Bilangan 3:1-51
3 Ieu turunan Harun jeung Musa waktu Yéhuwa ngomong ka Musa di Gunung Sinai.
2 Ieu ngaran anak-anak lalakina Harun: Nadab nu cikal, Abihu, Éléazar jeung Itamar.
3 Éta ngaran anak-anak lalakina Harun. Maranéhna geus dipilih jeung dilantik pikeun ngalalayanan jadi imam.
4 Tapi waktu di Tanah Gurun Sinai, Nadab jeung Abihu tiwas di hareupeun Yéhuwa waktu nyanggakeun pangbakti* nu teu sajalan jeung hukum Yéhuwa. Waktu tiwas, maranéhna teu barogaeun anak lalaki. Ari Éléazar jeung Itamar mah terus ngalalayanan jadi imam bareng jeung Harun bapana.
5 Tuluy Yéhuwa ngomong ka Musa,
6 ”Kaom Léwi sina ka hareup sarta nangtung di hareupeun Imam Harun. Maranéhna bakal jadi palayanna.
7 Maranéhna kudu ngajalankeun kawajibanana ka Harun jeung ka sakumna jamaah di hareupeun kémah tepangan ku cara ngalalayanan di tabernakel.
8 Maranéhna kudu ngurus sakabéh parabot kémah tepangan jeung ngajalankeun kawajibanana ka urang Israél ku cara ngalalayanan di tabernakel.
9 Manéh kudu masrahkeun urang Léwi ka Harun jeung ka anak-anak lalakina. Ti antara urang Israél, maranéhna téh geus ditugaskeun pikeun ngabantu Harun.
10 Manéh kudu ngalantik Harun jeung anak-anak lalakina pikeun ngajalankeun tugas sabagé imam. Saha waé nu ngadeukeutan tempat suci, padahal manéhna lain imam,* kudu dipaéhan.”
11 Yéhuwa neruskeun deui omongana-Na ka Musa,
12 ”Ti antara urang Israél, Kuring geus milih urang Léwi pikeun jadi gagantina sakabéh anak cikal Israél. Urang Léwi bakal jadi milik Kuring.
13 Ieu ku lantaran kabéh anak cikal téh milik Kuring. Dina poé Kuring ngabinasakeun kabéh anak cikal di Mesir, Kuring misahkeun sakabéh anak cikal Israél keur Kuring, boh jelema boh sato. Maranéhna bakal jadi milik Kuring. Kuring téh Yéhuwa.”
14 Yéhuwa ngomong deui ka Musa di Tanah Gurun Sinai,
15 ”Jieun daptar lalaki-lalaki turunan Léwi nurutkeun kulawarga pihak bapana jeung kaomna. Nu umurna sabulan ka luhur kudu didaptar.”
16 Jadi Musa ngadaptar maranéhna sakumaha nu diparéntahkeun ku Yéhuwa.
17 Ieu ngaran anak-anak lalakina Léwi: Gérsyon, Kohat jeung Mérari.
18 Anak-anak lalakina Gérsyon téh Libni jeung Syiméi. Ngaran maranéhna dijadikeun ngaran kulawarga-kulawarga turunan maranéhna.
19 Anak-anak lalakina Kohat téh Amram, Izhar, Hébron, jeung Uziél. Ngaran maranéhna dijadikeun ngaran kulawarga-kulawarga turunan maranéhna.
20 Anak-anak lalakina Mérari téh Mahli jeung Musyi.
Ngaran maranéhna dijadikeun ngaran kulawarga-kulawarga turunan maranéhna. Éta kulawarga-kulawarga kaom Léwi nurutkeun kulawarga pihak bapana.
21 Ti turunan Gérsyon aya kulawarga Libni jeung kulawarga Syiméi. Éta kulawarga-kulawarga turunan Gérsyon.
22 Kabéh lalaki nu umurna sabulan ka luhur nu didaptar téh aya 7.500 urang.
23 Kulawarga-kulawarga turunan Gérsyon masang kémah di tukangeun tabernakel, di beulah kulon.
24 Pamingpin kulawarga pihak bapa turunan Gérsyon téh Éliasaf anak Laél.
25 Kawajiban turunan Gérsyon di kémah tepangan téh nyaéta ngurus tabernakel jeung sakabéh panutupna, hordéng keur lawang asup kémah tepangan,
26 kaén keur di buruan, hordéng keur lawang asup buruan di sakuriling tabernakel jeung mézbah, tali-talina, sarta sakabéh hal nu aya patalina jeung éta kabéh.
27 Ti turunan Kohat aya kulawarga Amram, kulawarga Izhar, kulawarga Hébron, jeung kulawarga Uziél. Éta kulawarga-kulawarga turunan Kohat.
28 Kabéh lalaki nu umurna sabulan ka luhur nu didaptar téh aya 8.600 urang. Maranéhna boga kawajiban pikeun ngurus tempat suci.
29 Kulawarga-kulawarga turunan Kohat masang kémah di beulah kidul tabernakel.
30 Pamingpin kulawarga pihak bapa ti kabéh kulawarga turunan Kohat téh Élizafan anak Uziél.
31 Maranéhna boga kawajiban pikeun ngurus peti, méja, wadah lampu, mézbah, sakabéh parabot nu dipaké di tempat suci, hordéng, sarta naon waé nu aya patalina jeung éta kabéh.
32 Pamingpin urang Léwi téh Éléazar anak Imam Harun. Éléazar jadi pangawas pikeun sakabéh jalma nu boga tugas ngurus tempat suci.
33 Ti turunan Mérari aya kulawarga Mahli jeung kulawarga Musyi. Éta kulawarga-kulawarga turunan Mérari.
34 Kabéh lalaki nu umurna sabulan ka luhur nu didaptar téh aya 6.200 urang.
35 Pamingpin kulawarga pihak bapa ti kabéh kulawarga turunan Mérari téh Zuriél anak Abihail. Maranéhna masang kémah di beulah kalér tabernakel.
36 Turunan Mérari boga kawajiban pikeun ngurus rangka-rangka tabernakel, palang-palangna, pilar-pilarna, alas-alasna nu aya liangan, sakabéh parabotna, sarta naon waé nu aya patalina jeung éta kabéh.
37 Maranéhna gé kudu ngurus tihang-tihang di sakuriling buruan, alas-alasna nu aya liangan, patok-patokna, jeung tali-talina.
38 Musa, Harun, jeung anak-anak lalakina Harun masang kémah di beulah wétan di hareupeun tabernakel, di arah panonpoé medal, di hareupeun kémah tepangan. Maranéhna boga kawajiban ngurus tempat suci pikeun mangpaat urang Israél. Saha waé nu ngadeukeutan tempat suci, padahal manéhna lain imam,* kudu dipaéhan.
39 Kabéh lalaki ti kaom Léwi nu umurna sabulan ka luhur didaptar ku Musa jeung Harun nurutkeun kulawargana, sakumaha nu diparéntahkeun ku Yéhuwa. Kabéhanana téh aya 22.000 urang.
40 Tuluy Yéhuwa ngomong ka Musa, ”Jieun daptar sakabéh anak cikal lalaki urang Israél nu umurna sabulan ka luhur. Itung jumlah maranéhna jeung jieun daptar ngaranna.
41 Pisahkeun urang Léwi keur Kuring. Maranéhna téh gaganti sakabéh anak cikal urang Israél. Pisahkeun ogé ingon-ingonna urang Léwi pikeun jadi gaganti sakabéh anak cikal ingon-ingonna urang Israél. Kuring téh Yéhuwa.”
42 Jadi, Musa ngadaptar sakabéh anak cikalna urang Israél, sakumaha nu diparéntahkeun ku Yéhuwa ka manéhna.
43 Sakabéh anak cikal lalaki nu umurna sabulan ka luhur nu ngaranna didaptar téh aya 22.273 urang.
44 Yéhuwa neruskeun deui omongana-Na ka Musa,
45 ”Pisahkeun urang Léwi pikeun jadi gaganti sakabéh anak cikal urang Israél. Pisahkeun ogé ingon-ingonna urang Léwi pikeun jadi gaganti ingon-ingonna urang Israél. Urang Léwi kudu jadi milik Kuring. Kuring téh Yéhuwa.
46 Jumlah anak cikalna urang Israél téh leuwih loba 273 urang tibatan jumlah urang Léwi. Maranéhna kudu ditebus.
47 Saurangna lima syékel* nurutkeun patokan beurat di tempat suci. Sasyékel téh kira-kira 12 gram.*
48 Duitna bikeun ka Harun jeung anak-anak lalakina. Éta téh panebus keur jumlah urang Israél nu leuwih téa.”
49 Jadi, Musa ngumpulkeun duit panebus keur jalma-jalma nu jumlahna leuwih loba tibatan urang Léwi.
50 Duit panebus keur anak cikal urang Israél nu dibikeun ka manéhna téh jumlahna 1.365 syékel nurutkeun patokan beurat di tempat suci.
51 Geus kitu, Musa mikeun duit panebus éta ka Harun jeung anak-anak lalakina luyu jeung ucapan Yéhuwa, percis sakumaha nu diparéntahkeun ku Yéhuwa.
Catetan Tambihan
^ As. ”seuneu”.
^ Maksudna, nu lain ti kulawarga Harun.
^ Maksudna, nu lain ti kulawarga Harun.
^ 1 syékel = 11,4 g. Tingali Lamp. B14.
^ As. ”Sasyékel téh 20 géra”.
