Tangtu. Kisah di Alkitab atawa pangalaman hirup némbongkeun yén Allah téh ngajawab doa jalma-jalma. Alkitab nyebutkeun, ”Mantenna nyumponan kabutuh jalma anu ngahormat, kersa ngadangu sarta nyalametkeun sakur nu jumerit ka Mantenna.” (Jabur 145:19) Tapi, dijawab henteuna doa Sadérék, gumantung kana Sadérékna ogé.

Nu jadi sual keur Allah

•   Kudu ngadoa ka Allah, lain ka Yésus, Mariam, santo-santo, malaikat, gambar atawa patung. Ngan Allah Yéhuwa nu ”ngamakbul kana paneda”.—Jabur 65:3.

•   Doa urang kudu luyu jeung kahoyong atawa pangersa Allah nu dicatet dina Alkitab.—1 Yohanes 5:14.

•   Doa urang kudu ditepikeun liwat nami Yésus, ku kituna urang ngahargaan anjeunna. Ceuk Yésus, ”Lamun henteu ku jalan Kami, moal aya anu bisa datang ka Rama.”—Yohanes 14:6.

•   Waktu ngadoa, urang kudu boga iman. Lamun perlu, urang gé bisa ménta supaya iman urang dikuatkeun.—Mateus 21:22; Lukas 17:5.

•   Waktu ngadoa, urang kudu rendah haté sarta enya-enya. Alkitab ngajelaskeun, ”Gusti teh maha luhur, kacida luhurna, nanging kersa nitenan jalmi nu laip.”—Jabur 138:6.

•   Urang kudu terus ménta. Yésus ngomong, ’Kudu terus menta, tangtu bakal dibere.’—Lukas 11:9.

Nu teu jadi sual keur Allah

•   Ras atawa suku bangsa Sadérék. ”Di [payuneun] Allah mah jalmi teh sami. Bangsa naon oge upami ngabakti ka Mantenna sareng hade kalakuanana mah tangtos ku Mantenna diangken.”—Rasul 10:34, 35.

•   Posisi awak. Sadérék bisa ngadoa ka Allah bari diuk, dongko, sujud, atawa nangtung.—1 Babad 17:16; Nehemia 8:6; Daniel 6:10; Markus 11:25, NW.

•   Ku sora tarik atawa dina jero haté. Allah bakal ngajawab doa urang nu di jero haté, sanajan batur teu ngadéngé.—Nehemia 2:1-6.

•   Masalah Sadérék leutik atawa gedé. Allah nguatkeun urang pikeun ’ngunjukkeun sagala kasusah ka Mantenna, sabab Mantenna anu ngurus aranjeun.’—1 Petrus 5:7.