Jesu o ile a pholosa batho ba tšepahalang ha a ne a nehela bophelo ba hae e le sehlabelo sa thekollo. (Matheu 20:​28) Bibele e re ke “Mopholosi oa lefatše.” (1 Johanne 4:​14) E boetse e re: “Ha ho poloko ho mang kapa mang e mong, kaha ha ho lebitso le leng tlas’a leholimo leo ho fanoeng ka lona har’a batho leo ka sebele re tla pholoha ka lona.”​—Liketso 4:12.

 Jesu o ile a “latsoa lefu bakeng sa motho e mong le e mong” ea bontšang tumelo ho eena. (Baheberu 2:9; Johanne 3:​16) Ka mor’a moo, “Molimo a mo tsosa bafung,” ’me Jesu a khutlela leholimong e le sebopuoa sa moea. (Liketso 3:​15) Kahoo, Jesu “o khona le ho pholosa ka ho feletseng ba atamelang Molimo ka eena, hobane o phela kamehla ho ba kopela ka tieo.”​—Baheberu 7:25.

Ke hobane’ng ha re hloka hore Jesu a re kopele?

 Ke hobane kaofela re baetsalibe. (Baroma 3:​23) Sebe se etsa hore ho be le lekhalo lipakeng tsa rona le Molimo, ’me se lebisa lefung. (Baroma 6:​23) Jesu ke ’muelli oa ba bontšang tumelo sehlabelong sa hae sa thekollo. (1 Johanne 2:1) O ba kopela hore Molimo a utloe lithapelo tsa bona le hore a ba tšoarele libe ka sehlabelo sa hae sa thekollo. (Matheu 1:​21; Baroma 8:​34) Molimo o araba likopo tsena tsa Jesu hobane li etsoa tumellanong le thato ea hae. Molimo o rometse Jesu lefatšeng “hore lefatše le pholosoe ka eena.”​—Johanne 3:17.

Na ho lumela ho Jesu ke eona feela ntho e tla re pholosa?

 Che. Le hoja re lokela ho lumela ho Jesu e le hore re pholohe, ho na le lintho tse ngata tseo re lokelang ho li etsa. (Liketso 16:​30, 31) Bibele e re: “Joalokaha ’mele o se nang moea o shoele, kahoo le tumelo e se nang mesebetsi e shoele.” (Jakobo 2:​26) Hore re pholohe, re lokela:

•   Ho ithuta ka Jesu le Ntate oa hae Jehova.​—Johanne 17:3.

•   Ho ba le tumelo ho bona.​—Johanne 12:​44; 14:1.

•   Ho bontša tumelo ka ho mamela litaelo tsa bona. (Luka 6:​46; 1 Johanne 2:​17) Jesu o ile a re ha se motho e mong le e mong ea mo bitsang “Morena” ea tla pholoha empa ke ea “etsang thato ea Ntate [oa hae] ea maholimong.”​—Matheu 7:21.

•   Ho bontša tumelo le ha ho le thata. Jesu o ile a hlakisa sena ha a ne a re: “Ea mameletseng ho isa bofelong ke eena ea tla pholoha.”​—Matheu 24:13.