Filémon 1:1-25
1 Ti Paulus nu keur dipanjarakeun ku karana Isa Al-Masih,* jeung ti Timotius sadérék urang saréréa, keur Filémon batur gawé nu dipikanyaah ku urang saréréa,
2 keur Apfia sadérék istri urang, keur Arkhipus batur saperjuangan, sarta keur sidang jamaah di imah anjeun:
3 Mugia aranjeun narima welas asih nu taya bandingna* jeung katengtreman ti Allah, Bapa urang, jeung ti Juragan Isa Al-Masih.
4 Kuring tangtu muji sukur ka Allah unggal nyebutkeun anjeun dina doa-doa kuring,
5 lantaran kuring sering ngadéngé anjeun téh boga iman sarta nyaah ka Juragan Isa jeung ka sakabéh jalma suci.
6 Kuring ngadoa supaya iman anjeun nu sarua jeung iman dulur-dulur séjénna ngageuing anjeun pikeun sadar sakumaha lobana berkah nu ditarima ku urang liwat Al-Masih.
7 Lur, kuring téh bungah pisan jeung reugreug waktu ngadéngé anjeun geus némbongkeun kanyaah ku cara ngagedékeun haté jalma-jalma suci.
8 Ku kituna, sanajan salaku rasul Al-Masih, kuring wani ménta ka anjeun supaya ngalakukeun nu sakuduna,
9 kuring leuwih resep ngageuing kanyaah anjeun, da kuring téh, Paulus, geus kolot, jaba ayeuna keur dipanjarakeun ku karana Isa Al-Masih.
10 Kuring rék ménta tulung ka anjeun ngeunaan anak kuring, nyaéta Onésimus. Kuring téh geus jadi siga bapana salila kuring dipanjara.*
11 Tadina mah manéhna euweuh gunana keur anjeun, tapi ayeuna manéhna loba gunana boh keur anjeun boh keur kuring.
12 Kuring téh nyaah pisan ka manéhna. Ayeuna, kuring nitah manéhna balik ka anjeun.
13 Kahayang kuring mah manéhna cicing di dieu ngalalayanan kuring ngagantikeun anjeun salila kuring dipanjara ku karana warta hadé.
14 Tapi, kuring teu wani kukumaha lamun teu disatujuan ku anjeun, supaya anjeun ngalakukeun kahadéan téh lain ku kapaksa, tapi ku lantaran iklas.
15 Sigana mah manéhna misah ti anjeun sakeudeung* téh supaya manéhna bisa balik deui ka anjeun salilana.
16 Ngan ayeuna mah manéhna lain saukur palayan, tapi ogé dulur saiman. Kuring nyaah pisan ka manéhna. Anjeun gé bakal leuwih nyaah ka manéhna, lantaran manéhna téh palayan anjeun ongkoh murid Juragan ongkoh.
17 Jadi, lamun anjeun nganggap kuring sobat, sok tarima manéhna siga anjeun narima kuring.
18 Salian ti éta, bisi manéhna boga salah atawa boga hutang naon waé ka anjeun, keun wéh kuring nu nanggung.
19 Kuring, Paulus, nulis sorangan yén kuring nu bakal mayarna. Geus teu kudu diomongkeun deui, anjeun gé boga hutang kahirupan ka kuring.
20 Dulur, mugi anjeun daék nulungan kuring salaku sasama murid Juragan. Gedékeun haté kuring salaku sasama murid Al-Masih.
21 Kuring yakin anjeun bakal nyumponan paménta kuring, matakna kuring nyuratan anjeun. Kuring apal anjeun bakal ngalakukeun leuwih ti nu dipénta.
22 Salian ti éta, pangnyiapkeun ogé kamar keur kuring mondok, sabab kuring miharep bakal datang deui ka anjeun,* sakumaha doa-doa anjeun.
23 Aya salam keur anjeun ti Épafras nu dipanjarakeun bareng jeung kuring lantaran ngahiji jeung Isa Al-Masih.
24 Kitu ogé ti Markus, Aristarkhus, Démas, jeung Lukas, batur-batur gawé kuring.
25 Mugia welas asih nu taya bandingna* ti Juragan Isa Al-Masih nyarengan aranjeun nu sarumanget.
Catetan Tambihan
^ As. ”Al-Masih Isa”.
^ Tingali Daptar Istilah.
^ As. ”diranté”.
^ As. ”sajam”.
^ Atawa ”dibébaskeun demi anjeun”.
^ Tingali Daptar Istilah.
