireletsehile e leng ntho eo ’mé a ka thatafalloang ho e etsa a le mong. Ka tsela e tšoanang, ’mé o etsa hore ho be le mofuthu ka lapeng ebile o mamela ka mosa. ’Mé le ntate ba sebetsa hammoho hore lelapa e be le thabileng.”—Daniel.

 Keletso ea Bibele: “Mora oa ka, u mamele ha ntate oa hao a u khalemela, u se ke oa lahla lintho tseo ’mé oa hao a u rutileng tsona.”—Liproverbia 1:8.

 Joaloka ntate, u lokela ho ruta morali oa hao hore na motho oa bong bo fapaneng o lokela ho mo tšoara joang. Morali oa hao o ithuta sena ka litsela tse peli:

•   O sheba tsela eo u tšoarang ’mé oa hae ka eona. Ha u rata molekane oa hao ebile u mo hlompha, morali oa hao o bona makhabane ao a lokelang ho a sheba nakong eo a khethang molekane.—1 Petrose 3:7.

•   O sheba tsela eo u mo tšoarang ka eona. Ha u hlompha morali oa hao, u mo ruta hore le eena a itlhomphe. O tla lebella tlhompho e tšoanang ho batho ba bong bo fapaneng.

   Ka lehlakoreng le leng, ha u lula u tšoaea morali oa hao liphoso, sena se ka etsa hore a se ke a itšepa ’me a ka batla ho ratoa ke banna ba bang, banna ba sa mo lakaletseng se molemo.

   “Ha se hangata ngoana oa ngoanana ea ratoang le ho tšehetsoa ke ntate oa hae a ka nkehang maikutlo ke moshanyana ea se nang makhabane a ho ba molekane ea molemo.”—Wayne.