2 Samuél 8:1-18
8 Ka dieunakeun, Daud ngéléhkeun jeung nalukkeun urang Filistin. Manéhna ngarebut Métég-ama ti urang Filistin.
2 Geus kitu, Daud ngéléhkeun urang Moab. Maranéhna dititah ngagolér bari ngajéjér dina taneuh, tuluy panjang jéjéran éta diukur maké tali. Dua pertilu ti maranéhna dipaéhan, ari nu sapertiluna mah teu dipaéhan. Terus urang Moab dijadikeun palayanna Daud jeung diwajibkeun mayar upeti.
3 Daud gé ngéléhkeun raja Zoba, nyaéta Hadadézér anak Réhob, nu harita téh keur di jalan rék ngarebut deui kakawasaanana di Walungan Éfrat.
4 Daud néwak 1.700 prajurit nu numpak kuda jeung 20.000 prajurit nu leumpang. Tuluy, Daud neukteukan urat suku sakabéh kuda nu narik karéta, tapi aya 100 nu disésakeun.
5 Urang Siria ti Damaskus datang rék mantuan Hadadézér raja Zoba. Tapi aya 22.000 urang Siria anu dipaéhan ku Daud.
6 Geus kitu, Daud nempatkeun pasukanna di Siria di Damaskus. Urang Siria dijadikeun palayanna Daud nu wajib mayar upeti. Indit ka mana waé, Daud terus dibéré kaunggulan* ku Yéhuwa.
7 Salian ti éta, Daud nyokot taméng-taméng* emas ti para bawahanana Hadadézér tuluy dibawa ka Yérusalém.
8 Raja Daud gé nyokot loba pisan tambaga ti Bétah jeung Bérotai, dua kota milik Hadadézér.
9 Toi raja Hamat ngadéngé yén Daud geus ngéléhkeun sakabéh pasukanna Hadadézér.
10 Jadi, Toi ngutus Yoram anakna pikeun nanyakeun kabarna Raja Daud sarta ngucapkeun salamet ka manéhna nu geus merangan jeung ngéléhkeun Hadadézér (lantaran Hadadézér téh sering merangan Toi). Yoram mawa barang-barang tina pérak, emas, jeung tambaga.
11 Raja Daud nyucikeun barang-barang éta keur Yéhuwa, sakumaha manéhna geus nyucikeun pérak sarta emas nu dijarah ti bangsa-bangsa nu ditalukkeun ku manéhna,
12 nyaéta ti Siria jeung Moab, ti urang Amon, urang Filistin, urang Amalék, jeung ti raja Zoba, nyaéta Hadadézér anak Réhob.
13 Ngaran Daud gé jadi kasohor sanggeus manéhna maéhan 18.000 urang Édom di Lebak Uyah.
14 Daud nempatkeun pasukanna di sakuliah daérah Édom. Urang Édom dijadikeun palayanna. Indit ka mana waé, Daud terus dibéré kaunggulan* ku Yéhuwa.
15 Daud ngawasaan sakabéh Israél. Manéhna maréntah rahayatna ku cara nu adil jeung bener.
16 Yoab anak Zéruya jadi panglima tentarana, ari Yéhosyafat anak Ahilud jadi tukang nyatet.
17 Zadok anak Ahitub jeung Ahimélék anak Abiatar jadi imam, ari Séraya jadi sékertaris.
18 Bénaya anak Yéhoyada jadi kapala para pangawal pribadina Daud,* ari anak-anak lalakina Daud jadi pajabat luhur.*
Catetan Tambihan
^ Atawa ”kasalametan”.
^ As. ”taméng-taméng buleud tina”.
^ Atawa ”kasalametan”.
^ As. ”urang Khéréti jeung urang Péléti”.
^ As. ”imam-imam”.
