Raja-Raja nu Kadua 8:1-29
8 Élisa ngomong kieu ka wanita nu budak lalakina dihirupkeun deui, ”Nyai, jung geura angkat sareng kulawarga Nyai, ngumbara heula ka hiji tempat. Ka manana mah kumaha Nyai, da Yéhuwa tos masihan terang bakal aya kalaparan di ieu nagri salami tujuh taun.”
2 Éta wanita nurut kana omongan hamba Allah nu bener. Manéhna indit bareng jeung kulawargana sarta ngumbara di nagri urang Filistin salila tujuh taun.
3 Sanggeus tujuh taun, manéhna balik ti nagri urang Filistin tuluy nyuhunkeun ka Raja supaya imah jeung lahanna dipulangkeun deui.
4 Harita téh Raja keur ngobrol jeung Géhazi, palayan hamba Allah nu bener téa. Raja ngomong kieu, ”Cikan, caritakeun sagala hal hébat nu dilampahkeun ku Élisa.”
5 Waktu Géhazi keur nyaritakeun yén Élisa pernah ngahirupkeun deui nu geus maot, torojol wanita nu budak lalakina dihirupkeun deui téh datang ka Raja rék ménta imah jeung lahanna. Ceuk Géhazi, ”Gusti Raja, tah ieu ibu nu dicaritakeun téh, sareng ieu putrana nu dihirupkeun deui ku Élisa.”
6 Jadi, éta wanita ku Raja dititah nyaritakeun kajadianana. Sanggeus éta wanita bérés nyarita, Raja nitah hiji pajabat istana pikeun ngurus masalah éta wanita. Ceuk Raja, ”Sok pulangkeun sakabéh pangabogana. Bayar ogé hasil lahan salila ditinggalkeun ku si Ibu.”
7 Hiji mangsa, Élisa datang ka Damaskus. Harita téh Bén-hadad raja Siria keur gering. Terus aya nu ngalapor ka Raja, ”Hamba Allah nu bener téh nuju aya di dieu.”
8 Seug Raja ngomong kieu ka Hazaél, ”Jung panggihan hamba Allah nu bener bari mawa hadiah. Sok ménta tulung ka manéhna sina pangnanyakeun ka Yéhuwa, kuring bakal cageur moal.”
9 Jadi, Hazaél indit bari mawa hadiah. Hadiahna téh nyaéta barang-barang nu aralus ti Damaskus. Éta kabéh dimuatkeun kana 40 onta. Sanggeus nepi, bruk Hazaél sujud hareupeun Élisa. Manéhna ngomong kieu, ”Abdi téh diutus ku hamba Bapa, Bén-hadad raja Siria, dipiwarang naroskeun, anjeunna téh bakal damang atawa moal.”
10 Élisa némbalan, ”Jung béjakeun kieu, ’Juragan pasti damang deui,’ tapi Bapa gé tos dipasihan terang ku Yéhuwa, Raja téh pasti maot.”
11 Geus kitu, Élisa terus melong ka Hazaél nepi ka Hazaél ngarasa risi. Tuluy hamba Allah nu bener téh ceurik.
12 Ditanya ku Hazaél, ”Ari Bapa ku naon bet nangis?” Élisa ngajawab, ”Bapa nyaho manéh téh bakal nyangsarakeun urang Israél. Kota-kota bénténgna ku manéh bakal diduruk, prajurit-prajurit nu panghadéna ku manéh bakal dipaéhan maké pedang, barudakna ku manéh bakal digebugan nepi ka paéh, awéwé-awéwé nu keur kakandungan gé ku manéh bakal dibedélan beuteungna.”
13 Hazaél ngomong, ”Duh Bapa, moal mungkin atuh abdi siga kitu. Abdi mah naon atuh, ngan saukur anjing.” Tapi ceuk Élisa, ”Yéhuwa tos masihan terang, manéh bakal jadi raja Siria.”
14 Geus kitu, Hazaél ninggalkeun Élisa, balik ka dununganana. Ditanya ku dununganana, ”Kumaha cenah ceuk Élisa?” Dijawab, ”Saurna, Juragan tangtu damang deui.”
15 Tapi isukna, Hazaél nyokot simbut, dicelupkeun kana cai, tuluy dirungkupkeun kana beungeut Raja nepi ka Raja maot. Geus kitu, Hazaél ngaganti manéhna jadi raja.
16 Dina taun kalima pamaréntahan Yéhoram anak Ahab raja Israél, Yéhoram anak Yéhosyafat téh jadi raja di Yéhuda. Harita, Yéhosyafat masih kénéh ngarajaan Yéhuda.
17 Basa jadi raja, Yéhoram téh umurna 32 taun. Manéhna maréntah salila 8 taun di Yérusalém.
18 Manéhna nuturkeun kalakuan raja-raja Israél, sakumaha nu dilampahkeun ku kulawargana Ahab, da pamajikanana téh anak Ahab. Manéhna terus ngalampahkeun nu jahat dina pandangan Yéhuwa.
19 Tapi, Yéhuwa teu kersaeun nyingkirkeun karajaan Yéhuda. Éta téh demi Daud hamba-Na, sabab Anjeunna geus jangji bakal terus aya turunan Daud nu maréntah jadi raja* nepi ka saterusna.
20 Dina jaman pamaréntahan Yéhoram, urang Édom barontak ka karajaan Yéhuda, tuluy misahkeun diri jeung ngangkat rajana sorangan.
21 Ku sabab kitu, Yéhoram mawa sakabéh pasukan karétana meuntas ka Zair. Ti peuting, manéhna maju ngéléhkeun urang Édom nu geus ngepung manéhna jeung para panglima pasukan karéta, ari para prajurit mah kalabur ka imahna masing-masing.
22 Tapi nepi ka ayeuna, Édom terus barontak ka Yéhuda. Harita, Libna gé barontak ka Yéhuda.
23 Riwayat Yéhoram, kaasup sagala nu dilampahkeunana, ditulis dina buku sajarah ngeunaan raja-raja Yéhuda.
24 Ahirna, Yéhoram maot siga karuhunna tuluy dikuburkeun, ngahiji jeung karuhunna di Kota Daud. Ahazia anakna ngaganti manéhna jadi raja.
25 Dina taun ka-12 pamaréntahan Yéhoram anak Ahab raja Israél, Ahazia anak Yéhoram raja Yéhuda jadi raja.
26 Basa jadi raja, Ahazia téh umurna 22 taun. Manéhna maréntah salila sataun di Yérusalém. Ngaran indungna téh Atalia incu Omri raja Israél.
27 Ahazia jeung kulawarga Ahab téh katalian ku perkawinan, jadi manéhna nuturkeun kalakuan kulawarga Ahab. Manéhna terus ngalampahkeun nu jahat dina pandangan Yéhuwa, sakumaha nu dilampahkeun ku kulawarga Ahab.
28 Manéhna ngabalad jeung Yéhoram anak Ahab pikeun merangan Hazaél raja Siria di Ramot-giléad, tapi Yéhoram dipanah ku urang Siria.
29 Jadi, Raja Yéhoram balik ka Yizréél pikeun nyageurkeun raheut-raheutna, lantaran manéhna dipanah ku urang Siria di Rama basa merangan Hazaél raja Siria. Ahazia anak Yéhoram raja Yéhuda indit ka Yizréél rék ngalongok Yéhoram anak Ahab nu keuna ku panah.*
