Lamun barudak geus déwasa, maranéhna boga tanggung jawab pikeun ngurus indung bapana nu geus kolot. Alkitab nyebutkeun yén mun barudak geus déwasa kudu ”sina rumawat, minangka pamales budi ka indung bapa atawa nini akina. Eta teh, sapuk pisan jeung pangersa Allah.” (1 Timoteus 5:4, Sunda Formal) Jadi lamun barudak ngarawat kolotna, maranéhna téh keur ngajalankeun paréntah dina Alkitab pikeun ngahormat kolot.​—Epesus 6:2, 3.

  Alkitab teu nyebutkeun pituduh nu rinci ngeunaan ngurus kolot. Tapi, Alkitab nyatet sababaraha conto lalaki jeung awéwé nu soléh nu ngurus kolotna. Alkitab gé nyatet naséhat alus pikeun jalma-jalma nu ngurus kolotna.

•  Kumaha tokoh-tokoh dina Alkitab ngarawat indung bapana nu geus kolot?

•  Kumaha naséhat Alkitab bisa ngabantu jalma nu keur ngurus kolotna?

•  Naha Alkitab nyebutkeun yén indung bapa nu geus kolot dirawatna kudu di imah?

 Carana béda-béda, gumantung kana kaayaanana.

•   Yusup. Manéhna tinggal jauh ti Yakub, bapana nu geus kolot. Tapi pas Yusup geus mampuh, manéhna ngatur sangkan bapana pindah ka tempat nu leuwih deukeut jeung manéhna. Tuluy, Yusup nyadiakeun imah, dahareun, jeung ngalindungan bapana.​—Kajadian 45:9-11; 47:11, 12.

•   Rut. Manéhna pindah ka nagri asal mitohana, tuluy digawé getol pisan pikeun ngurus mitohana.​—Rut 1:16; 2:2, 17, 18, 23.

•   Yésus. Pas téréh maot, anjeunna ngatur supaya engké aya nu ngurus Maria, indungna. Katingalina, harita Maria téh geus jadi randa.​—Yohanes 19:26, 27. a

 Sakapeung, urang bisa capé atawa keuheul lantaran ngurus kolot. Aya prinsip-prinsip dina Alkitab nu bisa ngabantu jalma nu keur ngurus kolotna.

•   Sing hormat ka kolot.

   Pituduh Kitab Suci: ”Masing hormat ka bapa jeung ka indung.”​—Budalan 20:12.

   Cara ngalarapkeunana: Sadérék bisa ngahormat ka kolot ku cara méré maranéhna kabébasan pikeun ngatur hirupna sorangan, gumantung kana kaayaan maranéhna. Idinan kolot sina milih kumaha cara maranéhna hayang diurus. Sanajan kitu, Sadérék ogé kudu ngahormat kolot ku cara sabisa-bisana ngabantu maranéhna.

•   Sing maklum jeung daék ngahampura.

   Pituduh Kitab Suci: ”Jalma anu asak sasar mah sok bisa mengkek amarah. Lamun urang digogoreng tapi ku urang teu ditolih, estu mulya kacida.”​—Siloka 19:11.

   Cara ngalarapkeunana: Lamun kolot ngomong nu pikanyerieun haté atawa asa teu ngahargaan upaya Sadérék, coba pikirkeun, ’Kumaha mun urang aya di posisi maranéhna, sok keuheul lantaran geus hésé ngalakukeun naon-naon?’ Lamun Sadérék ngamaklum jeung daék ngahampura, Sadérék moal nyieun kaayaan jadi beuki parah.

•   Ménta saran ka batur.

   Pituduh Kitab Suci: ”Kudu getol tatanya heula, tangtu hasil nya maksud. Mun teu kitu bororaah.”​—Siloka 15:22.

   Cara ngalarapkeunana: Mun kolot Sadérék boga panyakit, téangan kumaha cara ngarawatna. Téangan ogé ngeunaan pangobatan nu aya di daérah Sadérék. Obrolkeun jeung jalma-jalma nu geus boga pangalaman dina ngurus kolotna. Mun aya adi lanceuk, bahas naon pangabutuh kolot, kumaha cara ngurusna, jeung bagi-bagi tugas ngurusna.

•   Sing asup akal.

   Pituduh Kitab Suci: ”Kabijaksanaan aya dina jelema nu sadar diri.”​—Siloka 11:2, Terjemahan Dunia Baru (NW).

   Cara ngalarapkeunana: Sadérék kudu apal kana kawates sorangan. Kabéh jalma boga kawates, misalna dina waktu jeung tanaga. Ku kituna, Sadérék kudu asup akal dina ngurus kolot. Mun karasa capé teuing, Sadérék bisa ménta bantuan ka dulur-dulur atawa pangrawat husus keur kolot.

•   Jaga kaséhatan diri sorangan.

   Pituduh Kitab Suci: ”Da moal aya jelema anu teu nyaah kana awakna sorangan, awakna teh dimemenan, diurus dipulasara.”​—Epesus 5:29.

   Cara ngalarapkeunana: Sanajan boga tanggung jawab pikeun ngurus kolot, Sadérék ogé kudu mikirkeun pangabutuh sorangan. Lamun Sadérék geus nikah, pikirkeun ogé pangabutuh kulawarga Sadérék. Jaga kadaharan sing séhat. Sadérék gé kudu cukup istirahat jeung saré. (Pandita 4:6, NW) Mun aya kasempetan, Sadérék ogé bisa reureuh pikeun ngalakukeun kagiatan séjén. Hasilna, émosi, méntal, jeung awak Sadérék bakal tetep séhat, Sadérék gé jadi bisa leuwih alus dina ngurus indung bapa Sadérék.

 Dina Alkitab teu aya pituduh nu rinci ngeunaan kudu ngarawat indung bapa di imah. Aya sababaraha kulawarga milih sabisa-bisana ngarawat kolotna di imah. Tapi mun kaayaanana barobah, bisa jadi maranéhna ngarasa yén panti jompo téh leuwih alus keur kolotna. Kulawarga kudu ngumpul jeung mutuskeun naon nu pangalusna keur kabéh anggota kulawarga.​—Galata 6:4, 5.