Raja-Raja nu Kadua 14:1-29
14 Dina taun kadua pamaréntahan Yéhoas anak Yéhoahaz raja Israél, Amazia anak Yéhoas raja Yéhuda jadi raja.
2 Basa jadi raja, manéhna téh umur 25 taun. Manéhna maréntah salila 29 taun di Yérusalém. Ngaran indungna téh Yéhoadin, asalna ti Yérusalém.
3 Amazia terus ngalampahkeun nu bener dina pandangan Yéhuwa, tapi teu siga Daud karuhunna. Naon nu dilampahkeun ku manéhna téh sarua siga Yéhoas bapana.
4 Tapi, ari tempat-tempat pamujaan mah teu diancurkeun ku manéhna. Jalma-jalma masih kénéh ngurban di dinya supaya haseupna ngebul.
5 Sanggeus karajaanana beuki kukuh, manéhna maéhan palayan-palayanna nu baheula maéhan Raja, bapana.
6 Tapi manéhna teu maéhan anak-anak para palayan éta, sakumaha aturan ti Yéhuwa nu ditulis dina buku Hukum Musa, nyaéta, ”Bapa teu meunang dipaéhan gara-gara dosa anakna. Anak gé teu meunang dipaéhan gara-gara dosa bapana. Unggal jalma kudu dipaéhan lantaran dosana sorangan.”
7 Amazia maéhan 10.000 urang Édom di Lebak Uyah jeung ngarebut kota Séla dina éta perang. Ngaran éta kota jadi Yoktéél nepi ka ayeuna.
8 Geus kitu, Amazia ngutus hiji jalma ka Yéhoas anak Yéhoahaz incu Yéhu raja Israél, kieu cenah, ”Sok maju, hayu urang perang.”
9 Yéhoas raja Israél ngirim pesen kieu ka Amazia raja Yéhuda, ”Rungkun cucuk di Lébanon ngirim pesen ka tangkal aras di Lébanon, ’Kumaha upami anak awéwé anjeun dikawin ku anak lalaki kuring?’ Tapi sato galak ti Lébanon ngaliwat jeung ngidek-ngidek éta rungkun.
10 Mémang anjeun tos ngéléhkeun Édom, nu matak anjeun jadi gedé hulu. Ari tos digjaya mah tos wéh matuh di istana anjeun. Keur naon nyiar-nyiar pimasalaheun, rék nyéréd Yéhuda ancur bareng jeung anjeun?”
11 Tapi ku Amazia teu didéngé.
Jadi, Yéhoas raja Israél maju merangan Amazia raja Yéhuda di Bét-syémés di daérah Yéhuda.
12 Yéhuda diéléhkeun ku Israél, jadi para prajuritna kalabur ka imahna* masing-masing.
13 Di Bét-syémés, Yéhoas raja Israél néwak Amazia raja Yéhuda anak Yéhoas incu Ahazia. Geus kitu, maranéhna indit ka Yérusalém. Di dinya, Yéhoas ngarugrugkeun témbok Yérusalém, ti Gerbang Éfraim nepi ka Gerbang Juru, nu panjangna kira-kira 180 méter.*
14 Kabéh emas, pérak, jeung paparabotan nu aya di imah Yéhuwa sarta di rohangan tempat nyimpen harta di istana ku manéhna dibawa balik ka Samaria. Manéhna gé mawa sandera sababaraha urang.
15 Riwayat Yéhoas, kaasup nu dilampahkeunana jeung kahébatanana sarta kumaha manéhna merangan Amazia raja Yéhuda, ditulis dina buku sajarah ngeunaan raja-raja Israél.
16 Ahirna, Yéhoas maot siga karuhunna tuluy dikuburkeun di Samaria, ngahiji jeung raja-raja Israél séjénna. Yéroboam* anakna ngaganti manéhna jadi raja.
17 Sanggeus Yéhoas anak Yéhoahaz raja Israél maot, Amazia anak Yéhoas raja Yéhuda hirup 15 taun deui.
18 Riwayat Amazia ditulis dina buku sajarah ngeunaan raja-raja Yéhuda.
19 Ka dieunakeun, aya nu sakongkol ngalawan Amazia di Yérusalém, jadi manéhna kabur ka Lakhis. Tapi, maranéhna ngutus sababaraha jalma pikeun ngudag Amazia ka Lakhis tuluy maéhan manéhna di dinya.
20 Mayitna dibawa balik maké karéta kuda tuluy dikuburkeun di Yérusalém, ngahiji jeung karuhunna di Kota Daud.
21 Geus kitu, kabéh rahayat Yéhuda ngalantik Azaria* jadi raja ngaganti Amazia bapana. Harita téh Azaria umurna 16 taun.
22 Sanggeus Raja* maot siga karuhunna, Azaria ngarebut Élat pikeun dijadikeun milik Yéhuda deui, tuluy éta kota dibangun deui.
23 Dina taun ka-15 pamaréntahan Amazia anak Yéhoas raja Yéhuda, Yéroboam anak Yéhoas raja Israél jadi raja di Samaria. Manéhna maréntah salila 41 taun.
24 Yéroboam terus ngalampahkeun nu jahat dina pandangan Yéhuwa. Manéhna gé terus nuturkeun sakabéh dosa Yéroboam anak Nébat, nu nyababkeun Israél ngalampahkeun dosa.
25 Ku manéhna wates Israél dibalikkeun deui ka asalna, ti Lébo-hamat* nepi ka Laut Araba.* Ieu téh sajalan jeung ucapan Yéhuwa Allah Israél nu ditepikeun ku hamba-Na, nyaéta Yunus anak Amitai, nabi ti Gat-héfér.
26 Éta téh lantaran Yéhuwa ningali sakumaha sangsarana Israél. Teu aya nu bisa nulungan Israél, malah nu lemah jeung nu miskin gé teu aya.
27 Tapi, Yéhuwa geus jangji moal mupus ngaran Israél ti bumi. Jadi, Anjeunna nyalametkeun maranéhna ku jalan Yéroboam anak Yéhoas.
28 Riwayat Yéroboam, kaasup sagala nu dilampahkeunana, kahébatanana, perangna, jeung kumaha Damaskus sarta Hamat dijadikeun wilayah kakawasaan Yéhuda deui di Israél, ditulis dina buku sajarah ngeunaan raja-raja Israél.
29 Ahirna Yéroboam maot tuluy dikuburkeun, ngahiji jeung karuhunna, nyaéta raja-raja Israél. Geus kitu, Zakharia anakna ngaganti manéhna jadi raja.
Catetan Tambihan
^ As. ”kémahna”.
^ As. ”400 hasta”. Tingali Lamp. B14.
^ Maksudna, Yéroboam II.
^ Hartina ”Yéhuwa Tos Nulungan”. Manéhna disebut Uzzia dina 2Raj 15:13; 2Bab 26:1-23; Yés 6:1; jeung Za 14:5.
^ Nyaéta Amazia bapana.
^ Atawa ”jalan asup ka Hamat”.
^ Nyaéta Laut Uyah, atawa Laut Paéh.
