Ibrani 1:1-14
1 Dina jaman baheula, Allah ngomong ka karuhun urang liwat para nabi dina loba kasempetan jeung ku rupa-rupa cara.
2 Tapi ayeuna dina ahir jaman, Anjeunna ngomong ka urang ku perantaraan saurang Putra, nu ku Anjeunna dijadikeun ahli waris sagala hal jeung digunakeun pikeun nyiptakeun jagat raya.*
3 Manéhna téh némbongkeun kamulyaan Allah, boga kapribadian nu percis jeung Anjeunna, sarta ngajaga sagalana tetep aya ku firman Allah nu gedé kawasana. Sanggeus nyucikeun urang tina dosa, manéhna diuk di katuhueun Allah Nu Agung di sorga.
4 Manéhna jadi leuwih punjul tibatan para malaikat lantaran ngawaris ngaran nu leuwih mulya tibatan ngaran maranéhna.
5 Misalna, ka malaikat mana Allah pernah ngomong kieu, ”Manéh téh putra Kuring; ayeuna Kuring jadi Bapa manéh,” atawa, ”Kuring bakal jadi Bapana, jeung manéhna bakal jadi putra Kuring”?
6 Tuluy, waktu Allah ngutus Putra Cikal-Na ka dunya, Anjeunna nyebutkeun kieu, ”Sakabéh malaikat Allah kudu sujud ka manéhna.”
7 Anjeunna gé nyebutkeun kieu ngeunaan para malaikat, ”Ku Anjeunna para malaikat dijadikeun mahluk roh nu kuat, jeung para palayan-Na dijadikeun siga seuneu nu ngagedur.”
8 Tapi, ngeunaan Putra-Na mah Anjeunna nyebutkeun kieu, ”Allah téh tahta manéh salalanggengna, jeung tongkat Pamaréntahan manéh téh tongkat kaadilan.
9 Manéh cinta kana hal-hal nu bener jeung ijid kana hal-hal nu jahat. Éta sababna Allah, Allah manéh, ngalantik manéh ku minyak, jeung méré kabagjaan nu leuwih gedé tibatan raja-raja séjén.”
10 Aya ogé ayat nu nyebutkeun kieu, ”Nun Gusti, ti mimiti pisan Gusti nyieun pondasi bumi, jeung langit téh hasil karya panangan Gusti.
11 Éta kabéh bakal musna, tapi Gusti bakal tetep aya. Siga pakéan, éta kabéh bakal ruksak,
12 sarta ku Gusti bakal ditilepan siga jubah jeung bakal diganti siga pakéan. Tapi Gusti mah moal barobah, jeung hirup Gusti moal aya tamatna.”
13 Ka malaikat mana Anjeunna pernah ngomong kieu, ”Diuk di katuhueun Kuring nepi ka Kuring nalukkeun kabéh musuh manéh di handapeun suku manéh”?
14 Lainna kabéh malaikat téh mahluk roh nu ngajalankeun palayanan suci, nu diutus pikeun ngalalayanan jalma-jalma nu bakal disalametkeun?
Catetan Tambihan
^ Atawa ”sistim-sistim dunya”. Tingali ”Sistim dunya” dina Daptar Istilah.
