Bilangan 20:1-29
20 Dina bulan kahiji, sakumna jamaah Israél nepi ka Tanah Gurun Zin tuluy matuh di Kadés. Di dinya, Miryam maot sarta dikuburkeun.
2 Hiji waktu, euweuh cai keur éta jamaah. Ku sabab kitu, jalma-jalma karumpul ngalawan ka Musa jeung Harun.
3 Jalma-jalma paséa jeung Musa. Ceuk maranéhna, ”Mending gé baréto téh paéh sakalian bareng jeung dulur-dulur hareupeun Yéhuwa!
4 Ku naon jamaah Yéhuwa ku aranjeun bet dibawa ka tanah gurun ieu? Ngarah urang kabéh jeung ingon-ingon paraéh di dieu?
5 Naha atuh maké dibudalkeun ti Mesir, dibawa ka tempat nu sakieu balangsakna? Di dieu mah teu bisa melak nanaon. Boro-boro melak ara, anggur, atawa dalima, cai gé euweuh.”
6 Ti dinya, Musa jeung Harun ninggalkeun éta jamaah tuluy indit ka lawang asup kémah tepangan. Bruk maranéhna sujud, bray cahaya Yéhuwa katingali ku maranéhna.
7 Tuluy Yéhuwa ngomong ka Musa,
8 ”Sok cokot iteuk manéh, geus kitu manéh jeung Harun lanceuk manéh kudu ngumpulkeun jamaah. Di hareupeun maranéhna, titah gawir cadas ngabijilkeun cai. Engké éta cadas bakal ngabijilkeun cai. Ku kituna, manéh bisa méré nginum éta jamaah jeung ingon-ingonna.”
9 Jadi Musa nyokot iteuk ti hareupeun Yéhuwa, sakumaha nu diparéntahkeun.
10 Geus kitu, éta jamaah dikumpulkeun ku Musa jeung Harun hareupeun gawir cadas. Pok Musa ngomong, ”Daréngékeun, éh jalma-jalma barontak! Urang duaan téh kudu ngabijilkeun cai tina ieu cadas keur maranéh?”
11 Ti dinya Musa ngangkat iteukna, terus dipaké neunggeul éta cadas dua kali. Cor cai bijil ngagolontor. Éta jamaah ngarinum, kitu deui ingon-ingonna.
12 Teu lila ti dinya, Yéhuwa ngomong ka Musa jeung Harun, ”Ku sabab maranéh teu boga iman ka Kuring sarta teu ngamulyakeun Kuring hareupeun urang Israél, maranéh moal nungtun éta jamaah ka tanah nu rék dibikeun ku Kuring ka maranéhna.”
13 Kajadianana téh di Cinyusu Mériba,* tempat urang Israél kukulutus ka Yéhuwa. Di dinya, Anjeunna némbongkeun yén Anjeunna téh suci.
14 Tuluy di Kadés, Musa ngirim sababaraha utusan ka raja Édom sina nepikeun pesen kieu, ”Aya pihatur ti Israél dulur Raja, saurna, ’Raja terang pisan kana sagala kasusah abdi sadaya.
15 Kapungkur, karuhun abdi sadaya angkat ka Mesir teras matuh di dinya lami pisan. Di dinya karuhun abdi sadaya, kitu deui abdi sadaya, dikaniaya ku urang Mesir.
16 Tos kitu, abdi sadaya sasambat ka Yéhuwa, seug didangukeun ku Anjeunna. Teras, Anjeunna ngutus hiji malaikat sarta ngabudalkeun abdi sadaya ti Mesir. Ayeuna abdi sadaya aya di Kadés, kota nu aya di wates wilayah Raja.
17 Mugia Raja ngidinan abdi sadaya ngalangkung ka wilayah Raja. Abdi sadaya moal ngalangkung ka lahan atawa kebon anggur. Abdi sadaya gé moal nginum tina sumur nu aya di wilayah Raja. Abdi sadaya mung badé mapah di Jalan Raja,* moal nyimpang ka kénca atawa ka katuhu, dugi ka kaluar ti wilayah Raja.’”
18 Tapi dijawab ku raja Édom, ”Maranéh teu meunang ngaliwat ka wilayah urang. Lamun wani-wani, maranéh rék diserang ku pedang.”
19 Ari ceuk urang Israél téh, ”Abdi sadaya badé ngaliwat di jalan gedé baé. Upami abdi sadaya atawa ingon-ingon abdi sadaya nginum cai nu aya di wilayah Raja, éta badé dibayar. Abdi sadaya mah mung badé ngalangkung hungkul.”
20 Tapi angger raja Édom ngajawab, ”Teu meunang.” Tuluy raja Édom datang mawa pasukan nu loba jeung kuat rék nyerang urang Israél.
21 Raja Édom teu ngidinan urang Israél ngaliwat ka wilayahna. Jadi, urang Israél ngaliwatan jalan séjén.
22 Bangsa Israél, nyaéta sakumna jamaah, indit ti Kadés tuluy nepi ka Gunung Hor.
23 Di Gunung Hor, di wates wilayah Édom, Yéhuwa ngomong kieu ka Musa jeung Harun,
24 ”Harun bakal maot tuluy dikuburkeun cara karuhunna. Manéhna moal asup ka tanah nu rék dibikeun ku Kuring ka urang Israél, lantaran maranéh duaan teu nurut kana pituduh Kuring di Cinyusu Mériba.
25 Harun jeung Éléazar anakna ajak naék ka Gunung Hor.
26 Laanan baju imam nu dipaké ku Harun tuluy pakékeun ka Éléazar anakna. Harun bakal maot di dinya.”
27 Musa ngalampahkeun éta, percis sakumaha nu diparéntahkeun ku Yéhuwa. Maranéhna naék ka Gunung Hor, disaksian ku sakumna jamaah.
28 Tuluy Musa ngalaanan baju imam nu dipaké ku Harun, seug dipakékeun ka Éléazar anakna Harun. Harun maot di puncak éta gunung. Geus kitu, Musa jeung Éléazar turun ti éta gunung.
29 Barang nyaho Harun geus maot, sakumna urang Israél nyeungceurikan Harun 30 poé lilana.
