2 Samuél 2:1-32
2 Geus kitu, Daud nanya ka Yéhuwa, ”Abdi kedah angkat ka salah sahiji kota di Yéhuda atawa ulah?” Ceuk Yéhuwa, ”Jung indit.” Daud nanya deui, ”Ka mana?” Ceuk Anjeunna, ”Ka Hébron.”
2 Jadi, Daud indit ka ditu bareng jeung dua pamajikanana, nyaéta Ahinoam urang Yizréél jeung Abigail randana Nabal urang Karmél.
3 Daud gé mawa anak buahna bareng jeung kulawargana masing-masing. Maranéhna matuh di kota-kota di sabudeureun Hébron.
4 Geus kitu, urang Yéhuda daratang. Maranéhna ngalantik Daud jadi rajana urang Yéhuda.
Maranéhna ngomong ka Daud, ”Nu nguburkeun Saul téh urang Yabés-giléad.”
5 Jadi Daud ngirim utusan ka urang Yabés-giléad pikeun nepikeun pesen ieu, ”Mugia aranjeun diberkahan ku Yéhuwa, lantaran aranjeun geus nyaah* ka Saul juragan aranjeun ku cara nguburkeun anjeunna.
6 Mugia Yéhuwa nyaah* jeung satia ka aranjeun. Kuring gé rék bageur ka aranjeun lantaran aranjeun geus bageur.
7 Ayeuna mah aranjeun sing kuat jeung wani. Saul juragan aranjeun geus maot, sarta urang Yéhuda geus ngalantik kuring jadi raja maranéhna.”
8 Tapi Abnér anak Nér, panglima tentarana Saul, mawa Is-bosyét anakna Saul meuntas ka Mahanaim.
9 Ku Abnér manéhna dijadikeun raja nu ngawasaan Giléad, urang Asyur, Yizréél, Éfraim, Bényamin, jeung sakabéh Israél.
10 Basa jadi raja Israél, Is-bosyét anak Saul téh umurna 40 taun. Manéhna ngawasa salila dua taun. Tapi urang Yéhuda mah ngadukung Daud.
11 Di Hébron, Daud jadi raja urang Yéhuda salila tujuh satengah taun.
12 Hiji waktu, Abnér anak Nér jeung para prajuritna Is-bosyét anak Saul indit ti Mahanaim ka Gibéon.
13 Yoab anak Zéruya jeung para prajuritna Daud gé indit tuluy panggih jeung maranéhna di kolam Gibéon. Kelompok nu hiji diuk di sisi kolam beulah dieu, ari kelompok nu hijina deui di sisi beulah dituna.
14 Ahirna Abnér ngomong ka Yoab, ”Sok tarungkeun* barudak ngora ti dieu jeung barudak ngora ti dinya di hareupeun urang kabéh.” Jawab Yoab, ”Hayu.”
15 Jadi, maranéhna milih 12 urang Bényamin ti pasukanna Is-bosyét anak Saul sarta 12 urang ti pasukanna Daud.
16 Der maranéhna maju tuluy tarung. Masing-masing narik sirah lawanna tuluy silih tubles ku pedang, nepi ka kabéhanana paéh babarengan. Ku kituna, tempat nu aya di Gibéon éta disebut Hélkat-hazurim.
17 Poé éta maranéhna tarung bébéakan. Ahirna, Abnér jeung pasukan Israél diéléhkeun ku pasukanna Daud.
18 Tilu anak lalakina Zéruya aya di dinya, nyaéta Yoab, Abisyai, jeung Asahél. Ari Asahél bisa lumpat tarik kawas kijang di tegalan.
19 Asahél terus ngudag Abnér teu eureun-eureun.
20 Abnér ngalieuk tuluy nanya, ”Manéh téh Asahél?” Jawab Asahél, ”Enya.”
21 Tuluy Abnér ngomong, ”Ulah ngudag urang! Itu udag wéh anak buah urang, pék cokotan barangna.” Tapi Asahél terus wéh ngudag Abnér.
22 Jadi Abnér ngomong deui ka Asahél, ”Tong ngudag urang waé. Hayang dipaéhan ku urang? Engké urang jadi teu ngeunah mun panggih jeung Yoab lanceuk manéh.”
23 Tapi Asahél teu daék eureun, jadi Abnér ngayunkeun tumbakna ka tukang, bles tungtung tumbakna ambles kana beuteung Asahél nepi ka tembus kana tonggongna. Bluk Asahél maot di dinya kénéh. Unggal aya nu ngaliwat ka tempat Asahél maot, maranéhna bakal eureun heula sakeudeung.
24 Geus kitu, Yoab jeung Abisyai ngudag Abnér. Pas panonpoé surup, maranéhna nepi di Pasir* Ama nu nyanghareup ka Gia di jalan nu rék ka Gurun Keusik Gibéon.
25 Urang Bényamin kumpul jeung Abnér. Maranéhna narangtung bareng di puncak hiji pasir.
26 Tuluy Abnér ngagorowok ka Yoab, ”Ieu téh rék terus silih paéhan ku pedang? Teu apal kitu tungtungna ieu kabéh téh ngan kasangsaraan? Iraha pasukan manéh rék dititah eureun? Ulah haben baé ngudag-ngudag. Urang kabéh téh pan dulur kénéh.”
27 Ngadéngé kitu Yoab ngomong, ”Demi Allah nu hirup jeung nu bener, lamun manéh teu ngomong kitu, pasukan urang rék ngudag dulur-dulurna nepi ka isuk.”
28 Geus kitu, Yoab niup tarompét tanduk, tuluy pasukanna teu ngudag Israél deui. Rep perang téh eureun.
29 Abnér jeung pasukanna leumpang liwat Araba sapeupeuting éta, meuntasan Walungan Yordan, leumpang di sapanjang lebak éta,* tuluy ahirna nepi di Mahanaim.
30 Sanggeus teu ngudag Abnér deui, Yoab ngumpulkeun sakabéh pasukanna. Di pihak Daud, nu maot téh Asahél jeung 19 prajurit.
31 Tapi prajuritna Daud geus ngéléhkeun urang Bényamin jeung pasukanna Abnér. Di pihak maranéhna, nu maot téh aya 360 urang.
32 Mayitna Asahél dibawa tuluy dikuburkeun di makam bapana, di Bétléhém. Geus kitu, Yoab jeung pasukanna leumpang sapeupeuting tuluy nepi di Hébron pas bray caang.
Catetan Tambihan
^ Atawa ”nunjukkeun asih nu satia”.
^ Atawa ”nunjukkeun asih nu satia”.
^ Atawa ”tandingkeun”.
^ Atawa ”Bukit”.
^ Atawa bisa jadi ”di sapanjang Bitron”.
