Ayub 32:1-22
32 Tilu babaturan Ayub teu némbalan deui, lantaran Ayub yakin manéhna téh bener.
2 Tapi Élihu anak Barakhél, urang Buz ti kulawarga Ram, ambek pisan. Manéhna ambek lantaran Ayub hayang ngabuktikeun nu bener téh dirina, lain Allah.
3 Manéhna gé ambek pisan ka tilu babaturan Ayub, lantaran maranéhna teu bisa ngajawab Ayub. Maranéhna kalah ka nyebut Allah téh jahat.
4 Élihu rék ngajawab Ayub, tapi manéhna ngadagoan nepi ka nu leuwih kolot bérés ngomong.
5 Barang nu tiluan téa teu bisa ngajawab deui, amarah Élihu ngagedur.
6 Jadi Élihu anak Barakhél, urang Buz, ngomong kieu,
”Abdi téh ngora kénéh,Ari aranjeun tos sarepuh.
Jadi abdi nahan diri da ngahargaan aranjeun.Abdi teu wani nyaritakeun kanyaho abdi.
7 Ceuk pamikir abdi téh, ’Keun wéh nu karolot nu ngomong,Keun wéh nu geus umuran nu nyaritakeun kabijaksanaan.’
8 Tapi kawasa suci, nyaéta napas ti Nu Mahakawasa,Nu méré pangarti ka manusa.
9 Nu geus kolot can tangtu bijaksana.Nu bisa ngarti ka nu bener téh lain nu geus umuran hungkul.
10 Jadi ayeuna abdi ngomong, ’Cik dangukeun abdi.Abdi gé bakal nyaritakeun naon kanyaho abdi.’
11 Abdi ngadagoan nepi ka aranjeun bérés ngomong.Abdi terus ngadéngékeun pamikiran aranjeun.Waktu aranjeun keur mikir rék ngomong naon, ku abdi didagoan.
12 Abdi ngabandungan aranjeun,Tapi teu aya saurang-urang acan nu bisa ngabuktikeun Ayub téh salah*Atawa ngabantah omonganana.
13 Jadi ulah ngaromong kieu, ’Urang téh bijaksana.Nu ngabuktikeun manéhna salah téh Allah, lain manusa.’
14 Ayub pan lain ngomong ka abdi,Jadi abdi moal ngajawab Ayub ku pamikiran siga aranjeun.
15 Aranjeunna* téh baringungeun, teu bisa ngajawab nanaon deui,Geus teu nyarahoeun rék ngomong naon deui.
16 Abdi geus ngadagoan, tapi aranjeunna teu ngomong deui.Aranjeunna téh ngajaranteng wéh di dinya, teu ngomong nanaon.
17 Jadi abdi nu bakal ngajawab.Abdi bakal nyaritakeun naon kanyaho abdi.
18 Loba nu rék diomongkeun.Aya kawasa nu ngajurung abdi pikeun ngomong.
19 Abdi téh kawas cianggur dina kantong kulit nu ditutup pageuh,Kawas kantong kulit anyar nu téréh bucat.
20 Abdi kudu ngomong ambéh plong.
Abdi rék ngomong jeung ngajawab.
21 Abdi moal mihak ka sasaha.Abdi moal muji-muji* manusa.
22 Sabab abdi teu nyaho carana muji-muji.Lamun nyaho gé, Nu Ngadamel abdi bakal gancang nyingkirkeun abdi.
Catetan Tambihan
^ Atawa ”bisa negor Ayub”.
^ Katingalina di dieu Élihu keur ngomong ka Ayub.
^ Atawa ”méré gelar kahormatan ka”.
